1 Corintios 15 - Nuevo Testamento Toba Sombrero Negro

Cristo chiyaqauelo joga'me napa'lpi da'me 'niyelaĝajeguem

¹ Ami yaqaya'olqa, jetaque ami ñetouenaĝanaĝaneque da'me onaĝaic 'naqatac jo'ne ami jaqataĝana'aque ca'li, da'me jo'ne auacoñiyeguet ca'li, nataq'aen da'me nach'eda chiyaqayi da'me ami chimadichidiñe.

² Nataq'aen dojo' 'naqatac chiyaqayi da'me male adec'aliyegue, ta'le aviyamaĝachi naq'aeta da'me ami japaĝagueneque ca'li. Qom ja naq'aeta, qama'le qaya'te chiyaqayi da'me adepi'i jo'ne qaedi qoyiyamaĝam.

³ Qa'a ca'li 'uaechiñe ami janema da'me napaĝaguenataĝanaĝac jo'ne joote jayem qoyanem, nach'eda 'yaĝatetac ñe'me Cristo queda'me yeleu qaedi yapalaĝa't joda'me qadoeco, naq'aeta da'me 'yaĝatetedac gaa'me nedii's jo'ne 'laqatac ñe'me Dios.

⁴ Nach'e ena'am ñe'me qoyijeñi ca'li, nataq'aen queda'me 'niyelaĝajeguem ca'li yenoĝodegue ga'me tres noloqo'ote, naq'aeta da'me 'yaĝatetedac gaa'me nedii's jo'ne 'laqatac ñe'me Dios.

⁵ Nach'e ena'am naloĝoneguet ca'li ñe'me Pedro, ua'edi naloĝonegueta gaa'me doce jo'ne mach'e lamaĝa's,

⁶ nataq'aen ca'li nalo'ta't joga'me quinientos 'me quetedapegue' ca'li qama'le naloĝonegueta —yamta'le yemeda joga'me maliaĝa uo'oe, mate mane'e uo'oe dia'me joote qayaua—

⁷ qama'le ua'edi naloĝoneguet ñe'me Santiago, nataq'aen ena'uaque jogaa'me namaĝa's laqaya'.

⁸ Da'me p'ategue, jayem naloĝoneguet, da'me ena'am ta'le jayem notolec qom ja nateja'ague ga'me lañoĝoqui.

⁹ Qa'a jayem qaya'te yi'yoĝodic, ja jena'am gaa'me namaĝa's laqaya', nataq'aen ja jayet ta'le jayem qoyenaqatenec Jesucristo lamaĝajec, qa'a ca'li jecaa'tape gaa'me jo'ne p'iida'a ñe'me Dios qaedi japalaĝa't joga'me p'etaqadaiquipi.

¹⁰ Qalaĝaja nach'eñe ñe'me Dios jo'ne jayem yichoĝoden, ya'uo da'me qaedi nayi male jayem lamaĝajec joñe'me Cristo, nataq'aen da'me lichoĝodenataĝanaĝac ñe'me Dios 'uo da'me jalayaĝac, qa'a yataqachiñe t'adaic da'me 'yonataĝanaĝac, ja jena'ama gaa'me namaĝa's laqaya'. Qalaĝaja ja mach'e 'yonataĝanaĝac, dite da'me jayem 'yonataĝanaĝan da'me lichoĝodenataĝanaĝac ñe'me Dios.

¹¹ Chane'eja, uotaĝa jayem japaĝaguenataĝatapec da'me 'laqatac ñe'me Dios, uotaĝa gaa'me namaĝa's laqaya' jo'ne dapaĝaguenataĝatedapec, dojo' nach'eda 'naqatac jo'ne ja'aĝataqatac, nataq'aen nach'eda jo'ne auacoñiyeguet qaedi auep'iiya'a.

Nach'e ena'am 'niyelaĝadijeguem joga'me p'etaqadaiquipi

¹² Qalaĝaja, ta'le qo'yaĝatetac ñe'me Cristo queda'me 'niyelaĝajeguem ca'li, chiyaqauelo joga'me napa'lpi, ¿toqoch'e uo'oe gaa'me ami uetauelo jo'ne eetapela'ajalo ja qo'niyelaĝachidijeguem jogaa'me yele'u?

¹³ Qa'a ta'le ja eja da'me qo'niyelaĝachidijeguem gaa'me jo'ne joote yele'u, qama'le nach'e ena'am Cristo ja qo'niyelaĝachijeguem ca'li.

