Yowanane 18 - MUKANDA WA MYIDI MUKULU

Badi bakuata Yezu

¹ Yezu mumane kulomba Mvidi Mukulu nanku, kumukaye ne balongi bende, kuyaye dishiya dia musulu wa Kedrone. Muaba awu uvua lupangu, yeye kubuelamu ne balongi bende.

² Yudase mumutungidi wa tshitungu uvua mumanye kabidi muaba awu. Bualu Yezu ne balongi bende bavua bafikemu pamue misangu mivule.

³ Yudase kuya mu lupangu alu ne tshisumbu tshia basolayi, kabidi ne tshia balami ba mu nzubu wa Mvidi Mukulu bavua bamfumu ba batuangaji ne Baparushe batume. Bantu abu bavua ne bia myita, bikale kabidi ne bimunyi bia kapia.

⁴ Yezu uvua mumanye bionsu bivua ne bua kumuenzekela. Ke kusemenaye kuvuabu, kubebeja ne: — Unudi nukeba nnganyi?

⁵ Bobu kumuandamuna ne: — Yezu wa mu Nazarete. Yezu kubambila ne: — Ke meme ewu. Yudase mumutungidi wa tshitungu uvua muimane pamue nabu.

⁶ Yezu ubambila ne: “Ke meme ewu,” kupinganabu tshianyima, kudishinda panshi.

⁷ Ke Yezu kubakonka tshiakabidi ne: — Unudi nukeba nnganyi? Kuambabu ne: — Yezu wa mu Nazarete.

⁸ Yezu kubandamuna ne: — Ndi mumane kunuambila ne: ke meme ewu. Nanku panuikala nunkeba meme, nulekele bantu bakuabu aba baye.

⁹ Ke muvuaye ne bua kukumbaja miaku ivuaye mumane kuamba ne: “Tatu, tshiena mujimije muntu nansha umue wa ku bauvua mumpeshe.”

¹⁰ Simone Petro uvua ne muele wa myita. Kuupatulaye, kutapaye muena mudimu wa mutuangaji munene, kumukosa ditshi dia lua balume. (Muena mudimu awu, dina diende mMalkuse.)

¹¹ Kadi Yezu kuambila Petro ne: — Pingaja muele webe mu tshibuubu. Udi wela meji ne: ndi mbenga kunua dikopu dia dikenga didi Tatu mumpeshe anyi?

Badi baya ne Yezu kua Anase

¹² Diba adi tshisumbu tshia basolayi, mulombodi wabu, kabidi ne balami ba bena Yuda kukuatabu Yezu, kumusuika mionji.

¹³ Kuyabu nende bangabanga kua Anase. Anase uvua tatuende muenu wa Kayifa, uvua mutuangaji munene tshidimu atshi.

¹⁴ Kayifa awu ke uvua muambile bamfumu ba bena Yuda ne: “Mbimpe bua muntu umue afuile bantu bonsu.”

Petro udi uvila Yezu

¹⁵ Simone Petro ne mulongi mukuabu bavua balonda Yezu. Mulongi awu bavua bamumanye kudi mutuangaji munene. Nanku kubuelaye diakamue pamue ne Yezu mu lubanza lua munda mua nzubu wa mutuangaji munene.

¹⁶ Kadi Petro uvua mushadile pambelu pabuipi ne tshiibi. Ke mulongi awu uvuabu bamanye kudi mutuangaji munene, kupatuka bua kuyukila ne mukaji uvua ulama ku tshiibi. Pashishe kubuejaye Petro.

¹⁷ Mukaji mulami wa tshiibi kukonka Petro ne: — Wewe kabidi, kuena wa ku balongi ba muntu ewu anyi? Petro kuandamuna ne: — Tshiena wa ku balongi bende nansha.

¹⁸ Kuvua mashika. Nanku bena mudimu ne balami bavua batemesha kapia, bela tshitangu bota. Petro kabidi uvua muimane pamue nabu, wota kapia.

Mutuangaji munene udi ulumbuluisha Yezu (Mat 26.59-66; Mar 14.55-64; Luk 22.66-71)

¹⁹ Diba adi mutuangaji munene kulumbuluisha Yezu bua balongi bende ne bua dilongesha divuaye ulongesha.

²⁰ Yezu kumuandamuna ne: — Mvua muambile bantu bonsu malu amu patoke. Mvua mulongeshe misangu mivule mu nzubu ya kutendelela ya bena Yuda, ne mu nzubu wa Mvidi Mukulu, muaba udi bena Yuda bonsu basangila. Tshivua muakule bualu nansha bumue mu musokoku.

