Yowanane 16 - MUKANDA WA MYIDI MUKULU

¹ Ndi nnuambila malu aa, bua kanutedi ditaba dienu to.

² Nebanuipate mu nzubu ya kutendelela ya bena Yuda. Kabidi tshikondu netshifike tshikata bantu badi banushipa bela meji ne: tudi tukuatshila Mvidi Mukulu mudimu.

³ Nebanuenze nanku, bualu kabavua bamanye Tatu, nansha meme.

⁴ Kadi ndi nnuambila malu aa bua padi tshikondu tshifika tshidibu benza nanku, mwuluke ne: mvua mumane kunuambila. — Tshivua munuambile malu aa ku tshibangidilu, bualu ntshivua nenu.

Mudimu wa Mueyelu wa Tshijila

⁵ Mpindiewu nkadi mpingana kudi uvua muntume. Muntu wa kunudi nansha umue kena unkonka ne: “Uyaya penyi?”

⁶ Kadi mioyi yenu mmiuwule ne dibungama, bualu ndi munuambile malu aa.

⁷ Kadi ndi nnujadikila ne: buenu nuenu bidi bimpe nye. Bualu meme tshiyi muye, udi mua kunuambuluisha kena ufika kunudi to. Kadi meme muye, nennutumineye.

⁸ Padiye ufika, nealeje ba pa buloba mudibu batupakana bua malu mabi, bua malu mimpe, ne bua mushindu udi Mvidi Mukulu ukosa nsambu pa yoyi.

⁹ Badi batupakana bua malu mabi, bualu kabena bangitaba.

¹⁰ Badi batupakana bua malu mimpe, bualu nyaya kudi Tatu, kabidi kanuakummona kabidi.

¹¹ Badi batupakana bua mushindu udi Mvidi Mukulu ukosa nsambu, bualu mfumu wa bena panu bakadi bamane kumulumbuluisha.

¹² Ntshidi ne malu a bungi a kunuambila. Kadi kanuena mua kuajingulula mpindiewu.

¹³ Padi Mueyelu wa bulelela ufika, neunulombole mu malu malelela onsu. Kawena wamba malu ne bumfumu buawu nkayawu to. Kadi neunuambile bionsu bivuawu mumvue. Neunumanyishe bidi ne bua kuenzeka.

¹⁴ Neuntumbishe, bualu neupete bidi kundi bua kunumanyishabi.

¹⁵ Bionsu bidi Tatu nabi, bidi kabidi bianyi. Ke pamvua munuambile ne: Mueyelu neupete bidi kundi meme bua kunumanyishabi.

Dibungama nediandamuke disanka

¹⁶ — Kunyima kua katupa kanuakummona to. Pashishe kunyima kua katupa nenummone kabidi.

¹⁷ Nanku bamue balongi bende kuebejanganabu ne: — Mmusue kuamba tshinyi? Udi wamba ne: “Kunyima kua katupa, kanuakummona kabidi, pashishe kunyima kua katupa nenummone kabidi,” wamba kabidi ne: “Bualu ndi nya kudi Tatu.”

¹⁸ Padiye wamba ne: “Kunyima kua katupa,” tshidiye musue kumvuija ntshinyi? Katuena lujingulula tshidiye musue kuamba to.

¹⁹ Yezu uvua mumanye ne: badi bajinga kunkonka . Ke kubebejaye ne: — Mvua munuambile ne: “Kunyima kua katupa kanuakummona kabidi, pashishe kunyima kua katupa nenummone.” Ke bualu bunudi nuebejangana anyi?

²⁰ Ndi nnujadikila ne: nenudile, nuele miyenga, kadi ba pa buloba nebasanke. Nenubungame. Kadi dibungama dienu nediandamuke disanka.

²¹ Padi mukaji wamba kulela, udi ne dibungama, bualu tshikondu tshiende tshia dikenga ntshifike. Kadi padiye ulela muana, kena uvuluka kabidi dikenga divuaye nadi to. Bualu udi ne disanka dia muntu udiye mufikishe panu.

²² Ke munudi nubungama nuenu kabidi mpindiewu. Kadi nennumone tshiakabidi. Muoyi wenu neusanke. Kakuakuila muntu nansha umue udi mua kununyenga disanka dienu.

²³ Pafika dituku adi, kanuakunkonka kabidi bualu to. Ndi nnujadikila ne: Tatu neanupeshe tshionsu tshinuamulomba mu dina dianyi.

²⁴ Too ne mpindiewu kanuena banji kulomba tshintu mu dina dianyi. Lombayi, nenupete, bua disanka dienu dikale dijima.

Yezu mmutshimune ba pa buloba

²⁵ — Mvua munuambile bionsu ebi mu nsumuinu. Tshikondu netshifike tshingikala tshiyi ngakula nenu kabidi mu nsumuinu, kadi nennujikuile patoke malu onsu a Tatu.

²⁶ Pafika dituku adi, nenulombe Tatu mu dina dianyi. Tshiena nnuambila ne: nennulombele kudi Tatu to.

²⁷ Bualu Tatu yeye nkayende udi mununange. Udi mununange, bualu nudi bannange, bitabe kabidi ne: ndi mufume kudi Mvidi Mukulu.

²⁸ Ndi mufume kudi Tatu, mufike pa buloba. Mpindiewu ndi ngumuka pa buloba, mpingana kudi Tatu.

²⁹ Ke balongi bende kumuamba ne: — Mpindiewu udi wamba malu patoke, kuyi wamba kabidi mu nsumuinu to.

³⁰ Tudi bamanye mpindiewu ne: udi mujingulule malu onsu. Kuena ukengela bua bakuebeje bualu to. Ke patudi tuitaba ne: udi mufume kudi Mvidi Mukulu.

³¹ Yezu kubandamuna ne: — Mpindiewu nudi nuitaba anyi?

³² Kadi tshikondu netshifike, — ntshimane kufika mene — tshianutangalajabu bonsu buenu, muntu yonsu ku nzubu kuende. Nenunshiye nkayanyi. Kadi tshiena nkayanyi to, bualu Tatu udi nanyi.

³³ Mvua munuambile bionsu ebi bua nuikale ne ditalala, badisange nanyi. Nenukenge pa buloba. Kadi nukoleshe muoyi! Nkadi mumane kutshimuna ba pa buloba!