¹⁴ Nataq'aen ta'le ja eja queda'me Cristo 'niyelaĝajeguem, qama'le da'me qadapaĝaguenataĝanaĝac qaya'te lajo'viyaĝac, nataq'aen da'me adepi'i qaya'te yelo'teguet.

¹⁵ Nataq'aen ta'le ja eja da'me dojo', qama'le qo'mi di'yoqo'teque pecayaqa da'me ja'aqataqatac ñe'me Dios, jo'ne jechoĝotaqatac queda'me Dios 'niyelaĝachijeguem ñe'me Cristo, qalaĝaja ja 'niyelaĝachijeguem ta'le ja eja da'me qo'niyelaĝachidijeguem jogaa'me jo'ne joote yele'u.

¹⁶ Qa'a ta'le ja qo'niyelaĝachidijeguem gaa'me yele'u, qama'le nach'e ena'am Cristo ja qo'niyelaĝachijeguem.

¹⁷ Nach'e ena'am ta'le Cristo ja qo'niyelaĝachijeguem, qama'le da'me adepi'i qaya'te lajo'viyaĝac nataq'aen adejomiitac, qa'a naa'me adoecodi' maliaĝa ja qoyapalaĝa't.

¹⁸ Nach'e ena'am ta'le ja qo'niyelaĝachijeguem ñe'me Cristo, qama'le dia'me p'etaqadaiquipi jo'ne joote yele'u ja qonec'alaĝatedegue dite da'me qoyapalaĝa't.

¹⁹ Nataq'aen da'me qadeuataqataĝanaĝac queda'me Cristo qo'mi nec'alaĝatedegue, ta'le nach'edata da'me yelo'teguet da'me dojo' qat'oyaĝac jo'ne di'yoq nayi, qama'le yataqata yaguegue da'me qadachoĝodec, ja jenaqa'ama yema ga'me jiyaĝadipi.

²⁰ Qalaĝaja yataqata eja queda'me Cristo 'niyelaĝajeguem, chiyaqauelo dia'me napa'lpi. Qama'le dojo' nach'eda naloĝonatac queda'me nach'e ena'am qo'niyelaĝachidijeguem qomle gaa'me joote yele'u.

²¹ Mate mane'e ena'uaque ga'me jiyaĝadipi yele'u qa'a jouaĝat ga'me 'lonatac joca'li di'me 'uaeñe jiyaĝaua, nach'e naq'aeta ena'uaque qo'niyelaĝachidijeguem jouaĝat ga'me 'lonatac ga'me onolec jiyaĝaua laqaya:

²² qa'a ena'uaque yele'u queda'me ena'uaque c'oqo'te di'me Adán, qama'le nach'e naq'aeta ena'uaque yitaĝa nec'aledegue qa'a chiyoĝoteguet ñe'me Cristo.

²³ Qalaĝaja onolqa'tape qo'niyelaĝachijeguem qomle ga'me jo'ne Dios yepaquetapega: 'uaeñe 'niyelaĝajeguem ñe'me Cristo; qama'le qom yitaĝa 'niyelaq ñe'me Cristo male qo'niyelaĝachidijeguem gaa'me jo'ne quetedapegue' ca'li ñe'me.

²⁴ Qom yem da'me dojo', qama'le novi' ga'me loiquiaqa'yaĝac jena'me aleua, qom Cristo doĝotaĝaneque ena'uaque gaa'me payagodipi 'lañaĝaco nataq'aen lañoqotaĝanaĝaco qama'le yanem da'me nejaliaĝa ñe'me mach'e Qadet'a Dios.

²⁵ Qa'a youetaque queda'me Cristo cha'li nejaliaĝatelegue ena'uac chayovida'a qom Dios yapiaĝalo'te ena'uaque gaa'me qadaute'upi ñe'me Cristo.

²⁶ Nataq'aen ñe'me p'ategue qadauteua jo'ne qoyapalaĝat qomle nach'eda da'me neleuaĝa.

²⁷ Joote qoyediñe ca'li gaa'me nedii's 'me 'laqatac ñe'me Dios, eet'oi: “Ena'uaque gaa'me uo'oe, Dios 'yetem ñe'me Cristo qaedi ena'uaque yelolo'te.” Qalaĝaja qom enaac queda'me ena'uac yelolegue ñe'me Cristo, qama'le dojo' di'yoq q'aen queda'me ja yalequeten ñe'me Dios, qa'a nach'eñe ñe'me jo'ne 'yetem qaedi yelolegue ena'uac.

