Yowanane 1 - MUKANDA WA MYIDI MUKULU

Muaku wa Mvidi Mukulu udi butoke ne muoyi

¹ Pavua Mvidi Mukulu mufuke ku tshibangidilu bintu bionsu, Muaku ukavuaku. Muaku uvua ne Mvidi Mukulu. Muaku uvua Mvidi Mukulu.

² Uvua ne Mvidi Mukulu ku tshibangidilu.

³ Mvidi Mukulu uvua mufuke bintu bionsu ne Muaku. Kakuvua tshintu nansha tshimue tshivua Mvidi Mukulu kayi mufuke ne Muaku.

⁴ Munda mua Muaku muvua muoyi. Muoyi awu uvua mupeteshe bantu butoke.

⁵ Butoke budi bukenka mu miidima. Kadi miidima kayivua mibuanyishe.

⁶ Mvidi Mukulu uvua mutume muntu wende, dina diende nYowanane.

⁷ Yeye uvua mulue kujadika malu, bua kumanyisha bantu malu a butoke. Uvua mulue bua bantu bonsu bitabe tshidiye wamba.

⁸ Yeye mene kavua butoke. Uvua mulue kujadikila bantu malu a butoke.

⁹ Butoke ebu ke butoke bulelela budi bufika pa buloba bua kutokesha bantu bonsu.

¹⁰ Muaku uvua pa buloba. Mvidi Mukulu uvua mufuke bintu bionsu ne Muaku. Kadi bantu kabavua bitabe Muaku.

¹¹ Muaku kufika mu ditunga diawu. Kadi bana bawu nanshabu kuwakidila.

¹² Kadi bamue kuwakidila, kuwitaba. Kubapeshawu bukole bua kuikala bana ba Mvidi Mukulu.

¹³ Kabena babalele ku bukole bua mashi, mudi tatu wa pa buloba ulela muana. Kadi Mvidi Mukulu nkayende ke udi mubapeshe muoyi mupiamupia.

¹⁴ Muaku kudienza muntu. Kusombawu munkatshi muetu. Uvua muwule ne dinanga kabidi ne bulelela. Tuetu kumona butumbi buawu. Butumbi ebu ke budi Muana mulela umue upeta kudi Tatuende.

¹⁵ Yowanane ke uvua muambile bantu bualu buende. Uvua muele diyi dikole ne: — Yeye ewu ke umvua muambe ne: “Muntu neafike panyima panyi udi muntambe meme, bualu kabayi banji kundela, yeye ukavuaku.”

¹⁶ Muntu yonsu wa kutudi mmupete tshiende tshitupa tshia bubanji bua dinanga diende. Uvua mudiele lupemba misangu ne misangu.

¹⁷ Mvidi Mukulu uvua mutuelele mikenji idi Moshe mutumanyishe. Kadi dinanga ne bulelela mbifika kudi Yezu Kristu.

¹⁸ Muntu nansha umue kena muanji kumona Mvidi Mukulu. Amu Muana mulela umue, Mvidi Mukulu udi musombe pamue ne Tatu, ke udi mutumanyishe Tatu.

Yowanane-Batiste udi wambila bantu malu

¹⁹ Telejayi muvua Yowanane muandamune bamfumu ba bena Yuda ba mu Yerushalayime pavuabu batume batuangaji ne bena Levi kudiye bua kumukonka ne: — Wewe udi nganyi?

²⁰ Yowanane kavua mubenge kubandamuna. Kadi kubambilaye patoke ne: — Meme tshiena Meshiya.

²¹ Kumukonkabu ne: — Kadi udi nganyi? Udi Eliya anyi? Yowanane kuandamuna ne: — Tshiena Eliya. Kumukonkabu kabidi ne: — Udi Muambi utudi bindile anyi? Kuandamunaye ne: — To.

²² Nanku kumuambabu ne: — Kadi udi nganyi? Utuandamune, bua tuye kuambila bavua batutume? Udi udiamba mene ne: ndi nganyi?

²³ Yowanane kuandamuna ne: — Ndi “Diyi dia muntu udi wela lubila mu tshipela ne: Longololayi njila wa Maweja-Nangila bimpe!” (Ke bivua muambi Yeshaya muambe.)

²⁴ Ku bantu bavuabu batumine Yowanane, kuvua Baparushe.

²⁵ Ke bavua bamukonka ne: — Paudi kuyi Meshiya, kuyi Eliya, nansha muambi utudi bindile, kadi udi utua bantu mu mayi bua tshinyi?

²⁶ Yowanane kubandamuna ne: — Meme ndi nnutua mu mayi. Kadi munkatshi muenu mudi muntu unudi kanuyi bamanye.

²⁷ Udi ulua panyima panyi. Kadi tshiena nansha muakanyine kusulula nshinga ya bisabata biende.

