Zekâya 2 - MUKANDA WA MYIDI MUKULU

Maweja-Nangila udi uleja Zekarya malu musangu muibidi: nsengu ne bansenda ba biamu

¹ Maweja-Nangila kundeja kabidi malu makuabu. Meme kumona nsengu inayi.

² Meme kukonka mutumibue wa Mvidi Mukulu uwa uyukila nanyi ne: — Nsengu eyi idi ileja tshinyi? Kungandamunaye ne: — Nsengu eyi idi ileja bisamba bidi ne bukole, bivua bitangalaje bena Yuda, bena Izrayele, ne bena Yerushalayime.

³ Pashishe Maweja-Nangila kundeja bansenda ba biamu banayi.

⁴ Meme kumukonka ne: — Bantu aba mbalue kuenza tshinyi? Kungandamunaye ne: — Mbafike bua kutshibula nsengu ayi; bua kukuatshisha bowa ne kubutula bisamba bia bukole bivua biluisha ditunga dia Yuda, bitangalaja benadi, muntu nansha umue kayi mua kubafuila nkanana.

Maweja-Nangila udi uleja Zekarya malu musangu muisatu: nshinga wa kupima nende bimana

⁵ Maweja-Nangila kundeja bualu bukuabu. Meme kumona muntu muikale ne nshinga wa kupima nende bimana mu bianza.

⁶ Meme kumukonka ne: — Udi uya penyi? Kungandamunaye ne: — Ndi nya kupima bule ne butshiama bua Yerushalayime.

⁷ Mutumibue wa Mvidi Mukulu uvua uyukila nanyi, kuya kudi mutumibue mukuabu uwa ulua kudiye.

⁸ Kuambilaye mutumibue muibidi awu ne: — Uye lubilu kudi nsongalume udi ne nshinga, umuambile ne: kabena mua kunyungulula tshimenga tshia Yerushalayime ne bimana, bualu bantu ne nyama nebikalemu bipite bungi.

⁹ Nenku, Maweja-Nangila udi wamba ne: “Meme mene nengikale mu tshimenga etshi, bu tshimana tshia kapia tshidi tshitshinyungulukila. Nensombemu ne butumbi buanyi buonsu.”

Bena Yerushalayime badi mu bupika nebapingane kuabu

¹⁰ Maweja-Nangila udi unuambila ne: “Nuenu bonsu bamvua mutangalaje nseke yonsu ya buloba, nyemayi mpindiewu, numuke ku matunga a ku mutu kua ditunga!

¹¹ Nuenu bena Yerushalayime badi mu bupika ku Babilone, koleshayi, nunyeme.”

¹² Maweja-Nangila wa bukole buonsu, udi muntume bua kunuambila malu, udi wamba bua bisamba bivua binupawule ne: “Muntu udi unuluisha, udi untua munu mu disu.

¹³ Eyo, nenduishe bisamba ebi: nebabipawule kudi bantu bavuabi bikuate ku bupika.” Padi malu aa enzeka, nenumanye ne: Maweja-Nangila wa bukole buonsu ke uvua muntume.

¹⁴ Maweja-Nangila udi wamba kabidi ne: “Nuenu bena Yerushalayime nusanke bikole, nutue tshianga, nemfike, nensombe munkatshi muenu.

¹⁵ Biangatshile diba adi, bisamba bia bungi nebingitabe meme Maweja-Nangila, nebikale bantu banyi. Kadi muaba ungasomba, ke munkatshi muenu.” Padi malu aa enzeka, nenumanye ne: Maweja-Nangila wa bukole buonsu ke uvua muntume kunudi.

¹⁶ Bena Yuda nebikale tshiakabidi tshisamba menemene tshia Maweja-Nangila mu ditunga didiye mujidile. Yerushalayime neikale tshiakabidi tshimenga tshiende tshidiye musungule.

¹⁷ Bantu bonsu bapuwe kumpala kua Maweja-Nangila, bualu diakamue neapatuke mu nzubu wende wa tshijila!