1 Corintios 13 - Nuevo Testamento Toba Sombrero Negro

Da'me noqopich'i jo'ne yataqata eja

¹ Qom jayaten ta'le jadenaĝa't daa'me 'laqataqa joga'me jiyaĝa'u nataq'aen daa'me 'laqataqa jogaa'me piyem laje', qalaĝaja qom qaya'te yoqopich'i, qama'le gaa'me 'yaqataqa qaya'te yelo'teguet, jena'am jaga'me qataqui, uotaĝa ga'me natoviaĝatajec jo'ne qoyatoviaĝan nale.

² Nataq'aen qom 'uo da'me yañoqotaĝanaĝac qaedi ja'aĝatetac da'me 'laqataĝanaĝac ñe'me Dios, nataq'aen qom jayate'n ena'uaque jogaa'me 'lonataĝanaĝaco ñe'me Dios, nataq'aen jayate'n ena'uaque gaa'me uo'oe, nataq'aen qom t'adaic da'me yepe'e qaedi jaqanatet ta'le jedaĝat ga'me qajoĝonaĝa, qalaĝaja qom qaya'te yoqopich'i, qama'le ja jayem 'te p'ajaye.

³ Nataq'aen qom yema janegue ga'me jauana, nataq'aen qom ñemenouelo joga'me qadaute'upi qaedi qoyigoue da'me 'yoyaĝac, qalaĝaja qom qaya'te yoqopich'i qama'le qaya'te jayem chiyaqayi.

⁴ Ga'me 'uo da'me loqopich'i yataqachiñe 'uo da'me napogaĝadenaĝac nataq'aen da'me lichoĝodenataĝanaĝac, ja p'aguenataĝanaĝaic, ja mach'e 'nonaĝatapela't, nataq'aen ja ni'yoĝodenaĝaic.

⁵ Ga'me jo'ne 'uo da'me loqopich'i qamqa'me ja co'yaqaic, ja mach'e 'natetapela't, ja lemataqaic, nataq'aen ja uenatetapegalo gaa'me lejamaĝataĝaco jogaa'me laqaya'olqa.

⁶ Ga'me 'uo da'me loqopich'i ja machiñe q'aen qom qaya'te chimaqachiñe, dite qom qonenaĝategue ga'me jo'ne yataqatelegue.

⁷ Ga'me jo'ne 'uo da'me loqopich'i yema napogaĝadeneguet, nataq'aen ja neli'ñejop da'me 'yamaqaten da'me eja, nach'e eta't 'uo da'me leuataqataĝanaĝac, nataq'aen nalo'oguet yema.

⁸ Da'me noqopich'i qaya'te loiquiaqa'; nach'e ena'am da'me uo'oe daa'me 'laqataĝanaĝaco ñe'me Dios, qalaĝaja yovita nale ga'me nolo' da'me male yenoĝodegue jogaa'me. Nach'e ena'am da'me uo'oe gaa'me 'naqataqa laqaya' 'me yoda'alo, qalaĝaja yovita ga'me nolo' nale ja yitaĝa qodomachiyalo. Nach'e ena'am 'uo da'me nayatenaĝanaĝac, qalaĝaja yovita da'me pal qomle.

⁹ Qa'a da'me qadatetonaĝanaĝac ja naloiñe, nach'e ena'ama jodaa'me qadapaĝaguenataĝanaĝaco ja naloidiñe;

¹⁰ qalaĝaja qom novi' da'me jo'ne yataqatelegue qama'le ga'me ja naloiñe male pal.

¹¹ Ca'li jayem notolec, jena'ama gaa'me ñoqolqa nale jojetac, gaa'me yelnataĝaco nataq'aen gaa'me yec'atenaĝanaĝaco nach'e naq'aeta gaa'me ñoqolqa; qalaĝaja ca'li jovita da'me jayem 'yaĝaic, male jeca'e da'me 'loyaĝa'j jogaa'me ñoqolqa.

¹² Nach'e naq'aeta qom jetaque jec'atenaq ga'me jo'ne chiyoqo'ot ñe'me Dios, ga'me jo'ne jauanaĝa ena'am ta'le ch'e laqaselegaĝac jo'ne ja yataqachiñe di'yoqotelegue; qalaĝaja yovita qomle ga'me nolo' da'me male yataqachiñe di'yoqochigui jauanaĝa. Nayi ja di'yoĝoyi da'me jateton ñe'me Dios; qalaĝaja qom novitequena ga'me nolo', male yataqachiñe nalochiñe da'me yatetonaĝanaĝac, ena'am da'me eeta joñe'me Dios da'me jayem yateton.

¹³ Chane'eja uo'oe naajo' tres jo'ne qaya'te loiquiaqa't: da'me nepe'e, da'me najoĝonataĝanaĝac nataq'aen joda'me noqopich'i. Qalaĝaja da'me yataqachiñe p'ajaye naa'me naajo' tres mach'e noqopich'i.