Yoshua 15 - MUKANDA WA MYIDI MUKULU

Buloba bua bena Yuda

¹ Buloba buvuabu batshinka bua kupesha bena Yuda, bilondeshile meku abu, buvua butuadija kuinshi mu ditunga, luseke ludi diba dipatukila, ku mukalu ne bena Edome. Tshipela tshia Tsine tshivua tshitupa tshia kuinshi menemene tshia buloba abu.

² Mukalu wabu wa kuinshi uvua utuadija kuinshi kua Mayi manene a luepu.

³ Uvua upitshila kuinshi kua mukuna wa tuminyiminyi, ne kua tshipela tshia Tsine. Kuinshi kua Kadeshe-Barneya, mukalu awu uvua upitshila ku Esrone, ubandila ku Adare. Pashishe uvua ubenda bua kuya ku luseke lua Karka.

⁴ Mukalu awu uvua uyila ku Asmone, ufika ku musulu wa Ejipitu bua kuya kudiela mu Mayi manene a pankatshi pa matunga. Ke muvua mukalu wa buloba bua bena Yuda luseke lua kuinshi.

⁵ Ku luseke ludi diba dipatukila, mukalu uvua utuadija ku Mayi manene a luepu, utungunuka too ne ku muaba udi musulu wa Yardene udielela mu Mayi manene a luepu. Muaba awu ke uvua mukalu wa ku mutu utuadijila.

⁶ Mukalu awu uvua ubandila mu Bete-Ogla, upitshila ku mutu kua Bete-Araba, utungunuka ne ku dibue didibu binyika ne: Bokane. Dina edi divua dia muana wa balume mukuabu wa Rubene.

⁷ Mukalu awu uvua upitshila ku tshibandabanda tshia Akore, ubandila kabidi ku Debire, pashishe ubendela ku mutu wa ditunga, uya ku Ngilgale, mutangilangane ne mukuna wa Adumime, udi kuinshi kua lubuwa. Pashishe uvua upitshila pabuipi ne mpokolu ya mayi ya mu Ene-Shemeshe, ushikidila ku Ene-Rogele.

⁸ Pashishe mukalu awu uvua ubandila ku tshibandabanda tshia Inome, tshidi kuinshi kua kakuna ka bena Yebusa, muaba udibu base tshimenga tshia Yerushalayime. Pashishe uvua upitshila ku lusongu lua mukuna ludi luseke ludi diba dibuelela lua tshibandabanda tshia Inome, ne luseke lua ku mutu menemene lua tshibandabanda tshia bena Refayime.

⁹ Muaba awu mukalu uvua ubenda ku mpokolu ya Neftowa, ufika ne ku bimenga bidibu base pabuipi ne mukuna wa Efrone, pashishe utungunuka ku tshimenga tshia Baala, tshidibu binyika kabidi ne: Kiriyate-Yeyarime.

¹⁰ Mukalu awu uvua ubenda luseke ludi diba dibuelela lua Baala, utangila ku mukuna wa Seyire, upitshila ku mutu kua mukuna wa Metu, udibu binyika kabidi ne: mukuna wa Keshalone, upuekela tshiakabidi ku Bete-Shemeshe, upitshila ku Timna.

¹¹ Uvua utungunuka, uya ku luseke lua kumutu lua tshimenga tshia Ebrone, ubenda mutangile ku Shikarone, utungunuka, upitshila ku mukuna wa Baala, uya ku Yabne, pashishe utua makasa ku Mayi manene a pankatshi pa matunga, wimana.

¹² Mayi manene a pankatshi pa matunga ke awa enza mukalu wa luseke ludi diba dibuelela. Ke muvua mikalu ya buloba bua bena Yuda bilondeshile muvua meku abu nanku.

¹³ Kalebe, muana wa Yefune, uvua mupete tshitupa tshia buloba bua bena Yuda, anu bu muvua Maweja-Nangila mumane kuambila Yoshuwa. Bavua bamupesha tshimenga tshi Kiriyate-Arba, tshidibu binyika Arba, nkambua wa bena Anake. Kadi lelu badi binyika tshimenga tshia Arba dina dikuabu dia Ebrone.

¹⁴ Kalebe wakipata meku asatu abena Anake awa mu tshimenga atshi: ke bena Sheshayi, bena Akimane ne bena Talmayi.

¹⁵ Ke kumukaye mu Ebrone, bua kuya kuluisha bena mu tshimenga tshia Debire, tshivuabu binyika tshikondu atshi Kiriyate-Sefere.

¹⁶ Kalebe uvua mulaye ne: muntu yonsu udi ukuata tshimenga tshia Kiriyate-Sefere, ndi mmuselesha Aksa, muananyi wa bakaji.

¹⁷ Otniyele, muana wa Kenaze, uvua muana wa muanabu ne Kalebe, kukuata tshimenga atshi. Kalebe kumupesha muanende Aksa bua ikale mukajende.

¹⁸ Aksa ufika pabuipi ne Otniyele, kumupeshaye meji bua alombe budimi kudi tatuende Kalebe. Pashishe Aksa kutuluka pa mpunde wende, tatuende Kalebe kumuebeja ne: — Udi musue tshinyi?

¹⁹ Aksa kuandamuna ne: — Ungenzele tshindi nkulomba etshi: umpeshe mpokolu ya mayi, bualu buloba bua kuinshi mu ditunga buudi mumpeshe kabuena ne mayi to, mbuume. Kalebe kumupesha mpokolu ya mayi ivua ku mutu, ne ivua kuinshi mu buloba buabu.

