1 Corintios 10 - Nuevo Testamento Toba Sombrero Negro

Yataqata 'ñonaĝataĝaye joñe'me Dios

¹ Ami yaqaya'olqa, 'noota qom anetoviñetaque dia'me jachiyojoĝogueta qadapidi jo'ne quetedapegue' ca'li di'me Moisés: ena'uaque jogaa'me dajotedalegue ga'me piyem lo'oc, nataq'aen ena'uaque paidiñgui ga'me noĝop let'a jo'ne lenaĝat da'me Noĝop Tomaĝadaic.

² Chane'eja, ena'uaque jogaa'me yoqoteteda'aguet di'me Moisés qa'a ena'am ta'le chiyaqayi ga'me piyem lo'oc nataq'aen ga'me noĝop let'a da'me qonachilaĝa'n.

³ Choqoda'me ena'uaque nach'ega ga'me niqui'yaĝat yali'j jo'ne ja di'yoq,

⁴ nataq'aen ena'uaque nach'ega niyomidigui ga'me yomaĝat jo'ne ja di'yoq, queda'me qoniyomigui ga'me chiyaqaue ga'me qa' jo'ne ja di'yoq 'me naequetapegue'to, qama'le ga'me qa' nach'eñe Jesucristo.

⁵ Qalaĝaja, qayoĝode' jogaa'me ja 'yamaqate'n ca'li ñe'me Dios, qama'le yele'u ca'li ueteda'a ga'me aleua jo'ne totapega't.

⁶ Naajo' uo'oe jo'ne 'nonataqa joca'li nach'enaua ena'am ta'le 'nanaqa jo'ne qo'mi yapaĝague'n, qaedi ja jepitaqa'a ga'me ja no'en, naq'aeta gaa'me joca'li.

⁷ Ena'te anetameñiyoto gaa'me ch'e nequi'il, joca'li uo'oe gaa'me naq'aete', nach'eda 'yaĝatetedac naa'me nedii's, eet'oi: “Ga'me jiyaĝadipi ñidiñe ca'li qaedi deque'y nataq'aen niyo'm, nataq'aen da'me yem qama'le ñijeguem qaedi deualaĝai'tape jogaa'me.”

⁸ 'Noota qom ja ñemenaĝaue da'me nequejeguetaĝa, qa'a joca'li uo'oe gaa'me naq'aeta da'me yauote, qama'le nach'ega nolo' yele'u veintitrés mil joga'me.

⁹ Yataqachiñe 'noota ta'le ja ch'e japiyenaqatac ñe'me Cristo, qa'a joca'li uo'oe gaa'me naq'aete'; qo'che' nanayaqapi yeto'y, qama'le yele'u jogaa'me.

¹⁰ Nataq'aen 'noota qom gaa'me at'aqataqadi' ja nauteta ñe'me Dios; joga'me joca'li uo'oe gaa'me naq'aete', qo'che' ñe'me Dios namaĝaquena ca'li ñe'me lamaĝajec jo'ne piyem le'ec jo'ne dalataĝanac qaedi nemachichidiñe jogaa'me.

¹¹ Naajo' 'nonataqa jo'ne di'yoĝoma dia'me jachiyojoĝogueta 'me qadapidi nach'enaua ena'am ta'le ch'e 'nanaqa, nataq'aen joote qoyedidiñe ena'am ta'le qo'mi qoyapetena'ata, qo'mi jo'ne jouaqatouelo naajo' p'atedegue noloqo'ote.

¹² Chane'eja, gamachaqaega ga'me eetapela't yataqatelegue, 'noota qom t'oiya'aguet ta'le taue da'me napalaĝac.

¹³ Nataq'aen qom 'uo da'me anapiyenaguequi, anetoviñetac queda'me jiyaĝa'u laqaya' nach'e ena'am joote tadoue ga'me napiyenague'j. 'Noota ta'le auep'iiya'a joñe'me Dios, qa'a ñe'me ja yajeta ta'le ami qo'yiyeneque ga'me jo'ne ja auaqanachichi ta'le anapogaĝadeñiyeguet, dite da'me ami yanema ga'me adadiqui nataq'aen ami yanema da'me at'añaĝaqui qaedi adaloi'taguet.

Ja auaqanachichi ta'le ovi'tajop ñe'me Cristo choqogaa'me payagodipi

¹⁴ Chane'eja, ami yaqaya'olqa, ¡nayi auajoyegue, oquiya'ae da'me anetameñiyoto gaa'me nequi'il!

¹⁵ Ami 'me yatenaĝanaĝayaqolqa, chane'eja mach'e ami analoqochiñe' naa'me 'yaqataqa, qom yataqachiñe ejoda.

¹⁶ Nale qo'nonaĝachigui ga'me niqui'yaĝac 'me ja 'nalegue, qama'le jaconaĝa jaga'me yomaĝaiqui jo'ne chiyaqayi da'me qoyanem da'me qadamaic ñe'me Dios: nale ñiyomaq, qama'le naue da'me qo'mi qoyiuaĝayaĝana't yajouaĝat jaga'me letauo' ñe'me Cristo. Nataq'aen ga'me pan jo'ne qoyecolaĝapiye: nale jaliguinaq, qama'le naue da'me qo'mi qoyiuaĝayaĝana't yajouaĝat ga'me lapat ñe'me Cristo.

¹⁷ Mate mane'e qo'mi qayoĝode', qo'mi ena'am ta'le onolec ga'me qadapat, qa'a onolec ga'me pan 'me jaliguinaq.

¹⁸ Auenachi'talo joga'me Israel c'oqo'tepi jo'ne yali'j ga'me uaca lapat 'me qoyigoue nale, jogaa'me yiuaĝayaĝana't da'me 'nonaĝachidegue ñe'me Dios jo'ne qoyachalegue ga'me c'atoĝonaĝala'.