²¹ Udi ungela nkonku bua tshinyi? Ebeja bavua bumvue bimvua mubalongeshe. Bobu mbamanye bimpe bimvua mubambile.

²² Yezu wamba nanku, umue wa ku balami, uvua muimane pabuipi nende, kumutapaye dipi, wamba ne: — Ke muudi wandamuna mutuangaji munene anyi?

²³ Yezu kumuandamuna ne: — Pangikala muambe bibi, utuleje mumvua muambe bibi. Kadi pangikala muambe bimpe, tshiudi untutshila ntshinyi?

²⁴ Ke Anase kumutuma amu musuika mionji kua Kayifa, mutuangaji munene.

Petro udi uvila Yezu tshiakabidi

²⁵ Diba adi Simone Petro utshivua wota amu kapia. Kumukonkabu ne: — Wewe kabidi, kuena umue wa ku balongi ba muntu ewu anyi? Kadi Petro kuyila, wamba ne: — To, tshiena wa ku balongi bende nansha.

²⁶ Umue wa ku bena mudimu ba mutuangaji munene, muanabu ne muntu uvua Petro mukose ditshi, kumuamba ne: — Tshivua mukumone nende mu lupangu anyi?

²⁷ Kadi Petro kuyila tshiakabidi. Diakamue tshitala kusama.

Yezu kua Pilate

²⁸ Pashishe kumukabu ne Yezu kua Kayifa, kuyabu nende ku nzubu wa bukalenga wa mulombodi wa ditunga. Bivua dinda dinda. Kadi bamfumu ba bena Yuda kabavua babuela mu nzubu wa bukalenga, bua kabapi mikiya, kadi bapange mua kudia didia dia tshibilu tshia Dipita dia Maweja-Nangila.

²⁹ Ke pavua Pilate, mulombodi wa ditunga mupatukile pa mbelu, muye kudibu. Kubakonkaye ne: — Tshilumbu tshinudi nuasa muntu ewu ntshilumbu kaayi?

³⁰ Kumuandamunabu ne: — Bu yeye kayi muenzayi, katuvua mu kumufila kuudi to.

³¹ Pilate kubambila ne: — Muangatayi amu nuenu, numulumbuluishe bilondeshile mikenji yenu. Kuandamunabu ne: — Tuetu katuena ne bumfumu bua kushipa muntu to.

³² Ke muvua Yezu mukumbaje diyi divuaye muambe, divua dileja bantu mushindu uvuaye ne bua kufua.

³³ Pilate kupingana mu nzubu wa bukalenga. Kubikilaye Yezu, umukonka ne: — Udi mukalenga wa bena Yuda anyi?

³⁴ Yezu kumuandamuna ne: — Udi ungela lukonku elu ku lungenyi luebe, peshi bantu bakuabu mbakuambile malu anyi?

³⁵ Pilate kuandamuna ne: — Meme ndi muena Yuda anyi? Bena tshisamba tshienu ne bamfumu ba batuangaji mbakufile kundi. Tshiudi muenze ntshinyi?

³⁶ Yezu kuandamuna ne: — Bukalenga buanyi ki mbua pa buloba to. Bu bukalenga buanyi buikale bua pa buloba, bantu banyi bavua mua kuluangana myita bua kabamfidi mu bianza bia bamfumu ba bena Yuda. Kadi bukalenga buanyi ki mbua pa buloba to.

³⁷ Ke Pilate kumukonka ne: — Nanku udi mukalenga anyi? Yezu kumuandamuna ne: — Anu muudi muambe amu: Ndi mukalenga. Meme tshidibu bandelele, kabidi tshindi mufikile panu apa, mbua kujadika malu malelela. Muntu yonsu udi munangi wa bulelela udi uteleja bindi ngamba.

³⁸ Pilate kumukonka ne: — Bulelela ntshinyi? Pilate mumane kuamba nanku, kupatukaye tshiakabidi pambelu. Kuyaye kudi bena Yuda, ubambila ne: — Tshiena musangane bualu nansha bumue bundi mua kufundila muntu ewu tshibawu to.

Badi bafundila Yezu tshibawu tshia lufu

³⁹ Kadi bilondeshile tshibidilu tshienu, ndi nnukopuela misangu yonsu muena lukanu umue bua tshibilu tshia Dipita dia Maweja-Nangila. Nudi basue nnukopuele mu nzubu wa lukanu mukalenga wa bena Yuda anyi?

⁴⁰ Kumuandamunabu, bela mbila ne: — Awu to! Tudi basue amu Barabase! Kadi Barabase awu uvua mushipianganyi.