Yowanane 20 - MUKANDA WA MYIDI MUKULU

Lukita munda mutupu

¹ Dituku dia lumingu patshiatshia, Mariya wa ku Magdala kuya ku lukita, panshi patshivua pafike. Kusanganaye bamane kumusha dibue ku mushiku wa lukita.

² Nanku kupinganaye lubilu kuvua Simone Petro ne mulongi mukuabu uvua Yezu munange. Kubambilaye ne: — Mbapatule Mfumu mu lukita luende. Katuena bamanye muaba udibu bamuteke to.

³ Petro ne mulongi mukuabu awu, kuya batangile ku lukita.

⁴ Bavua banyema lubilu bonsu bubidi buabu, kadi mulongi mukuabu uvua mupite Petro ku lubilu. Nanku kufikaye ku lukita kumpala.

⁵ Kuinangilaye bua kutangila. Kumonaye bilamba bienza ne buanda bua mitshi biteka panshi, kadi kavua mubuele to.

⁶ Pashishe Simone Petro kufika umulonda. Kubuelaye mu lukita. Kumonaye bilamba bienza ne buanda bua ndanda, biteka panshi,

⁷ kabidi ne tshilamba tshivua ku mutu kua Yezu. Tshitambala etshi katshivua pamue ne bilamba bienza ne buanda bua ndanda to, kadi tshivua tshivunga pa nkayatshi pa muaba mukuabu.

⁸ Nanku mulongi mukuabu uvua mudianjile kufika ku lukita, kubuelaye kabidi. Utangila, kuitabaye.

⁹ (Bualu balongi kabavua banji kujingulula miaku ivuabu bafunde mu Mukanda wa tshijila ne: Yezu uvua ne bua kubika ku lufu.)

¹⁰ Pashishe balongi babidi abu kupinganabu kuabu.

Yezu udi umuenekela Mariya wa ku Magdala

¹¹ Mariya uvua muimane ku lukita udila. Pavuaye udila uvua winangila bua kutangila mu lukita.

¹² Kumonaye batumibue babidi ba Mvidi Mukulu bavuale bilamba bitoke, basombe muaba uvua tshitalu tshia Yezu, umue muaba uvua mutu, mukuabu muaba uvua makasa.

¹³ Batumibue ba Mvidi Mukulu kumukonka ne: — Tshiudi udidila ntshinyi? Yeye kubandamuna ne: — Mbapatule Mfumuanyi mu lukita. Tshiena mumanye muaba udibu bamuteke.

¹⁴ Mumane kuamba nanku, kukudimukaye, kumona Yezu muimane muaba awu. Kadi kavua mumanye ne: nYezu to.

¹⁵ Yezu kumukonka ne: — Mukaji, tshiudi udidila ntshinyi? Uudi ukeba nnganyi? Mariya uvua muele meji ne: mmuena mudimu wa mu lupangu alu. Ke kumuambaye ne: — Ne ngwewe udi mumumbushe, ungambile kuudi mumuteke, nye kumuangata kabidi.

¹⁶ Yezu kumuela diyi ne: — Mariya! Mariya kukudimuka kudiye, umuamba mu buena ebrewu ne: — Rabuni! (mmomumue ne: “Mulongeshi.”)

¹⁷ Yezu kumuamba ne: — Kundami to, bualu tshiena muanji kubanda kudi Tatu. Kadi uye kudi bana betu, ubambile ne: Ndi mbanda kudi Tatu wanyi, udi Tatu wenu kabidi, kudi Mvidi Mukulu wanyi, udi Mvidi Mukulu wenu kabidi.

¹⁸ Nanku Mariya wa ku Magdala kuyaye kumanyisha balongi ba Yezu ne: — Ndi mumone Mfumu! Kubalondelaye bivua Yezu mumuambile.

Yezu udi umuenekela balongi bende

¹⁹ Dilolu mene dia dituku dia lumingu adi, balongi bavua badisangishe mu nzubu, binjile biibi bakanga ne nsapi, bualu bavua batshina bamfumu ba bena Yuda. Ke Yezu kufika, kuimana munkatshi muabu ubela muoyi ne: — Bupole buikale nenu!

²⁰ Yeye mumane kubambila nanku, kubalejaye bianza biende ne lubadi luende. Balongi kusanka bikole pamonubu Mfumu.

²¹ Yezu kubela muoyi tshiakabidi ne: — Bupole buikale nenu. Mudi Tatu muntume, meme kabidi ndi nnutuma.

²² Mumane kuamba nanku, kubelaye mupuya, ubambila ne: — Angatayi Mueyelu wa Tshijila!

²³ Bantu banudi nujimijila mibi yabu, mibi yabu neyijimine; banudi nubenga kujimijila mibi yabu, kayena ijimina.

Yezu ne Tomase

²⁴ Kadi Tomase, umue wa ku balongi dikumi ne babidi ba Yezu, (uvuabu binyika kabidi ne: wa Dipasa), kavua pamue nabu diba divua Yezu mufike.

²⁵ Balongi bakuabu kumuambila ne: — Tuvua bamone Mfumu. Kadi Tomase kubandamuna ne: — Pandi tshiyi mumone bibangu bia misumadi mu bianza biende, tshiyi mulenge ne minu muaba uvua misumadi, tshiyi mubueje tshianza tshianyi mu lubadi luende, tshiena mua kuitaba to.

²⁶ Lumingu kupita, balongi ba Yezu bavua badisangishe mu nzubu tshiakabidi. Tomase uvua nabu. Biibi bivua bikanga ne nsapi. Kadi Yezu kufika, kuimana munkatshi muabu, ubela muoyi ne: — Bupole buikale nenu!

²⁷ Pashishe kuambilaye Tomase ne: — Teka munu webe apa. Tangila bianza bianyi. Tuma tshianza tshiebe, utshibueje mu lubadi luanyi. Lekela kuela mpata, itaba!

²⁸ Tomase kumuandamuna ne: — Mfumu wanyi ne Mvidi Mukulu wanyi!

²⁹ Yezu kumuambila ne: — Udi witaba bua paudi mummone. Bantu badi bangitaba kabayi bammone ke bena diakalenga.

Kafundila ka mukanda ewu

³⁰ Yezu uvua muenze kabidi ku mesu kua balongi bende, bishima bikuabu bia bungi bidibu kabayi bafunde mu mukanda ewu to.

³¹ Kadi bidibu bafundamu mbabifunde bua nuitabe ne: Yezu udi Meshiya, Muana wa Mvidi Mukulu. Kabidi panudi numuitaba, nenupete muoyi kudiye.