1 Corintios 12 - Nuevo Testamento Toba Sombrero Negro

Nañoqotaĝanaĝaco jo'ne chiyaqayilo ñe'me Dios Lepaqal 'me ja 'nalegue

¹ Ami yaqaya'olqa, nayi jetaque ami japaĝagueneque gaa'me chiyaqayilo da'me nañoqotaĝanaĝac 'me yanegue ñe'me Dios Lepaqal 'me ja 'nalegue.

² Auayachiñe queda'me ca'li maliaĝa ja auep'iiya'a ñe'me Cristo, 'uo ga'me nañoqotaĝanaĝac jo'ne nach'ega ami yauequeteda'ague da'me qaedi auep'iiya'alo jogaa'me jo'ne ch'e nequi'il 'me qaya'te 'loyaĝa'j.

³ Chane'eja, 'noota ta'le auayachiñe queda'me qaya'te yaqanatet ta'le enaac: “¡Yataqachiñe ja no'en ñe'me Jesús!”, qom naqaeñe ñe'me Dios Lepaqal 'me ja 'nalegue yojaĝanaĝan joga'me; nataq'aen qaya'te yaqanatet ta'le enaac: “¡Jesús mach'e Jaliaĝanec!”, qom ja naqaeñe ñe'me Dios Lepaqal jo'ne yojaĝanaĝan joga'me.

⁴ Uo'oe yodapecache gaa'me nañoqotaĝanaĝaco jo'ne qoyanema joga'me p'etaqadaiquipi, qalaĝaja nach'eñeta ñe'me Dios Lepaqal jo'ne chiyoqo'ot.

⁵ Uo'oe gaa'me yodapecache 'netagueco da'me qot'onataĝaneuo'o joñe'me, qalaĝaja nach'eñe ñe'me Jaliaĝanec yanema da'me 'nelopague'j ena'uaque jogaa'me.

⁶ Nataq'aen uo'oe qayoĝode' gaa'me 'netagueco da'me 'nañaĝac, qalaĝaja nach'eñe ñe'me Dios jo'ne t'onataĝanoue ena'uac queda'me 'yonataĝanaĝan yema ga'me p'etaqadaiquipi.

⁷ Ñe'me Dios 'uo ga'me yanema joga'me p'etaqadaiquipi, ga'me jo'ne qoyen di'yoĝoma queda'me eja ue'tena ñe'me Lepaqal, qaedi yelo'teguet da'me ena'uaque qolecochiyalo jogaa'me.

⁸ Uo'oe gaa'me jo'ne qoyanema da'me nayatenaĝanaĝac, nataq'aen uo'oe gaa'me qadaqaya'olqa jo'ne qoyanema da'me natetonaĝanaĝac; qalaĝaja nach'eñe ñe'me Dios Lepaqal jo'ne yanema ena'uaque jogaa'me.

⁹ Uo'oe gaa'me yataqata p'iida'a joñe'me Dios, nataq'aen uo'oe gaa'me qoyanema da'me lañoqotaĝanaĝac da'me e'n yemedegue jogaa'me leuaĝayaqa.

¹⁰ Uo'oe ga'me jo'ne qoyanema da'me lañoqotaĝanaĝa'j qaedi yauote da'me lec'alaqataĝanaĝa'j; laqaya' qoyanema da'me lañoqotaĝanaĝa'j qaedi dapaĝaguenataĝatec da'me 'laqataĝanaĝac ñe'me Dios; uo'oe gaa'me qoyanema da'me lañoqotaĝanaĝa'j qaedi yateto'n jach'e jogamaĝa chiyoĝogue ga'me nepaqa'li 'me ja no'en nataq'aen jach'e jogamaĝa chiyoĝogue ñe'me Dios Lepaqal; uo'oe gaa'me qoyanema da'me lañoqotaĝanaĝa'j qaedi yadenaĝa't gaa'me 'naqataqa laqaya', nataq'aen laqaya' qoyanema da'me lañoqotaĝanaĝa'j qaedi doqotenaĝatec gaa'me 'naqataqa laqaya' jo'ne qonenaĝatedegue.

¹¹ Qalaĝaja nach'eñe ñe'me Dios Lepaqal jo'ne ye't ena'uaque naa'me naajo' uo'oe; onolqa'tape p'etaqadaiquipi nalotapegueta q'aen ga'me yanema.

¹² Da'me qat'oyaĝac ja ch'e jamalegue, qa'a uo'oe qayoĝode' gaa'me qadoĝoje'te, qalaĝaja onolec da'me qat'oyaĝac yemedaye. Nach'e naq'aeta da'me 'loyaĝac ñe'me Cristo jo'ne uetauelo ga'me p'etaqadaiquipi.

¹³ Qa'a joca'li qo'mi qonachilaĝa'n, nach'eñe ñe'me Dios Lepaqal qo'mi 'yeteque da'me ena'am ta'le onolec da'me qat'oyaĝac, joga'me griegopi nach'e ena'am joga'me judiopi, jogaa'me nelataqa nataq'aen jogaa'me yiyamaqachidiñe, qama'le Dios qo'mi ena'uac yecodelo'te nach'eñe ñe'me mach'e Lepaqal.

¹⁴ Da'me qat'oyaĝac ja onolec ga'me qadoĝojet ta'le netaye, dite da'me qayoĝode' gaa'me qadoĝoje'te.

¹⁵ Ta'le qadiche enaac: “Queda'me ja jayem 'te nouaq, ja joqoteguet da'me 'noyaĝac”, chane'eja yejomac: ja naqaeda ta'le male ja yoqoteguet da'me qat'oyaĝac.