²⁸ Bionsu ebi bivua bienzekele mu musoku wa Betanya, dishiya dia musulu wa Yardene, uvua Yowanane utua bantu mu mayi.

Yezu udi Muana wa mukoku wa Mvidi Mukulu

²⁹ Butshia, Yowanane kumona Yezu ufika kudiye. Kuambilaye bantu ne: — Tangilayi Muana wa mukoku wa Mvidi Mukulu udi umbusha bubi bua bantu.

³⁰ Yeye ke umvua muambe ne: “Muntu udi ulua panyima panyi. Kadi udi mumpite meme. Bualu kabayi banji kundela, yeye ukavuaku.”

³¹ Tshivua mumumanye. Kadi ndi mulue kutua bantu mu mayi bua kumumanyisha kudi bena Izrayele.

³² Yowanane uvua ujadika kabidi ne: — Mvua mumone Mueyelu wa Tshijila upueka mu diulu bu nyunyi wa nkudimba, umuikila.

³³ Tshivua nansha muanji kumumanya. Kadi Mvidi Mukulu uvua muntume bua kutua bantu mu mayi, uvua mungambile ne: “Muntu uwamona Mueyelu wa Tshijila upueka, umuikila, Yeye awu ke udi utua bantu mu Mueyelu wa Tshijila.”

³⁴ Ke Yowanane kuamba ne: “Mvua mumone nanku. Ke mundi njadika ne: Muntu awu ke Muana wa Mvidi Mukulu.”

Yezu udi ubikila balongi bende ba kumpala

³⁵ Butshia, Yowanane uvua kabidi muaba awu pamue ne balongi bende babidi.

³⁶ Umona Yezu upita, kuambaye ne: — Tangilayi Muana wa mukoku wa Mvidi Mukulu!

³⁷ Balongi babidi ba Yowanane bumvua muvuaye muambe amu, kulondabu Yezu.

³⁸ Yezu ukudimuka, kubamonaye bamulonda. Kubakonkaye ne: — Tshinudi nukeba ntshinyi? Bobu kumuandamuna ne: — Rabi (mmomumue ne “Mulongeshi”), utu usomba penyi?

³⁹ Yezu kubambila ne: — Luayi, nenumone. Kuyabu nende. Kumonabu muaba uvuaye usomba. Kumusombeshabu dituku dijima. (Diba dikavua bu pa inayi wa dilolu).

⁴⁰ Umue wa ku balongi babidi bavua bumvue muvua Yowanane muambe, balonde kabidi Yezu, uvua Andre, muanabu ne Simone Petro.

⁴¹ Andre kusambakena diambedi ne muanabu Simone. Kumuambilaye ne: — Tuvua bamone Meshiya. (Mmomumue ne: “Kristu”).

⁴² Kuyaye ne Simone kudi Yezu. Yezu kutangila Simone, umuamba ne: — Wewe udi Simone, muana wa Yowanane. Nebakuinyike ne: Kefase. (Mmomumue ne: “Dibue”).

Yezu udi ubikila Filipe ne Natanayele

⁴³ Butshia, Yezu uvua musue kuya mu buloba bua Ngalileya. Kusambakenaye ne Filipe. Kumuambilaye ne: — Undonde!

⁴⁴ (Filipe uvua muena Betsayida; Andre ne Petro bavua basombe kabidi mu musoku awu.)

⁴⁵ Pashishe Filipe kusambakena ne Natanayele. Kumuambilaye ne: — Tuvua bamone muntu uvua Moshe mutele mu mukanda wa Mikenji, kabidi uvua bambi bambe. Ke Yezu, muana wa Yozefe, muena mu tshimenga tshia Nazarete.

⁴⁶ Natanayele kuambila Filipe ne: — Mu Nazarete mudi mua kupatuka bualu bua nsongu anyi? Filipe kumuandamuna ne: — Luaku, neumone.

⁴⁷ Yezu umona Natanayele ufika kudiye, kuambaye ne: — Ke muena Izrayele mulelela udi kayi ne dishima nansha dikese munda muende.

⁴⁸ Natanayele kumukonka ne: — Udi mummanye munyi? Yezu kumuandamuna ne: — Mvua mukumone, Filipe kayi muanji kukubikila, pauvua muinshi mua mutshi wa mfiku.

⁴⁹ Nanku Natanayele kumuambila ne: — Mulongeshi, udi Muana wa Mvidi Mukulu, udi mukalenga wa bena Izrayele!

⁵⁰ Yezu kumuandamuna ne: — Udi witaba nanku amu bualu mvua mukuambile ne: ndi mukumone muinshi mua mutshi wa mfiku. Neumone malu manene mapite ebu!

⁵¹ Yezu kuamba kabidi ne: — Ndi nnuambila bulelela ne: nenumone diulu diunzuluke, batumibue ba Mvidi Mukulu babanda bapueka kulu kua Muana wa muntu.