1 Corintios 11 - Nuevo Testamento Toba Sombrero Negro

¹ Oqui'teguelo gaa'me 'yonataqa jo'ne joote ami jaloĝonalo, nach'e naq'aeta da'me jeque'teguelo gaa'me 'lonataqa 'me jayem yaloĝonalo ñe'me Cristo.

Ga'me jetaque qoya'uo nale qoyec'ata joga'me tamenaĝaiqui

² Ami ñetotapeque qa'a nach'e eta't anetoviñetaque yema gaa'me 'yonataqa nataq'aen 'yamaqatenataĝanaĝaco ca'li, nataq'aen yataqachiñe oqui'teguelo daa'me yapaĝaguenataĝanaĝaco jo'ne ami janema.

³ Qalaĝaja nayi jepaquetapega ta'le auayachiñe queda'me nach'eñe joñe'me Cristo mach'e laqai'j ena'uaque ga'me jiyaĝadipi, qama'le nach'e ena'am ñe'me jiyaĝaua mach'e laqaic jaga'me yauo, nataq'aen Dios mach'e laqaic ñe'me Cristo.

⁴ Nataq'aen gamachaqaega jiyaĝaua ya'uo laqailapo' qom netametac uotaĝa qom dapaĝaguenataĝatac, joga'me male ja 'nonaĝachigui ñe'me laqaic jo'ne Cristo.

⁵ Jaga'me yauo qamqa'me qom ja ya'uo ga'me laqailapo' qom netamen uotaĝa qom dapaĝaguenataĝan, jaga'me ja 'nonaĝachigui ga'me loua jo'ne mach'e laqaic, qa'a jaga'me ena'am ta'le nemadelegue ga'me laqaic.

⁶ Qa'a qom 'uo jaga'me yauo jo'ne ja ya'uo 'te laqailapo', 'noota ta'le nach'e ena'am nejotec. Qalaĝaja queda'me yauo nepocoĝolegue da'me nejotec ga'me layoĝot nataq'aen qom nemadelegue ga'me laqaic, qama'le 'noota da'me ch'e ya'uo laqailapo'.

⁷ Joga'me le'em ja qopacague ta'le ya'uo ga'me laqailapo', qa'a ena'am ta'le nach'ega lequi'i ñe'me Dios nataq'aen yaloĝo'n da'me 'lonaĝac joñe'me; gaa'me yauo' qamqa'me yaloĝo'n da'me 'lonaĝa joga'me le'emdipi,

⁸ qa'a ca'li Dios 'uaediñe ye't jogaa'me jiyaĝa'u, ñe'me le'em ja chiyaqayi jaga'me yauo dite da'me 'uaeñe ñe'me Dios ye'et ñe'me le'em qama'le naqat ga'me lichijet ga'me le'em qaedi en chiyaqayi ñe'me le'em jaga'me yauo.

⁹ Nataq'aen ñe'me le'em ja naqaeda ta'le qoye'et joca'li qa'a jouaĝat da'me yauo youetaque ga'me, dite jaga'me yauo qoye'et joca'li qa'a jiyaĝaua youetaque jaga'me.

¹⁰ Chane'eja, gaa'me yauo' 'noota ta'le di'yoq ga'me netayelo naa'me laqai'go nach'ega yaloĝon da'me nach'e ena'am yaqanate't ta'le netame'n nataq'aen dapaĝaguenataĝa'n, jouaĝat gaa'me piyem laje' jo'ne naloqotetedac nale ga'me nemaĝac.

¹¹ Qalaĝaja, nayi da'me male joqotaqa'taguet ñe'me Jaliaĝanec, gaa'me yauo' male yataqachiñe yema'agueta gaa'me jiyaĝa'u nataq'aen gaa'me jiyaĝa'u male yataqachiñe yema'agueta gaa'me yauo',

¹² qa'a mate mane'e jaga'me 'uaeñe yauo qoyachiyoĝotaye ga'me jiyaĝaua ca'li qoye'et, nach'e ena'am onolqa'tape jiyaĝa'u chiyaqayi jaga'me yauo nale niyiñe, nataq'aen ena'uaque jogaa'me chiyoqodayi ñe'me Dios nach'eñe 'lonatac ena'uac.

¹³ Yataqachiñe 'noota ta'le mach'e ami analoqochiñe qom chimaqachiñe da'me ja ya'uo laqailapo' jaga'me yauo qom netamen.

¹⁴ Da'me mach'e loec da'me qanejiyaĝauayaĝac dapaĝaguenataĝanec queda'me qom 'uo ga'me jiyaĝaua jo'ne jalote ga'me layoĝot, joga'me male ja qo'nonaĝachigui;

¹⁵ jaga'me yauo qamqa'me qom jalote ga'me layoĝot, jaga'me qo'nonaĝachigui queda'me Dios yanem ga'me layoĝot jo'ne jalote qaedi yapadelegue ga'me laqaic.

¹⁶ Qalaĝaja gamachaqaega jetaque deloyet da'me dojo', 'noota ta'le yayaten queda'me qo'mi qaya'te laqaya ga'me jo'ne qat'oyaĝac 'me janaqa'ac, uotaĝa ga'me p'etaqadaiquipi jo'ne yema'a't nale jo'ne 'nonaĝachidegue ñe'me Dios.

Joda'me liqui'yaĝac ñe'me Jaliaĝanec ca'li pi'yaq

¹⁷ Ca'li ami japaĝagueneque da'me liqui'yaĝac ñe'me Jaliaĝanec, ja ami 'te ñetotapeque, qa'a nale ademiya'a't, mach'e ami da'me ja 'noota ga'me a'vichiyec, dite da'me a'naĝachela't.

