1 Corintios 14 - Nuevo Testamento Toba Sombrero Negro

Joda'me 'naqataqa jo'ne qoyanema joga'me p'etaqadaiquipi

¹ Oqui'tegue da'me noqopich'i ladic, nataq'aen 'noota qom auepichiya'a da'me jetaque anaviquila't ga'me jo'ne Dios Lepaqal yanegue, qaedi auaqanachichi ta'le a'uaĝachetac da'me 'laqataĝanaĝac ñe'me Dios.

² Qa'a ga'me yadenaĝa't naa'me 'naqataqa laqaya' jo'ne yoda'alo, joga'me jaldata da'me dojapegue' ñe'me Dios. Ja naqaeda ta'le dojapegue'to jogaa'me laqaya'olqa, qa'a qaya'te yayaten ga'me nenaĝategue, mate mane'e nach'eñe ñe'me Dios Lepaqal jo'ne yanem da'me lañoqotaĝanaĝac qaedi nenaĝategue ga'me jo'ne ja di'yoq.

³ Qalaĝaja ga'me jo'ne 'yaĝa'tape naa'me 'naqataqa 'me chiyoqodo'ot ñe'me Dios, joga'me dojetapegue'to ena'uaque jogaa'me laqaya'olqa, qaedi 'yañaqate'tape, nataq'aen loyaĝanate'tape, nataq'aen niyamaĝadetapega't q'ae'n jogaa'me.

⁴ Ga'me jo'ne yadenaĝa't gaa'me 'naqataqa laqaya', joga'me di'yoĝom da'me dojo' qaedi mach'e liyamaĝac; qalaĝaja ga'me jo'ne 'yaĝa'tape naa'me 'laqataqa ñe'me Dios joga'me yanema ga'me 'lañaĝa'j yema jogaa'me laqaya'olqa 'me p'etaqadaiquipi.

⁵ Mate mane'e jayem chiliajaĝa ena'uaque ami auadenaĝachi' gaa'me 'naqataqa laqaya', qalaĝaja jepaquetapega ta'le a'uaĝachetac da'me 'laqataĝanaĝac ñe'me Dios. Ga'me jo'ne 'yaĝatetac da'me 'laqataĝanaĝac ñe'me Dios, nach'ega p'ajaye; ga'me jo'ne yadenaĝa't naa'me 'naqataqa laqaya' ja p'ajaye, lama'aja qom qaya'te yaqanatet ta'le yechoĝo't ga'me yelo'tegueta naa'me 'naqataqa laqaya' 'me yadenaĝa't qaedi chiyaqayi ta'le p'etaqadaiquipi nichiquetedajeguem.

⁶ Ami yaqaya'olqa, nale ami jec'atalo nataq'aen nale jadenaĝa't naa'me 'naqataqa laqaya', ¿qo'li chiyaqayi ta'le ami yecochiyalo? Jaldata ta'le ami janema da'me naloĝonataĝanaĝac jo'ne chiyaqayi ñe'me Dios, uotaĝa gamachaqaega natetonaĝanaĝac, uotaĝa gamachaqaega 'laqataĝanaĝac ñe'me Dios, uotaĝa gamachaqaega napaĝaguenataĝanaĝac.

⁷ Nach'e naq'aeta nale jaga'me niviqui nataq'aen jaga'me najeede. Qom ja di'yoqo'tegue qoyen ga'me lavilyaĝac nale qoyiviquiñgui, qama'le ¿qo'li qoyayaten ga'me lalac?

⁸ Nataq'aen qom 'uo ga'me nalada't, qom ga'me jo'ne yajediye jaga'me najeede qom ja di'yoĝogue q'aen da'me lavilyaĝac, qama'le ¿jach'e ga'me niyamaĝateta't qaedi ca'aguet ga'me lauteua?

⁹ Nach'e naq'aeta da'me ami, qom auacoñiyalo gaa'me 'naqataqa laqaya' jo'ne yoda'alo 'me qaya'te yayate'n, ¿teua'atoqo' qoyayate'n ga'me anenaĝachiyegue? ¡Ena'am ta'le at'aqataqadi' ch'e layat yayoĝo'n nale!

¹⁰ Yataqachiñe eja queda'me uo'oe qayoĝode' 'naqataqa jena'me aleua, qalaĝaja ena'uaque jogaa'me uo'oe naa'me mach'e yelo'tegueta.

¹¹ Chane'eja qom ja jomachiyalo gaa'me 'laqataqa ga'me jo'ne dojetapegue', nataq'aen jayem yaqa'a q'aen ga'me jayem dojetapegue', qama'le jayem jee'tem ta'le yaqa'a joga'me.

¹² Ena'am da'me ami, queda'me auediaqaelegue ta'le auacoñiyeguet joga'me yanegue ñe'me Dios Lepaqal 'me ja 'nalegue, yataqachiñe p'ajaye ta'le auepaquitapega da'me jetaque auacoñiyeguet ga'me jo'ne chiyaqayi da'me ñichigaĝatedajeguem joga'me p'etaqadaiquipi.

