Zekâya 1 - MUKANDA WA MYIDI MUKULU

MALU AVUA MAWEJA-NANGILA MULEJE ZEKARYA Maweja-Nangila udi ubela bena Izrayele

¹ Mu ngondu wa muanda mukulu wa tshidimu tshibidi tshia bukalenga bua Daryaveshe, Maweja-Nangila kuambila muambi Zekarya, muana wa Berekiya, ne muikulu wa Ido, ne:

² — Ambila bena Izrayele ne: Meme Maweja-Nangila wa bukole buonsu, mvua mufikile bankambua benu munda bikole.

³ Kadi nupingane kundi, meme Maweja-Nangila; nenku nempingane kunudi. Meme ndi nnulaya nanku.

⁴ Kanulondi malu avua bankambua benu benza. Bambi bavua bababela ku kale mu dina dianyi, bua balekele malu abu mabi ne ngenzelu yabu mibi. Kadi kabavua basue kubateleja. Kabavua bitabe.

⁵ Bankambua benu mbamane kufua. Bambi kabidi kabena bashala panu ne muoyi tshiendelele.

⁶ Kadi meyi anyi ne mikenji yanyi bimvua mumanyishe bambi, bena mudimu banyi, bivua bituishe bankambua benu kunyima kua matuku. Bobu kukudimuna nsombelu wabu, kuitaba ne: Maweja-Nangila mmutunyoke, muvuaye muambe. Mmutunyoke kabidi pa bualu, bua malu etu mabi.

Maweja-Nangila udi uleja Zekarya malu musangu wa kumpala: tubalu

⁷ Daryaveshe uvua mumane kushala mu bukalenga bidimu bibidi. Mu matuku makumi abidi ne anayi a ngondu wa dikumi ne umue, udibu binyika ne: ngondu wa Shebate, Maweja-Nangila uvua muleje muambi Zekarya, muana wa Berekiya, ne muikulu wa Ido, malu. Zekarya uvua wamba ne:

⁸ Butuku ebu Maweja-Nangila kundeja muntu mubande pa kabalu kakunze. Muntu awu uvua munkatshi mua mitshi ya mirte, ivua muinshi mu tshibandabanda. Tubalu tukuabu tukunze, tua mubidi wa lubundubundu, ne tutoke, tuvua mu nyima muende.

⁹ Meme kukonka muntu awu ne: — Mukalenga, tubalu etu tudi tuleja tshinyi? Mutumibue wa Mvidi Mukulu uvua uyukila nanyi, kungandamuna ne: — Nenkumvuije

¹⁰ Ke muntu uvua mu mitshi ya mine, kungambila ne: — Maweja-Nangila mmutume bantu aba bua baye kutentekela buloba bujima.

¹¹ Ke bantu bawa babande pa tubalu kuambila mutumibue wa Maweja-Nangila ne: — Tudi bendakane buloba bujima. Katuena basangana bantu balubakana to; bonsu badi basomba talalaa.

¹² Mutumibue wa Mvidi Mukulu kuamba kabidi ne: — Maweja-Nangila wa bukole buonsu, kukadi mpindiewu bidimu makumi muanda mutekete biudi mufikile Yerushalayime ne bimenga bikuabu bia Yuda munda. Neulame tshiji, kuyi ubafuila luse matuku makuabu bungi munyi?

¹³ Ke Maweja-Nangila kuandamuna mutumibue wende miaku mimpe ya kumukolesha ku muoyi, ne kumusamba nayi.

Maweja-Nangila neasungule Yerushalayime tshiakabidi

¹⁴ Mutumibue wa Mvidi Mukulu uwa uyukila nanyi, kungambila ne: Ambila bantu mu dina dia Maweja-Nangila wa bukole buonsu ne: “Ndi munange bikole Yerushalayime, ne mukuna wa Siyone,

¹⁵ Kadi bisamba bidi bisomba talalaa, biditemba, ndi mbifikile munda bikole. Bualu pamvua tshiyi muanji kufikila bena Izrayele munda bikole, biobi bivua bibabutula bibi.

¹⁶ Ke pandi meme Maweja-Nangila wa bukole buonsu ngamba ne: nempingane mu Yerushalayime, bua kumufuila luse, kumunanga. Nebasemu nzubu wanyi tshiakabidi, nebibakulule tshimenga.”

¹⁷ Pashishe mutumibue wa Mvidi Mukulu kungambila ne: Ambila kabidi bantu mu dina dia Maweja-Nangila wa bukole buonsu ne: “Bimenga bianyi nebipete bubanji tshiakabidi. Nensungule Yerushalayime kabidi, nengambuluishe Siyone.”