²⁸ Qama'le qom Cristo nejaliaĝatelo'te ena'uaque gaa'me uo'oe, chane'eja ñe'me jo'ne Dios Lec'oĝot male uetaue da'me lejaliaĝa ñe'me Dios, qama'le Dios yemata'a't da'me yelolegue ena'uac.

²⁹ Nataq'aen gaa'me yacoteguet da'me nachilaĝanataĝanaĝac qa'a jouaĝat dia'me yele'u, ¿toqoch'e yauote da'me dojo'? Ta'le ja eja da'me yitaĝa 'niyelaĝadijeguem gaa'me joote yele'u, ¿toqoch'e yacoteguet da'me nachilaĝanataĝanaĝac qa'a jouaĝat dia'me joote yele'u?

³⁰ Nach'e naq'aeta da'me qo'mi, ta'le dia'me yele'u ja 'niyelaĝadijeguem qomle, ¿toqoch'e yemeda naa'me noloqo'ote da'me qo'mi uetalo'te da'me lichic?

³¹ Eja, ami yaqaya'olqa, yemeda naa'me noloqo'ote jajoya'aguet nale ga'me jo'ne jetaque jayem yalat. Yataqata eja da'me dojo', ena'am da'me 'uo da'me ñetonaĝac da'me ami ñetotapeque, qa'a male a'uamaqachiñe ñe'me Cristo mach'e Qadejaliaĝanec.

³² Uo'oe gaa'me jeloquitapegue'to jo'ne Éfeso laje'pi jo'ne ena'ama gaa'me yejidipi, qalaĝaja ta'le jaldata da'me 'uo da'me dojo' ñejiyaĝauayaĝac nataq'aen ja jayem 'te qo'niyelaĝachijeguem qomle, ¿jach'e ga'me jachiyoĝotayi? Qaya. Ta'le ja eja da'me qo'niyelaĝachidijeguem dia'me jo'ne joote yele'u, qama'le ena'ama ga'me qo'enaac nale: “'Noota qom jiqui'yaqatac nataq'aen ñiyomaqatac nayi, qa'a uotaĝa qom 'yoĝoñi qama'te qadeleu.”

³³ Ena'te anoqoviñela't: ñe'me jo'ne ya'uo da'me ja no'en 'naĝat ga'me laqaya jo'ne jetaque ya'uo da'me 'noota.

³⁴ Ami, jalcote 'noota ta'le a'viyelaqaiya da'me onaĝaic adadiqui nataq'aen ja yitaĝa auauoyi adoequi, queda'me uo'oe gaa'me ami uetauelo 'me maliaĝa ja yateto'n ñe'me Dios. Jenaac da'me dojo' qaedi 'uo da'me adepocoĝoqui.

Da'me 'loyaĝac qom 'niyelaĝadijeguem gaa'me yele'u

³⁵ Qa'a uotaĝa 'uo ga'me ami yachimaĝatalo: “¿Jach'e jogamaĝa 'loyaĝa'j qoyen qom qo'niyelaĝachidijeguem dia'me joote yele'u? Uotaĝa ¿jach'e jogamaĝa 'loyaĝa'j ga'me lapa't jo'ne 'uo qomle?”

³⁶ ¡Am chiyoĝojec qom naq'aeta ga'me adenataĝanaĝac! Jaga'me onole peta, qom ja yeleu nale qoyaañi qoyachaue jena'me aleua, qama'le ja nolelijeguem jaga'me nana.

³⁷ Qama'le ga'me jo'ne qoyaañi ja naqaega ga'me lolelaĝaic, dite da'me jalgata jaga'me peta, uotaĝa trigo jala, uotaĝa gamachaqaega peta laqaya.

³⁸ Qalaĝaja nach'eñe ñe'me Dios mach'e ya'uo da'me 'loyaĝac jaga'me lolelaĝai; onole'tape peta Dios yepagaqachichigui da'me mach'e 'loyaĝac q'aen jaga'me lolelaĝai.

