Yowanane 19 - MUKANDA WA MYIDI MUKULU

¹ Pashishe Pilate kutuma diyi bua bangate Yezu, bamutuute mikaba.

² Basolayi kuluka tshikata tshia meba, kutshiasa Yezu ku mutu. Kumuvuadikabu kabidi tshinkutu tshikunze.

³ Kutantshilabu kudiye, bamuamba ne: — Muoyi, mukalenga wa bena Yuda! Bavua bamutapa kabidi mapi.

⁴ Pilate kupatuka tshiakabidi, kuambila bantu ne: — Telejayi. Ndi nnupatuila muntu ewu pambelu, bua numanye ne: tshiena musangane bualu nansha bumue bundi mua kufundila muntu ewu tshibawu.

⁵ Nanku Yezu kupatuka pambelu, muwule tshikata tshia meba ku mutu, kabidi ne tshinkutu tshikunze pambidi. Ke Pilate kubambila ne: — Ke muntu wenu ewu!

⁶ Kadi bamfumu ba batuangaji ne balami bamumona, kuelabu mbila ne: — Umupopele ku mutshi mutshiamakane! Umupopele ku mutshi mutshiamakane! Pilate kubambila ne: — Muangatayi nuenu nkayenu, numupopele ku mutshi mutshiamakane. Bualu meme tshiena musangane bualu nansha bumue bundi mua kumufundila tshibawu.

⁷ Bena Yuda kumuandamuna ne: — Tudi ne mikenji, bilondeshile mikenji eyi, muntu ewu udi ne bua kufua. Bualu uvua muambe ne: ndi Muana wa Mvidi Mukulu.

⁸ Pilate umvua nanku, bowa bupite bukole kumukuata.

⁹ Kupinganaye mu nzubu wa bukalenga, bua kuebeja Yezu ne: — Udi mufume penyi? Kadi Yezu kavua muandamune to.

¹⁰ Ke Pilate kumuamba ne: — Udi ubenga kungandamuna anyi? Kuena mumanye ne: ndi ne bumfumu bua kukulekesha mu lukanu, nansha bua kukupopeshisha ku mutshi mutshiamakane anyi?

¹¹ Yezu kumuandamuna ne: — Kuena ne bumfumu nansha bumue pambidi panyi, pa kumusha buvua Mvidi Mukulu mukupeshe. Nanku muntu uvua mmufile kuudi, udi ne tshibawu tshipite tshiebe.

¹² Biangatshile diba adi, Pilate uvua ukeba mushindu wa kutekesha Yezu. Kadi bena Yuda kubanga kuela mbila ne: — Wewe mukopole muntu ewu mu lukanu, kuena mulunda wa mukalenga wa bakalenga to. Muntu yonsu udi udifunyisha ne: ndi mukalenga, mmuluishi wa mukalenga wa bakalenga.

¹³ Pilate umvua nanku, kupatulaye Yezu pambelu. Kusombaye mu nkuasa wa bundumbulula, muaba uvuabu binyika ne: “Muaba mulamika mabue.” (Mu buena ebrewu badi bawinyika ne: “Ngabata”).

¹⁴ Dituku adi divua dia muladilu wa tshibilu tshia Dipita dia Maweja-Nangila, bu ku munda munya. Pilate kuambila bena Yuda ne: — Ke mukalenga wenu awu!

¹⁵ Bobu kuela mbila ne: — Afue! Afue! Umupopele ku mutshi mutshiamakane! Pilate kubakonka ne: — Ndi ne bua kupopela mukalenga wenu ku mutshi mutshiamakane anyi? Bamfumu ba batuangaji kuandamuna ne: — Katuena ne munga mukalenga to, amu mukalenga wa bakalenga.

¹⁶ Nanku Pilate kufila Yezu bua bamupopele ku mutshi mutshiamakane. Nanku kukuatabu Yezu.

Badi bapopela Yezu ku mutshi mutshiamakane

¹⁷ Yezu kupatuka mu tshimenga mudiambuile mutshi mutshiamakane wende, bua kuya muaba udibu binyika ne: “Muaba wa Kabalubalu ka mutu” (mu buena ebrewu badi bawinyika ne: “Ngolgota.”)

¹⁸ Bamane kufika muaba awu, basolayi kupopela Yezu ku mutshi mutshiamakane. Musangu umue, bavua bapopela kabidi bantu balume bakuabu babidi pa mitshi mitshiamakane, muntu ku luseke, muntu ku luseke, Yezu munkatshi.

¹⁹ Pilate kufundisha kabidi miaku pa kabaya, bua bakapopele ku mutu kua mutshi mutshiamakane. Bavua bafunde pa kabaya aku ne: “Yezu wa mu Nazarete, mukalenga wa bena Yuda.”

²⁰ Bena Yuda ba bungi bavua babala miaku ayi, bualu muaba uvuabu bapopela Yezu ku mutshi mutshiamakane uvua pabuipi ne tshimenga. Kabidi miaku eyi bavua bayifunde mu buena ebrewu, mu buena latine, kabidi ne mu buena ngreke.

²¹ Ke bamfumu ba batuangaji ba bena Yuda kuambila Pilate ne: — Kuvua mua kufundisha ne: “Mukalenga wa bena Yuda”. Kadi ufundishe ne: “Muntu ewu uvua wamba ne: Ndi mukalenga wa bena Yuda.”