¹⁶ Uotaĝa jana'me qadequetela enaac: “Queda'me ja jayem 'te 'naete, qama'le ja jema'aguet ga'me napat”, nach'e ena'am yejomac: qa'a ja naqaeda ta'le male ja yoqota'aguet da'me napachidiyaĝac.

¹⁷ Ta'le yema da'me qat'oyaĝac ena'am ta'le 'naete, ¿qo'li jaqanatetaq da'me 'uo ga'me jomachaĝa? Ta'le yema da'me qat'oyaĝac ena'am ta'le nequetela, ¿qo'li jaqanatetaq ta'le 'uo ga'me jetaqa'aguet?

¹⁸ Qalaĝaja Dios ena'uaque naa'me qadoĝoje'te yana'ñalo ga'me eetapega tayet ta'le na'ña.

¹⁹ Ta'le onolec ga'me qadoĝojet, qaya'te qat'oyaĝac.

²⁰ Eja da'me qayoĝode' gaa'me lael, qalaĝaja da'me qat'oyaĝac qamqa'me onolec.

²¹ Naa'me qat'aete ja yaqanatet ta'le enapega jena'me qadouaq: “Ja am 'te jouetaque”; nataq'aen jena'me qadaqaic ja yaqanatet ta'le enapegalo naa'me qadapia'te: “Ja ami 'te jouetapiye”,

²² qa'a naa'me lael da'me qat'oyaĝac jo'ne jenaqatapegalo ch'e uo'oe, nach'enaua jo'ne yataqachiñe p'ajodaye.

²³ Nataq'aen gaa'me qadoĝoje'te jo'ne jenaqatapega ja yataqachiñe p'ajodaye, nach'enaua jo'ne yataqachiñe qadetelalo, nataq'aen gaa'me qadoĝoje'te jo'ne jenaqatapegalo ja di'yaĝalo, nach'egaua jo'ne ja jalajaĝanaqa'alo da'me japadenaĝalo'te.

²⁴ Je'etaĝaque naa'me jo'ne qadoĝoje'te 'me di'yaĝalo ja youetedaque, qalaĝaja nach'eñe ñe'me Dios jo'ne ye'et ca'li da'me qat'oyaĝac, qaedi gaa'me qadoĝoje'te jo'ne ja di'yaĝalo nach'egaua jo'ne yataqachiñe ji'yoĝodenaqa'tape,

²⁵ qaedi da'me qat'oyaĝac ja mach'e niyaqa'a ga'me qadoĝojet, dite da'me onolqa'tape naa'me qadoĝoje'te da'me qat'oyaĝac necochiyapega't.

²⁶ Qama'le qom onolec qadoĝojet da'me qat'oyaĝac 'uo da'me lachoĝodec, qama'le yemeda gaa'me qadoĝoje'te 'uo da'me lachoĝode'j. Nach'e naq'aeta qom ga'me lae da'me qanejiyaĝauayaĝac qoya'uo li'yoĝodic qama'le yema da'me qat'oyaĝac machiñe q'aen.

²⁷ Chane'eja 'noota, naqa'ami mach'e Cristo 'loyaĝac, nataq'aen onolqa'tape ami ena'am ta'le ademiya'eguet da'me 'loyaĝac ñe'me Cristo.

²⁸ Qama'le Dios yanema onolqa'tape ga'me mach'e 'lonataĝanaĝa'j q'ae'n: 'uaeñe uo'oe gaa'me yanema da'me qaedi namaĝa's, laqaya' yanema da'me qaedi aqataĝanaĝayaqa, laqaya' yanema da'me qaedi paĝaguenataĝanaĝayaqa, laqaya' yanema da'me lañoqotaĝanaĝa'j qaedi yaloĝo'n ga'me ja qoyauanapega, laqaya' yanema da'me lañoqotaĝanaĝa'j qaedi yemedegue q'ae'n joga'me leuaĝayaqa, laqaya' qoyayatenaĝaneque da'me qaedi lecochiyalo jogaa'me jo'ne 'uo da'me louenaĝanaĝa'j, laqaya' qoyanema da'me qaedi dauegaqataĝana'ape, uo'oe gaa'me qoyanema da'me qaedi yadenaĝa't da'me 'naqataqa laqaya'.

²⁹ ¿Qo'li ena'uaque ami namaĝa's? Aja'y. ¿Qo'li ena'uaque ami Dios 'laqataĝanaĝanaqa? Aja'y. ¿Qo'li ena'uaque ami paĝaguenataĝanaĝayaqa? Aja'y. ¿Qo'li ena'uaque ami qoyanema da'me nañoqotaĝanaĝac qaedi auaqanachichi ta'le aualoĝoñi ga'me ja qoyauanapega? Aja'y.

³⁰ ¿Qo'li ena'uaque ami 'uo da'me adañoqotaĝanaĝaqui qaedi yemedegue joga'me leuaĝaiquipi? Aja'y. ¿Qo'li ena'uaque ami auayachiñe ta'le auadenaĝachi joga'me 'naqataqa laqaya'? Aja'y. Qom 'uo ga'me yadenaĝa't naa'me 'naqataqa laqaya', ¿qo'li ena'uaque ami auaqanachichi ta'le auechoĝochi'tape ga'me yelotede'eguet jogaa'me 'naqataqa laqaya'? Aja'y.

³¹ Ami qamqa'me nach'edata da'me aueloyitaque ga'me nañoqotaĝanaĝac jo'ne yataqachiñe p'ajaye. Qalaĝaja jetaque ami japaĝaguetapeque ga'me nadic jo'ne yataqachiñe p'ajaye.