³⁹ Ja naqaeda ta'le yema da'me 'noyaĝac nalotapega't, dite da'me yodapecache da'me mach'e 'loyaĝac qoyen, jogaa'me jiyaĝa'u 'uo da'me mach'e 'loyaĝa'j, nach'e naq'aeta joga'me yejidipi, joga'me mayodipi, uotaĝa joga'me niyaqapi: onolqa'tape qoyanem da'me mach'e 'loyaĝa'j qoyen.

⁴⁰ Nach'e ena'am uo'oe gaa'me 'noyaĝaco jo'ne uedalegue jena'me aleua, nataq'aen uo'oe gaa'me 'noyaĝaco jo'ne uedo'ot di'me piyem, qalaĝaja da'me 'noyaĝaco jo'ne uedo'ot di'me piyem ja ena'ama jogaa'me 'noyaĝaco jo'ne uedalegue jena'me aleua.

⁴¹ Jañe'me ajeua 'uo da'me mach'e lauaqayaĝac, jo'ne ja ena'am da'me lauaqayaĝac ñe'me auoĝoic, nach'e naq'aeta ga'me uaqachiñipi 'uo da'me mach'e lauaqayaĝa'j jo'ne yaqa'a; nataq'aen da'me lauaqyaĝac joga'me uaqachiñipi ja ena'uac nalo'ta't dite da'me yodapecache.

⁴² Nach'e ena'am naq'aeta qomle qo'niyelaĝachidijeguem dia'me joote yele'u. Ga'me 'noyaĝac jo'ne qoyijeñi yovita da'me nouayi; ga'me jo'ne qo'niyelaĝachijeguem qamqa'me dalaĝaic jo'ne ja yitaĝa yeleu.

⁴³ Ga'me 'noyaĝac jo'ne qoyijeñi ja no'en; ga'me 'niyelaĝajeguem yataqachiñe onaĝaic. Ga'me 'noyaĝac 'me qoyijeñi nach'ega ja nale'en t'añi; ga'me 'niyelaĝajeguem nach'ega 'uañaĝaic.

⁴⁴ Ga'me 'noyaĝac jo'ne qoyijeñi nach'ega 'noyaĝac jo'ne quetapegue'to ga'me lamaico 'me naya'ague da'me jiyaĝauayaĝac; ga'me jo'ne 'niyelaĝajeguem nach'ega 'noyaĝac jo'ne dalaĝaic 'me chiyoĝoguet ñe'me Dios Lepaqal 'me ja 'nalegue. Qom 'uo da'me qat'oyaĝac jo'ne netaye da'me loec 'me naya'ac da'me qanejiyaĝauayaĝac, chane'eja nach'e ena'am jaconaĝaguet da'me qat'oyaĝac dalaĝaic 'me chiyoĝoguet ñe'me Dios Lepaqal 'me ja 'nalegue.

⁴⁵ Nach'e ena'am naq'aeta da'me qoyediñe ca'li naa'me nedii's jo'ne 'laqatac ñe'me Dios, eet'oi: “Ñe'me 'uaeñe jiyaĝaua 'me lenaĝat Adán, ca'li qoye'et qama'le qoyanem da'me yataqata nec'aletaye qoyen.” Qalaĝaja ñe'me Adán jo'ne p'ategue, dojo' nach'eñe Cristo, qamqa'me nach'eñe yanegue da'me 'noyaĝac jo'ne chiyaqayi ñe'me Dios Lepaqal.

⁴⁶ Da'me 'noyaĝac dalaĝaic 'me chiyaqayi ñe'me Dios Lepaqal nach'ega jo'ne yataqachiñe p'ajaye, napacalegue da'me 'noyaĝac jo'ne jaldata da'me netaye da'me qanejiyaĝauayaĝac, qa'a 'uaeñe da'me 'loyaĝac qoyen da'me qanejiyaĝauayaĝac, qama'le yem da'me dojo' male qoyanegue da'me 'loyaĝac jo'ne chiyoĝoguet ñe'me Dios Lepaqal 'me ja 'nalegue.

⁴⁷ Ga'me 'uaeñe jiyaĝaua qoyachiyoĝotaye ga'me lojoche jena'me aleua ca'li qoye'et nataq'aen chiyaqaue jena'me aleua; ñe'me jiyaĝaua jo'ne p'ategue, nach'eñe Cristo, qamqa'me chiyaqaje'ma di'me piyem.

