Yowanane 15 - MUKANDA WA MYIDI MUKULU

Yezu, udi mutshi wa nwinyo menemene

¹ — Meme ndi mutshi wa nwinyo menemene. Tatu wanyi ke muena budimi bua nwinyo ebu.

² Udi ukosa katamba kuonsu kadi kundi, kadi kakayi kakuama bimuma; udi upempa, ulengeja katamba kuonsu kadi kakuama bimuma bua kakuame bivule.

³ Dilongesha dindi munulongeshe, dikadi dimane kunulengeja.

⁴ Shalayi badisange nanyi, bu mundi mumane kudisanga nenu. Katamba pa nkayaku kakena mua kudikuamina tumuma, padiku kakayi ku mutshi. Ke munudi kanuyi mua kukuama bimuma, panudi kanuyi nushala badisange nanyi.

⁵ Ndi mutshi wa nwinyo. Nuenu nudi matamba. Muntu udi ushala mudisange nanyi, kabidi undi ndisanga nende, neakuame bimuma bia bungi. Bualu nuenu kanuyi nanyi, kanuena mua kuenza bualu nansha bumue.

⁶ Muntu udi kayi ushala mudisange nanyi, nebamuimanshe pa mbelu bu ditamba. Neume. Matamba mume badi baangula, baela muiku, baosha.

⁷ Panudi bashale munda muanyi, kabidi miaku yanyi mishale munda muenu, lombayi binudi basue, nenubipete.

⁸ Butumbi bua Tatu wanyi budi bumueneka, panudi nukuama bimuma bivule, kabidi nudileja nanku munudi balongi banyi.

⁹ Ndi mununange mudi Tatu munnange. Shalayi mu dinanga dianyi dindi mununange nadi.

¹⁰ Panudi nutumikila mikenji yanyi, nenushale mu dinanga dianyi, mumvua mutumikile mikenji ya Tatu, nshala mu dinanga diende.

¹¹ Mvua munuambile nanku bua disanka dianyi dikale munda muenu; kabidi bua disanka dienu dikale dijima.

¹² Telejayi mudi mukenji wanyi: nunangangane mundi munanga.

¹³ Dinanga dipite bunene didi muntu mua kuleja ndia kufila muoyi wende bua balunda bende.

¹⁴ Nudi balunda banyi, panudi nuenza mundi munuelele mukenji.

¹⁵ Tshiena nnubikila kabidi bena mudimu. Bualu muena mudimu kena mumanye tshidi mfumuende wenza. Ndi nnubikila balunda. Bualu mvua munumanyishe bionsu bimvua mumvue kudi Tatu wanyi.

¹⁶ Nuenu kanuvua bansungule, kadi meme mvua munusungule, munutumine diyi bua nuye kukuama bimuma, bimuma bidi bishala kashidi. Nenku Tatu neanupeshe tshionsu tshinuamulomba mu dina dianyi.

¹⁷ Nanku mukenji undi nnuela udi ne: nunangangane.

Ba pa buloba badi bakina Yezu ne bena diende

¹⁸ Padi ba pa buloba banukina, mimanye ne: bavua badianjila kunkina meme kumpala kuenu.

¹⁹ Bu nuenu bikale ba pa buloba, ba pa buloba batua mua kununanga bu bana babu. Kadi mvua munusungule, munusomone munkatshi mua ba pa buloba, bualu kanuena ba pa buloba to. Ke padi ba pa buloba banukina.

²⁰ Vulukayi mumvua munuambile ne: “Muena mudimu nansha umue kena mua kupita mfumuende.” Bu mmuabu bankengeshe, nebankengeshe kabidi. Pikalabu banyishe dilongesha dianyi, nebanyishe kabidi dienu.

²¹ Kadi nebanuelele bionsu abi amu bualu buanyi. Bualu kabena bamanye utua muntume.

²² Bu meme tshiyi mulue, kabatua mua kupila nansha. Kadi mpindiewu kabena ne pa kubingila bua bubi buabu.

²³ Muntu udi unkina, mmukine kabidi ne Tatu wanyi.

²⁴ Bu meme tshiyi muenzele munkatshi muabu midimu idi katshia muntu nansha umue kayi muanji kuenza, kabatua mua kupila nansha. Kadi mpindiewu mbamone midimu yanyi, kabidi badi batukina, Tatu wanyi ne meme.

²⁵ Kadi bidi bienzeka nanku bua miaku ikumbane idibu bafunde mu mukanda wa mikenji yabu ne: “Mbankine kapayi bualu.”

²⁶ Udi ne bua kunuambuluisha neafike. Yeye ke Mueyelu wa bulelela udi utumina kudi Tatu. Nennutuminewu, utumina kudi Tatu. Neunujadikile malu anyi.

²⁷ Nuenu kabidi nenujadikile bantu malu anyi! Bualu nutua nanyi biangatshile ku tshibangidilu.