¹³ Chane'eja ga'me jo'ne yadenaĝa't gaa'me 'naqataqa laqaya', 'noota ta'le nachoĝodenot ñe'me Dios qaedi nach'e ena'am yanem da'me nañoqotaĝanaĝac jo'ne yechoĝo't gaa'me yelo'tegueta gaa'me 'naqataqa laqaya'.

¹⁴ Qom yaqa'alo ga'me 'yaqataqa da'me ñetamen, nach'eñe ñe'me yepaqal da'me netametac, qalaĝaja qaya'te jalayaĝac da'me yatetonaĝanaĝac.

¹⁵ Chane'eja qom naq'aeta, da'me ñetamen, jemachiya'a ñe'me yepaqal da'me mach'e netamen, nataq'aen nach'e ena'am ca'ue q'aen da'me yatetonaĝanaĝac da'me ñetamen. Nach'e ena'am nale jo'onaĝan, jaĝa'tec ñe'me yepaqal da'me t'onaĝan, qama'le nach'e ena'am ca'ue q'aen da'me yatetonaĝanaĝac da'me jo'onaĝan.

¹⁶ Qom ja naq'aeta ga'me auauoyi, qom 'uo ga'me nedo'ta't q'aen ñe'me lepaqal yanem da'me lamaic ñe'me Dios, gaa'me jo'ne qaya'te latetonaĝanaĝa'j ja yaqanate't ta'le yadenaĝa't ga'me tamenaĝac, qa'a ja yayate'n gaa'me 'naqataqa jo'ne qoyaconalo.

¹⁷ Qa'a mate mane'e onaĝaic ga'me anetamenaĝac, taqaeue'ta jogaa'me adaqaya'olqa ja naqaega chiyaqayi ta'le nichiquetedajeguem jogaa'me.

¹⁸ Ñetotapec ñe'me Dios queda'me qayoĝode' gaa'me 'naqataqa laqaya' jadenaĝa't, ena'uaque ami ñapacalo'te.

¹⁹ Qalaĝaja nale jouetaue ga'me yema'a't, qama'le ja'uo yepagaĝac da'me jaconalo cincolqa 'naqataqa laqaya' jo'ne maqachaĝa qodomachita, ja jena'am ta'le yaguegue q'aen da'me jadenaĝa't gaa'me 'naqataqa laqaya'.

²⁰ Ami yaqaya'olqa, ena'te auadenaĝachi' daa'me lelnataĝaco jogaa'me ñoqolqa. Yataqachiñe 'noota ta'le aueñiya'ama jogaa'me 'najodolqa jo'ne ja yauote ga'me ja no'en, qalaĝaja 'noota ta'le gaa'me adelnataĝacodi' joote 'yaĝayaqa.

²¹ Jaga'me nede jo'ne lamaĝajoĝonaĝaco ñe'me Dios, 'uo ga'me lae jo'ne eet'oi: «Ja'uo da'me qaedi jiyaĝa'u jo'ne yoda'alo Dojapegue'to joga'me yalaqapi; Jedolo'te gaa'me 'naqataqa laqaya', Qalaĝaja taqaedita naq'aeta taĝa da'me jayem yoqochideta.» Naq'aeta da'me 'laqatac ñe'me Jaliaĝanec.

²² Chane'eja nale ga'me p'etaqadaiquipi yadenaĝa't gaa'me 'naqataqa laqaya', dojo' nach'eda 'nanec, qalaĝaja ja qoyeloĝonaĝachiguilo joga'me p'etaqadaiquipi, dite joga'me jo'ne ja p'etaqadaiquipi. Qalaĝaja da'me qo'yaĝa'tape jodaa'me 'laqataĝanaĝaco ñe'me Dios, nach'eda 'nanec jo'ne qoyanema joga'me p'etaqadaiquipi, ja qoyeloĝonaĝachiguilo gaa'me jo'ne ja p'iida'a ñe'me Dios.

²³ Chane'eja, qom ena'uaque jogaa'me p'etaqadayaqa yema'a't nale nataq'aen qom ena'uaque ami auadenaĝachi naa'me 'naqataqa laqaya' 'me yoda'alo, qama'le qom ami tauelo gaa'me qaya'te letadenataĝanaĝa'j uotaĝa gaa'me ja p'etaqadayaqa, qama'le ¿qo'li ja ami 'te enapegalo jalaĝayaqa?

²⁴ Qalaĝaja qom 'uo ga'me ja p'etaqadaic uotaĝa qom 'uo ga'me qaya'te letadenataĝanaĝac ami tauelo, qom ena'uaque ami a'uaĝachetac da'me 'laqatac ñe'me Dios, joga'me ami naquiaĝanalo nataq'aen nayatela't queda'me eja loeco lo'o. Naloqotenaĝaneguet da'me 'loyaĝac yema ga'me jo'ne domachiya,

²⁵ qama'le joga'me yechoĝot ga'me uetaue joga'me lauel, qama'le nachoĝodenot joñe'me Dios nataq'aen 'nonaĝachigui joñe'me nataq'aen enaac queda'me yataqachiñe eja ami uetauelo joñe'me Dios.

