Yobe 5 - MUKANDA WA MYIDI MUKULU

¹ Ela diyi tumone, neunwue muntu udi mua kukuandamuna anyi? Mutumibue wa Mvidi Mukulu udi mua kuyukila nebe nnganyi?

² Muntu mutatakane udi wasa Mvidi Mukulu tshilumbu, tshiotshi tshidi tshimushipa. Muntu mutshimbakane udi umvua lubabu munda, ufua nalu.

³ Bushuwa, meme kumona tshidingidingi tshipeta diakalenga, kadi, diakamue meme kutshipa nzubu wende ne:

⁴ “Bana bende, kabapetshi udi mua kubambuluisha. Babafundile tshibawu ku kabadi! Kakuena muntu udi mua kubasungidila.

⁵ Bivuaye mupete babidie kudi bantu bakuabu. Nansha yeye muele mpangu meba, bamunyenge bia mu madimi ende, badi ne lukuka badie bia pa madimi ende bionsu.”

⁶ Diakabi didi muntu nadi kadiena difuma mu lupuishi to. Dikenga diende kadiena ditoloka mu buloba to.

⁷ Kadi dikenga dionsu didi difuma munda mua muntu bu mudi tuntolentole tua kapia tupatuka mu kapia.

⁸ Bu meme ne dikenga bu diebe, mvua kuya kudi Mvidi Mukulu, kumuambila muanyi mundi muonsu.

⁹ Yeye ke udi wenza malu manene, adi muntu kayi mua kujingulula. Udi wenza bishima bungi kabuyi kubala.

¹⁰ Amu yeye ke udi ulokesha mvula bua kufila tshitalela pa buloba. Udi utuma mayi makumbana pa madimi.

¹¹ Bantu bavuabu bapuekeshe panshi, yeye udi ubabandisha kulu. Badi mu dibungama, yeye udi ubapingajila disanka.

¹² Udi upumbisha bena budimu meji adibu bela. Midimu idibu bakuata kayena ilubuluka.

¹³ Udi ukuata bena meji mu budimu buabu. Ngenyi yabu kayena ibapetesha kantu.

¹⁴ Badi benda mu munya, kadi badi batetuka bu badi benda mu miidima. Badi bababata bu mutu bantu benza mu butuku.

¹⁵ Kadi Mvidi Mukulu udi usungidila muena dikenga, udi mu bianza biabu. Udi umusha mupele mu maboku a badi bamukengesha.

¹⁶ Nanku bapela badi mua kutekemena tshiakabidi. Kadi benji ba malu mabi kabena mua kuakula kabidi to.

¹⁷ Nanku, dikenga didi kudi muntu udi Mvidi Mukulu unyoka! Kadi wewe Yobe, kupepeji mibelu idi Mvidi Mukulu wa bukole buonsu ukubela nayi to.

¹⁸ Mvidi Mukulu udi mua kusamisha muntu, kadi udi kabidi mua kujikija disama diende. Padiye utapa mputa, amu Yeye nkayende ke udi umondapa.

¹⁹ Mvidi Mukulu neansungidile mu njiwu, too ne ku diba didi dikenga kadiyi mua kukukuata kabidi to.

²⁰ Mu tshikondu tshia tshiyole tshia nzala, Mvidi Mukulu neakuepule ku lufu. Mu mvita mikole, neakulame bua kabakushipi!

²¹ Kuena mua kutshina badi bakujana, kuakuikala ne bowa padi kabutu kakuata bantu.

²² Nansha mu mvita, nansha mu tshikondu tshia nzala, neuseke amu kuseka. Kuena mua kuzakala, nansha wewe mumone nyama ya lonji.

²³ Neumvuangane ne mabue adi mu budimi buebe. Nyama idi ipitshilamu neidie nebe bulunda!

²⁴ Mu nzubu muebe nemuikale bupole, paudi ubala mikoku yebe, neuyisangane amu yonsu katakata.

²⁵ Neumone ndelanganyi yebe ivulangana, bu bisosa bia mu mpata.

²⁶ Neukulakaje bikole, neufue nebakujike, amu bu mudibu bapole ntete ya kuenza bukula padiyi ipia.

²⁷ Ke malu atuvua balonge bikole; adi amu nanku. Teleja bimpe, ulonge pebe.