²⁰ Ke buloba buvuabu babanyine bena tshisamba tshia Yuda, bilondyshile meku abu.

²¹ Bimenga bivuabu base mu tshitupa tshia kuinshi mu buloba bua bena Yuda, pabuipi ne Edome, ku mikalu, bivua nunku: Kabseyele, Edere, Yagure,

²² Kina, Dimona, Adeyada,

²³ Kedeshe, Ashore, Itnane,

²⁴ Zife, Teleme, Beyalote,

²⁵ Ashore-Adata, Keriyote, Esrone uvuabu binyika kabidi Ashore,

²⁶ Amame, Shema, Molada,

²⁷ Ashare-Ngada, Eshemone, Bete-Pelete,

²⁸ Ashare-Shuwale, Bersheba ne misoku ivua mutumba,

²⁹ Baala, Iyime, Esheme,

³⁰ Eltolade, Keshile, Orma,

³¹ Siklaje, Madmana, Sanesana,

³² Lebayote, Shilime ne Ene-Rimone. Bimenga ebi bionsu bivua makumi abidi ne tshitema, tusakidile kabidi misoku ivua nabi mutumba.

³³ Bimenga bivuabu base mu mpata bivua nenku: Eshetayole, Sora, Ashena,

³⁴ Zanowa, Ene-Nganime, Tapuwa, Ename,

³⁵ Yarmute, Adulame, Soko, Azeka,

³⁶ Sharayime, Aditayime, Ngedera ne Ngederotayime. Bimenga ebi bionsu bivua dikumi ne binayi; muvua kabidi misoku ivua nabi mutumba.

³⁷ Kuvua kabidi bimenga ebi: Senane, Adasha, Migdale-Ngade,

³⁸ Dilane, Mispa, Yokteyele,

³⁹ Lakishe, Boskate, Eglone,

⁴⁰ Kabone, Lakemase, Kitlishe,

⁴¹ Ngederote, Bete-Dagone, Naama ne Makeda. Bimenga bionsu ebi bivua dikumi ne bisambombu; muvua kabidi misoku ivua nabi mutumba.

⁴² Kuvua kabidi bimenga ebi: Libna, Etere, Ashane,

⁴³ Ifta, Ashena, Neshibe,

⁴⁴ Keyila, Akzibe ne Maresha. Bimenga bionsu ebi bivua tshitema; muvua kabidi misoku ivua nabi mutumba.

⁴⁵ Kuvua kabidi tshimenga tshia Ekrone, tshisangisha pamue ne miaba ne misoku ivua natshi mutumba.

⁴⁶ Kuvua kabidi bimenga bionsu ne misoku, bivuabu base pabuipi ne tshimenga tshia Asdode, pankatshi pa tshimenga tshia Ekrone ne Mayi manene a pankatshi pa matunga.

⁴⁷ Kuvua kabidi tshimenga tshia Asdode ne tshia Ngaza, ne miaba ne misoku ivua pabuipi ne bimenga abi, bifika too ne ku musulu wa Ejipitu, ne ku muelelu wa Mayi manene a pankatshi pa matunga.

⁴⁸ Bimenga bivuabu base ku mikuna bivua nenku: Shamire, Yatire, Soko,

⁴⁹ Dana, Kiriyate-Sana uvuabu binyika kabidi Debire,

⁵⁰ Anabe, Eshtemowa, Anime,

⁵¹ Ngoshene, Olone ne Ngilo. Bimenga bionsu ebi bivua dikumi ne tshimue; muvua kabidi misoku ivua nabi mutumba.

⁵² Kuvua kabidi bimenga ebi: Arabe, Ruma, Eshane,

⁵³ Yanume, Bete-Tapuwa, Afeka,

⁵⁴ Umeta, Kiriyate-Arba uvuabu binyika kabidi Ebrone, ne Siyore. Bimenga bionsu ebi bivua tshitema; muvua kabidi misoku ivua nabi mutumba.

⁵⁵ Kuvua kabidi bimenga ebi: Mayone, Karmele, Zife, Yuta,

⁵⁶ Yizreyele, Yokdeyame, Zanowa,

⁵⁷ Kayine, Ngibeya ne Timna. Bimenga ebi bionsu bivua dikumi; muvua kabidi misoku ivua nabi mutumba.

⁵⁸ Pashishe muvua kabidi bimenga ebi: Alule, Bete-Sure, Ngedore,

⁵⁹ Maraate, Bete-Anote ne Eltekone. Bimenga bionsu ebi bivua bisambombu; muvua kabidi misoku ivua nabi mutumba.

⁶⁰ Kuvua kabidi tshimenga tshia Kiriyate-Baale, tshivuabu binyika kabidi Kiriyate-Yeyarime, ne tshimenga tshia Raba. Bimenga ebi bivua bibidi; muvua kabidi misoku ivua nabi mutumba.

⁶¹ Bimenga bivuabu base mu tshipela bivua nenku: Bete-Araba, Midine, Sekaka,

⁶² Nibeshane, tshimenga tshia luepu, ne Ene-Ngedi. Bimenga bionsu ebi bivua bisambombu; muvua kabidi ne misoku ivua nabi mutumba.

⁶³ Ndelanganyi ya Yuda kayiwa mua kuipata bena Yebusa bavua base mu Yerushalayime. Nanku too ne ku lelu bena Yebusa badi basomba mu Yerushalayime muaba umue ne bena Yuda.