²² Pilate kuandamuna ne: — Tshindi mumane kufunda tshishale amu muditshi amu.

²³ Basolayi bamane kupopela Yezu ku mutshi mutshiamakane, kuangatabu bilamba biende. Kubitapululabu mu bitupa binayi, bua musolayi angate tshiende, musolayi tshiende. Kuangatabu kabidi muntumpu wende uvua kauyi ne mutelu, baukume nanku mujima kulu too ne panshi.

²⁴ Basolayi kuambilangana ne: — Katupandi muntumpu ewu to. Kadi tutshinke bua kumanya ne: udi mua kuwangata nnganyi? Ebi bivua bienzeka bua kukumbaja miaku ivuabu bafunde mu Mukanda wa tshijila ne: “Bavua babanyangana bilamba bianyi, batshinka uvua mua kuangata tshilamba tshianyi.” Ke muvua basolayi benza nanku.

²⁵ Pabuipi ne mutshi mutshiamakane wa Yezu, bavua bimanepu kudi mamuende, kudi mukaji muanabu ne mamuende, kudi Mariya muena kua Klopase, ne kudi Mariya wa ku tshimenga tshia Magdala.

²⁶ Yezu kumona mamuende ne mulongi uvuaye munange uvua pabuipi nende. Kuambilaye mamuende ne: — Mamu, ke muanebe awu.

²⁷ Pashishe kuambilaye mulongi awu ne: — Ke mamuebe awu. Biangatshile musangu awu, mulongi kumuangata bua kuya nende kuende.

Yezu udi ufua

²⁸ Malu aa mamane kupita, bu muvua Yezu mumanye ne: mpindiewu bionsu mbimane kukumbana, bua kukumbaja miaku ivuabu bafunde mu Mukanda wa tshijila kuambaye ne: — Ndi ne nyota.

²⁹ Muaba awu uvua luesu luwule ne maluvu a buanji tente. Basolayi kutua musukula mpampa mu maluvu awu, kuusuika ku lusokolu lua mutshi wa isope bua kuufikisha ku mishiku ya Yezu.

³⁰ Yezu mumane kunua maluvu awu, kuambaye ne: — Bionsu mbimane kukumbana! Pashishe kuinyikaye mutu, kukula muoyi.

Musolayi udi utubula lubadi lua Yezu

³¹ Dituku adi divua dia ditanu. Bena Yuda kabavua basue bua bitalu bishale pa mitshi mitshiamakane too ne dituku diabu dia Dikisha. Bualu dituku dia Dikisha adi divua dinene. Kulombabu Pilate bua kutshibulabu mikolu ya bavuabu bele ku mitshi mitshiamakane, ne bua kumusha bitalu ku mitshi.

³² Nanku basolayi kufika, kutshibula mikolu ya muntu wa kumpala, pashishe ne ya muibidi uvuabu bapopele ku mitshi mitshiamakane musangu umue ne Yezu.

³³ Padibu bafika kudi Yezu, badi bamusangana mumane kufua. Nanku ki mbamutshibule mikolu to.

³⁴ Kadi umue wa ku basolayi kumutua difuma diende mu lubadi. Mashi ne mayi kupatukamu diakamue.

³⁵ Muntu uvua muambe malu aa ke uvua muamone. Bidiye wamba bidi bilelela. Yeye kabidi udi mumanye ne: ndi ngamba malu malelela, bua nuenu kabidi nuitabe.

³⁶ Bivua bienzeka nanku bua miaku ikumbane ivuabu bafunde mu Mukanda wa tshijila ne: “Kabena mua kutshibula mufuba wende nansha umue.”

³⁷ Mbafunde kabidi miaku mikuabu mu Mukanda wa tshijila ne: “Bantu nebatangile uvuabu batubule.”

Badi bajika Yezu

³⁸ Pashishe, Yozefe muena mu tshimenga tshia Arimateya kulomba Pilate dianyisha dia kuangata tshitalu tshia Yezu. (Yozefe ewu uvua mulongi wa Yezu, kadi mu musokoku, bualu uvua utshina bamfumu ba bena Yuda.) Ke Pilate kuanyisha dilomba adi. Nanku Yozefe kuya kuangata tshitalu tshia Yezu.

³⁹ Nikodemu, muntu uvua muye kudi Yezu musangu umue butuku, kufika kabidi ne manananshi a mire ne a alowe, bisambakaja, bia kilo bu makumi asatu.

⁴⁰ Bubidi buabu kuangatabu tshitalu tshia Yezu, kutshijingilabu bilamba bienza ne buanda bua mitshi. Kutshielabu mafuta a manananshi bilondeshile muvua tshibidilu tshia bena Yuda padibu bajika muntu kampanda mufue.

⁴¹ Muaba uvuabu bapopele Yezu ku mutshi mutshiamakane awu, uvua lupangu. Mu lupangu amu muvua lukita lupialupia, luvuabu kabayi banji kujika muntu to.

⁴² Bu muvua dituku adi dia muladilu wa dituku dia Dikisha dia bena Yuda, kabidi muvua lukita pabuipi, ke kujikabu Yezu muaba awu.