¹⁹ Chane'eja, ¿jach'e jogamaĝa jen yelo'teguet da'me ñenaĝategue da'me dojo'? Ja ñenaĝategue ta'le naqaegaua p'ajodaye gaa'me ch'e nequi'il, uotaĝa jenaĝa diyachitapiyelo naa'me qadai'li queda'me joote nemenec ga'me lapat da'me qoyanema gaa'me ch'e nequi'il.

²⁰ Ja naq'aeta. Qalaĝaja jenaac queda'me qom gaa'me jo'ne ja p'iida'a ñe'me Dios naa'me yauote ga'me lachitaĝanaĝa't uaca 'me yidoue nale yachedalegue ga'me mach'e lec'atoĝonaĝalaqa'te, ga'me lapat nachitaĝanaĝat ja qoyanem ñe'me Dios dite gaa'me payagodipi.

²¹ Ja auaqanachichi ta'le aniyomiyigui jaga'me niyomaĝaiqui ñe'me Jaliaĝanec nataq'aen ua'edi aniyomiyigui jaga'me niyomaĝaiqui joga'me payagodipi. Nataq'aen ja auaqanachichi ta'le anetauañiya'uo ga'me liqui'yaĝala' ñe'me Jaliaĝanec qama'te ua'edi auajoyiyalegue ga'me liqui'yaĝala't joga'me payagodipi.

²² ¡Yataqachiñe 'noota ta'le ja jenaĝa dalemata ñe'me Jaliaĝanec! ¿Jeele ñapagaqalegue da'me 'lañaĝac joñe'me?

'Noota qom ja naqa'ami ta'le chiyaqayilo da'me lalematai'j joga'me adaqayadi' 'me adepi'iyaĝa'udi'

²³ Eetojo' nale naa'me at'aqataqadi': “Qoyajeta yema ga'me mach'e jetaque jauoqo.” Eja, qalaĝaja ja yema ta'le qo'mi lecochiyalo. Yataqachiñe eja queda'me yema qoyajeta ga'me jo'ne mach'e jetaque jauoqo, qalaĝaja ja yema ta'le naqaeda chiyaqayi da'me nichiquetedajeguem ga'me p'etaqadaiquipi.

²⁴ Yataqachiñe 'noota ta'le qaya'te gamachaqaega yelotaque ga'me mach'e layamaĝac, dite da'me ena'uaque ami aueloyitaque da'me chiyaqayi joda'me liyamaĝa'j jogaa'me adaqayadi'.

²⁵ Aualiqui qomle gamachaqaega ga'me lapat jo'ne qoyemen nale. Ja auoviñetaque ta'le yaloĝoja analoqochiñe uotaĝa diyachitapiyelo naa'me adai'lidi' queda'me ja auayachiñe ga'me chiyoĝogue.

²⁶ Qa'a naq'aeta da'me 'yaĝatetac jogaa'me nedii's, eet'oi: «Nach'eñe ñe'me Jaliaĝanec 'me yema loĝot jena'me aleua Nataq'aen ena'uaque gaa'me jo'ne uedalegue jena'me.»

²⁷ Qom 'uo ga'me ja p'etaqadaic ami nepoda'y qom deque'e, nataq'aen qom auec'achiya, qama'le 'noota qom yema aualiqui ga'me jo'ne ami qoyiqui'yaĝaneque; ena'te analoqochiñe uotaĝa diyachitapiyelo naa'me adai'lidi' qa'a ja auayachiñe ga'me chiyoĝogue.

²⁸ Qalaĝaja, qom 'uo gamachaqaega adaqayai jo'ne ami yechoĝotema: “Jenjo' mach'e uaca lapat jo'ne joote nemenec qaedi qo'nonaĝachiguilo gaa'me ch'e nequi'il”, chane'eja ena'te aualiqui, jouaĝat ga'me adaqayai jo'ne diyachitapiye lauel qa'a yayaten ga'me 'netaguec ga'me lapat.

²⁹ Mate mane'e dojo' ja en 'te diyachitapiyelo naa'me adai'lidi', ga'me qamqa'me ja mayiñe q'aen. Ami ja'aĝatema da'me dojo' qa'a uo'oe gaa'me enapega't nale, dachimaqataĝa'n: “¿Toqoch'e ja jaqanatet ta'le ja'uo ga'me jo'ne jepaquetapega qa'a nach'edata da'me yaqaya yepetapega da'me ja qoyajeta ga'me je'etetac?

³⁰ Qom janem da'me yamaic ñe'me Dios da'me jaloĝolegue ga'me jalic, ¿toqoch'e 'uo ga'me 'ñenaguec jouaĝat da'me janem yamaic ñe'me Dios?”

³¹ Chane'eja, qom 'uo ga'me aualiquitac, uotaĝa 'uo ga'me aniyomiyigui, uotaĝa gamachaqaega a'vichetac, jalcote onaĝaic qom ga'me auauoyi nach'eda chiyaqayi da'me qo'nonaĝachigui ñe'me Dios.

³² Ena'te auauoyi gamachaqaega jo'ne chiyaqayi ta'le dalemata'tape jogaa'me adaqayadi', ga'me judiopi uotaĝa ga'me griegopi, uotaĝa gaa'me mach'e adaqayadi' jo'ne adepi'iyaĝa'udi',

³³ ena'am jayem, jo'ne jepaquetapega ta'le ena'uaque jen made'tape. Ja jelotaque ga'me mach'e yiyamaĝac, dite da'me ena'uaque 'uo da'me liyamaĝa'j qaedi qonec'alaĝatedegue qom'te jogaa'me.