⁴⁸ Nataq'aen gaa'me 'noyaĝaco jo'ne chiyoĝoteguet jena'me aleua eda'am da'me 'loyaĝac di'me jiyaĝaua jo'ne qoyachiyoĝotaue jena'me aleua ca'li qoye'et; gaa'me 'noyaĝaco dalaĝayaqa jo'ne dajotegue di'me piyem qomle eda'am da'me 'loyaĝac ñe'me jo'ne chiyaqaje'ma di'me piyem.

⁴⁹ Nayi jenaqa'am di'me 'uaeñe jiyaĝaua jo'ne qoyachiyoĝotaue jena'me aleua ca'li qoye'et; nach'e naq'aeta da'me jenaqa'am qomle ñe'me jiyaĝaua jo'ne chiyaqaje'ma di'me p'ajeguem.

⁵⁰ Ami yaqaya'olqa, jetaque 'uo ga'me ami ja'aĝatema: da'me qat'oyaĝac jo'ne yeleu qomle ja yaqanatet ta'le taue da'me lejaliaĝa ñe'me Dios, nataq'aen ga'me jo'ne yovita da'me nouayi ja yaqanatet ta'le neleguemaĝata da'me ja 'naidena'a.

⁵¹ 'Uo ga'me ami jechoĝotema, ga'me jo'ne ja qoyaloĝon ca'li: qom novi' ga'me loiquiaqa'yaĝac jena'me aleua, da'me qo'mi ja yema da'me qadeleu, qalaĝaja ena'uaque qo'mi 'uo ga'me qo'mi qoneleguemaĝadeta jo'ne dalaĝaic.

⁵² Dojo' 'uo yataqachiñe nepelaĝat qomle, ena'am ta'le qanaqategoĝoñi qom qodomachiya jaga'me najeede jo'ne p'ategue. Qa'a qom yejam jaga'me najeede qama'le dia'me joote yele'u male qo'niyelaĝachidijeguem, nataq'aen male ja yitaĝa yele'u, nataq'aen qo'mi queda'me maliaĝa qadec'aletaye male qo'mi qoyeleguemaĝa't qomle.

⁵³ Qa'a youetaque ta'le qoyeleguemaĝat da'me qanejiyaĝauayaĝac 'loyaĝac jo'ne yovita da'me nouayi qomle, qoyeleguemaĝata da'me ja 'naidena'a; da'me qanejiyaĝauayaĝac 'loyaĝac jo'ne yeleu qomle, youetaque da'me qoyeleguemaĝata da'me male ja yitaĝa yeleu.

⁵⁴ Nataq'aen qom yepaquetelegue da'me dojo', jenjo' qanejiyaĝauayaĝac 'loyaĝac jo'ne yeleu qomle, qom yem da'me qoneleguemaĝata da'me jo'ne ja yitaĝa yeleu, qama'le yepaquichigui ga'me jo'ne joote qoyediñe ca'li naa'me nedii's jo'ne 'laqatac ñe'me Dios, jo'ne eet'oi: «¡Da'me neleuaĝa male qoyolaĝachigui, qama'le da'me qadomataĝanaĝac male nalo'ta't!»

⁵⁵ «¡Male qodoĝotaĝanec da'me lomataĝanaĝac joda'me neleuaĝa nataq'aen da'me lequemaqataĝanaĝac!»

⁵⁶ Da'me neleuaĝa lequemaqataĝanaĝac nach'edaua qadoeco, nataq'aen naa'me qadoeco 'uo da'me lañoqotaĝanaĝaco qaedi qo'mi yauequeteda'ague da'me qadeleuaĝa jo'ne chiyaqayilo gaa'me namaĝajoĝonaĝaco jo'ne Moisés yedidiñe ca'li.

⁵⁷ Qalaĝaja, ¡janemaĝam qadamaic ñe'me Dios, qa'a ñe'me qo'mi yanema da'me qadomataĝanaĝac, chiyaqayi ga'me jo'ne 'lonatac ca'li ñe'me mach'e Qadejaliaĝanec Jesucristo!

⁵⁸ Chane'eja, ami yaqaya'olqa jo'ne jalcote joqopitalo, 'noota qom a'nañaĝachela't, ja ami 'te damichidiñe, nataq'aen nach'e eta't a'vichiye da'me 'lonatac ñe'me Jaliaĝanec, nataq'aen auayachiñe queda'me qom adaloi'ta't da'me a'uonataĝañiuo'o ñe'me Jaliaĝanec qama'le ja yijamaĝajaye.