²⁶ Chane'eja ami yaqaya'olqa, nale ademiya'a't, 'noota ta'le onolqa'tape uo'oe gaa'me lalaco, uotaĝa 'uo ga'me lapaĝaguenataĝanaĝac, uotaĝa 'yaĝatetac ga'me jo'ne Dios yaloĝona, uotaĝa yadenaĝa't gaa'me 'naqataqa laqaya', uotaĝa 'yaĝatetac ga'me yelo'tegueta gaa'me 'naqataqa. Qalaĝaja ena'uac 'noota ta'le chiyaqayi da'me nichiquetaye ga'me p'etaqadaiquipi.

²⁷ Qom uo'oe gaa'me jetaque yaconalo gaa'me 'naqataqa laqaya', 'noota ta'le dojolqa uotaĝa trejolqa, nataq'aen 'noota qom noqoiquetedegue, nataq'aen 'uo ga'me netaĝayaĝanaĝanec ta'le 'yaĝate'tape ga'me yelo'tegueta jogaa'me 'naqataqa laqaya'.

²⁸ Qalaĝaja qom qaya'te netaĝayaĝanaĝanec ta'le 'yaĝate'tape jogaa'me 'naqataqa 'me qoyaconalo, qama'le ga'me jetaque yadenaĝa't gaa'me 'naqataqa laqaya' 'noota ta'le 'nemaqata; 'noota ta'le mach'ega yejamaĝa'ye't ñe'me Dios.

²⁹ Nataq'aen 'noota ta'le dojolqa uotaĝa trejolqa 'yaĝatetedac da'me 'laqatac ñe'me Dios, nataq'aen 'noota qom gaa'me jiyaĝa'u laqaya' naloqote'n gaa'me 'laqataqa qom naqaeñe ñe'me Dios chiyaqayi ga'me nenaĝategue.

³⁰ Qalaĝaja qom 'uo ga'me ñichiñe jo'ne qoyeloĝonaĝachigui ga'me 'naqatac jo'ne chiyoĝoguet ñe'me Dios, ga'me jo'ne 'uaechiñe da'me 'taqataĝatac 'noota qom 'nemaĝañe.

³¹ Qa'a ena'uaque ami auaqanachichi da'me a'uaĝachetac da'me 'laqatac ñe'me Dios, noqoitedegue, qaedi ena'uaque yacoteguet da'me napaĝaguenataĝanaĝac nataq'aen ena'uaque yacoteguet da'me 'lañaĝa'j.

³² Ga'me jo'ne qoyanem da'me ja naqalataĝaic qaedi 'yaĝatetac da'me 'laqatac ñe'me Dios, 'noota qom naloqote'n gaa'me 'laqataqa,

³³ qa'a Dios ja 'yamaqaten ta'le ja niyamaĝa ga'me uetaue joga'me yema'a't, dite da'me 'nemaĝac. Naq'aeta ga'me p'etaqadaiquipi jo'ne c'oqo'tepi ñe'me Dios.

³⁴ Qama'le gaa'me yauo', 'noota ta'le 'yemadete' nale uetedaue ga'me yema'a't, qa'a ja qoyajeta ta'le dojetapega't, dite da'me 'noota ta'le naloqotela'ajalo, naq'aeta da'me joote qoyediñe joca'li jaga'me nede jo'ne uedaye gaa'me lamaĝajoĝonaĝaco ñe'me Dios.

³⁵ Qalaĝaja qom gaa'me yauodipi jetaque 'uo ga'me yayate'n, qama'le 'noota qom yachimaĝatalo gaa'me loua' nale ue'talo naa'me 'lachaqa'te, qa'a ja tayet ta'le yauo jaga'me dojetac qom 'uo ga'me yema'a't.

³⁶ Jega: ¿qo'li ami chiyaqauelo daa'me 'laqataqa ñe'me Dios, uotaĝa nach'e amite' auacoñiyeguet da'me 'laqatac ñe'me Dios?

³⁷ Qom 'uo ga'me eetapela't 'laqataĝanaĝanec ñe'me Dios, uotaĝa eetapela't 'uo ga'me qoyanem 'me chiyaqayi ñe'me Dios Lepaqal, 'noota qom yatetoneguet nataq'aen 'yamaqaten ga'me jo'ne ami jedenaqatenalo 'me yediijec, qa'a mach'e lamaĝajoĝonaĝac ñe'me Jaliaĝanec.

³⁸ Qalaĝaja qom 'uo ga'me ja equegue da'me dojo', qama'le da'me ami ena'te auomachiiya joga'me.

³⁹ Chane'eja ami yaqaya'olqa, 'noota qom 'uo da'me adepagaĝaqui ta'le a'uaĝachetac da'me 'laqatac ñe'me Dios, nataq'aen ena'te auelaĝachitapeguem ga'me jo'ne jetaque yadenaĝa't naa'me 'naqataqa laqaya',

⁴⁰ nataq'aen aviyamaĝachichiñe ena'uaque naa'me uo'oe qaedi yema yataqatelegue ga'me auauoyi.