¹⁸ Da'me 'uaeñe jayem qo'yaĝatem queda'me nale ademiya'a't, qama'te mach'e ami ja adaloi'ta't, qama'le jeetapega naq'aeta.

¹⁹ Qa'a Dios ami yaje'tema da'me mach'e ami ja adaloi'ta't qaedi yataqate' di'yoqochiguilo gaa'me jo'ne 'nañaĝatela'ajalo uetedaue da'me yataqatelegue napaĝaguenataĝanaĝac.

²⁰ Chane'eja nale ademiya'a't, ga'me jo'ne aualiqui ja loĝot ñe'me Jaliaĝanec,

²¹ qa'a onolqa'tape yachitac ga'me mach'e jaloq qaedi yalic nale dajoya'agueta jogaa'me laqaya'olqa, qama'te uo'oe gaa'me maliaĝa yoqoua't, laqaya' qamqa'me chayovida'a taĝayaqa nale.

²² Ami uo'oe gaa'me at'achaqachidi', ¿qo'li ja naq'aeta? Chane'eja 'noota da'me aniyomi nataq'aen aueque'eyi nale ovi'talo naa'me at'achaqachidi'. ¿Toqoch'e ja avi'yoĝodeñi gaa'me yema'a't nale nataq'aen auauoyi lachoĝode'j jogaa'me jo'ne qaya'te yauata? ¿Jach'e jogamaĝa 'yaqatac 'me ami janema? ¿Qo'li auepíchitapega ta'le ami ñetotapeque? ¡Ja naq'aeta, ja jiyamaĝaden da'me dojo'!

²³ Jayem qamqa'me jaconeguet ca'li da'me lapaĝaguenataĝanaĝac ñe'me Jaliaĝanec, qama'le ami janema, dojo' jo'ne 'yaĝatetac ñe'me Jaliaĝanec Jesús, ca'li jo'me pi'yaq da'me male qoyaneuo, qama'le yacona jaga'me pan,

²⁴ qama'le ca'li joote yanem lamaic ñe'me Dios, yecolaĝatapiye qama'le enaac: “Jenjo' pan laloĝoqui qoyen jena'me yapat jo'ne taue da'me neleuaĝa, qaedi ena'uaque ami adec'aliyegue. Auauoyi qomle da'me dojo' qaedi nach'e eta't da'me jayem auenachitapega.”

²⁵ Mane'e ca'li joote yali'j ga'me pan, nach'e ena'am yacona jaga'me yomaĝaiqui qama'le enaac: “Janjo' yomaĝaiqui laloĝoqui qoyen jana'me yetauo' jo'ne naliñi qoyen qaedi Dios yadalaĝat da'me 'yamaĝataĝac jo'ne ami yanema. Nale aniyomiyigui janjo' yomaĝaiqui, auauoyi da'me dojo' qaedi nach'e eta't da'me jayem auenachitapega.”

²⁶ Chane'eja, chayovida'a qom 'niyelaq ñe'me Jaliaĝanec, nale yovita da'me jaliguinaq ga'me pan nataq'aen nale ñiyomaĝaye jaga'me yomaĝaiqui, nach'eda ja'aĝataqatac queda'me nach'eñe ñe'me yeleu ca'li qaedi qo'mi nec'alaĝatedegue.

²⁷ Qama'le, qom 'uo gamachaqaega ja yachimaĝachichiñe da'me yalic ga'me pan jo'ne qo'mi yanema ñe'me Jaliaĝanec, uotaĝa nale niyomigui jaga'me yomaĝaiqui, nach'ega jo'ne 'uo da'me naviyaqataguec queda'me ye'uetac ga'me lapat ñe'me Jaliaĝanec nataq'aen jaga'me letauo'.

²⁸ Qo'che' yataqachiñe 'noota ta'le onolqa'tape mach'e naloqote'n gaa'me lai'li, qom joote ya'uo da'me dojo' qama'le yalic ga'me pan nataq'aen niyomigui jaga'me yomaĝaiqui.

²⁹ Qa'a gamachaqaega yalic nataq'aen niyomigui qalaĝaja ja yayaten ga'me yelo'teguet da'me lapat ñe'me Jaliaĝanec, mach'ega nauela't da'me le'uaĝanaĝanaĝac ñe'me Dios.

³⁰ Qo'che' qayoĝode' da'me ami uo'oe ga'me qaya'te 'lañaĝa'j uotaĝa yeleua'ape, nataq'aen uo'oe ga'me jo'ne joote yele'u.

³¹ Qalaĝaja, qom 'uaeñe ñaloqotenaĝala't, qama'le ja qo'mi 'te yedalo'te da'me Dios le'uaĝanaĝanaĝac,

³² mate mane'e ñe'me Jaliaĝanec 'uo ga'me qo'mi ye'uaĝaneque, qama'le qo'mi yapaĝague'n, qaedi ja qo'mi 'te qoyapetenegueta ga'me aleua laje'pi qom qoyegue'm joga'me.

³³ Chane'eja, ami yaqaya'olqa, nale ademiya'a't queda'me aueque'eyi, 'noota ta'le auachitapiye jogaa'me jo'ne maliaĝa ja yovi't.

³⁴ Nataq'aen qom 'uo gamachaqaega jo'ne yataqachiñe yoqouat jo'ne ja yaqanatet ta'le 'uo ga'me yeuatetaque, 'noota qom ua'a ga'me 'lachaqa' da'me 'uo ga'me yalic, qaedi ja ami 'te yedalo'te ga'me ane'uaĝañiyaque qa'a jouaĝat da'me naq'aeta ga'me a'vichiyec ga'me ademaĝaqui. Gaa'me uo'oe laqaya' qamqa'me mach'e je'et qom ami jovida'alo.