Zekâya 6 - MUKANDA WA MYIDI MUKULU

Maweja-Nangila udi uleja Zekarya malu musangu wa muanda mukulu: matempu a myita anayi

¹ Maweja-Nangila kundeja kabidi bualu bukuabu. Meme kumona matempu a mvita anayi apatukila pankatshi pa mikuna ibidi ya tshiamu tshikunze.

² Ku ditempu dia kumpala bavua basuike tubalu tukunze, ku ditempu dibidi tubalu tufike,

³ ku ditempu disatu, tubalu tutoke, ku ditempu dinayi, tubalu tukunzubile tua matobamatoba.

⁴ Meme kukonka mutumibue wa Mvidi Mukulu uvua uyukila nanyi ne: — Mukalenga, tubalu tudibu basuike ku matempu etu tudi tumvuija tshinyi?

⁵ Kungandamunaye ne: — Matempu aa adi mpepele inayi: ivua mimane muaba udi Maweja-Nangila wa buloba bujima; mmiumuke muaba awu amu mpindiewu.

⁶ Ditempu divuabu bakoka kudi tubalu tufike kuyadi ku luseke lua buloba bua ku mutu. Tubalu tutoke kuyatu ku luseke ludi diba dibuelela. Tubalu tua matobamatoba kuyatu ku buloba bua kuinshi.

⁷ Tubalu bikunzubile tusemena, kulombatu bua kuya kutentekela buloba. Maweja-Nangila kutuambila ne: — Yayi, nutentekele buloba. Kuenzatu nanku.

⁸ Ke Maweja-Nangila kumbikila, ungambila ne: — Tangila! Tubalu tudi tuya ku mutu, netupuekeshishe Mueyelu wanyi mu ditunga edi.

Muambi Zekarya udi wasa Yeshuwa tshifulu tshia lumu

⁹ Maweja-Nangila kungambila ne:

¹⁰ — Angata bintu bia bavua mu bupika, bidibu batuale kudi Eldayi, Tobiya ne Yedaya. Uye lelu ewu kudi Yoziya, muana wa Sefanya. Kuende ke kuvua bantu abu batule, pavuabu bafume ku Babilone.

¹¹ Newangate tshiamu tshitoke tshia mushinga mukole, ne tshiamu tshia mpawungi. Wenze nabi tshifulu tshia lumu, neutshiase mutuangaji munene Yeshuwa, muana wa Yoshadake, ku mutu.

¹² Umuambile ne: Maweja-Nangila wa bukole buonsu udi wamba ne: “Kudi muntu munemu dina diende Lutonga. Nsombelu wa bantu neashintuluke bualu buende. Neibakulule nzubu wanyi wa tshijila.

¹³ Eyo, yeye ke wamuasa tshiakabidi. Neavuale bimanyinu bia bukalenga, neasombe mu nkuasa wa bumfumu bua kulombola bantu. Mutuangaji neikale pabuipi nende. Bantu aba babidi nebumvuangane bikole.

¹⁴ “Tshifulu tshia lumu netshikale mu nzubu wa Mvidi Mukulu, bua bantu bavuluke Eldayi Tobiya ne Yedaya, ne malu mimpe avua muana wa Sefanya muenze.”

¹⁵ Bantu badi kule nebafike bua kuambuluisha badi basa nzubu wa Maweja-Nangila. Nanku nenumanye ne: Maweja-Nangila wa bukole buonsu ke uvua muntume kunudi. Malu onsu aa neenzeke panuikala bitabe muenu muonsu Maweja-Nangila Mvidi Mukulu wenu.