Yobe 39 - MUKANDA WA MYIDI MUKULU

¹ Udi mumanye diba didi mbuji ya pa mikuna ilela anyi? Ukadi mumone padi ngulungu ulela anyi?

² Udi mubale bungi bua ngondu ya difu diayi anyi? Udi mumanye tshikondu tshialelaye anyi?

³ Bakaji ba nyama badi batua panshi bua kulela, bajuka lubilu kabayi bumvua kabidi dikenga.

⁴ Pashishe bana badi bakola, badiunda mu tshipela. Dinga dituku bana abu badi bashiya bamamuabu, kabayi mua kupingana kabidi to.

⁵ Uvua muanyishe bua mpunde wa muitu ende kudiye musue nnganyi? Uvua musulule nkanu yende nnganyi?

⁶ Meme kumuteka mu tshipela, muaba mume wa luepu. Ke wende nzubu.

⁷ Udi amu unyema mutoyi wa mu tshimenga. Kena umvua diyi dia mfumuende wa mudimu.

⁸ Udi wendakana pa mukuna ukeba bisosa bionsu bidi bibishi, udi ubikeba ne muende muonsu.

⁹ Nyama wa mbowa wa muitu udi mua kukuenzela mudimu anyi? Udi mua kumuladika mu tshikumbi tshiebe anyi?

¹⁰ Udi mua kumusuika bua kukudiminaye budimi buebe anyi? Udi mua kukoka lukasu luebe ludi lushipa mabuwa mu tshibanda anyi?

¹¹ Bu mudiye ne bukole buvule, udi mua kutekemena kudiye, bua akuenzele midimu yebe yonsu minene anyi?

¹² Udi mua kutekemena kudiye bua apingane pa mbelu ne ntete ya kuenza bukula, bua afikishe biudi unowa mu mayeba ebe anyi?

¹³ Kasonganyunyi udi upapala bienza disanka, makuyi ende adi engelela. Masala ende adi mimpe be.

¹⁴ Kadi udi ushiya mayi ende pa buloba, bua luya lukole lua lusenga lualadile.

¹⁵ Kena uvuluka ne: badi mua kuadiata, nansha nyama idi mua kuaboza.

¹⁶ Udi ushiya bana bende bu ba bende. Nansha yeye ukenga kayi ne tshipeta, kabiena bimuenza bualu.

¹⁷ Bualu tshivua mumupe meji, nansha lungenyi lua kusunguluja nalu malu.

¹⁸ Kadi padiye ujuka, unyema lubilu, udi upita kabalu ne udi mubandapu ku lubilu, mutantshi mule.

¹⁹ Wewe ke udi mupeshe kabalu bukole kabidi mukase boya mu nshingu anyi?

²⁰ Wewe udi mukenzeje bua katupike bu mpasu anyi? Muadi waku udi ukuatshisha baluishi bowa,

²¹ kadi katuuta tshikonu panshi bikole mu tshibanda, kasanka bua bukole budiku nabu. Kadi kadiela mu mvita kakayi katshina baluishi.

²² Kakena ne bowa, kakena katshina tshintu. Nansha muele wa mvita kawena ukapingaje tshianyima.

²³ Pambidi pa nyama wa kabalu, mikete idi itutakane mu tshibubu, misongolu ne mafuma bidi bibalakane.

²⁴ Padiku kasungabala, kadi kanyema kakayi kimana. Padibu bela mpungi, kadi kabanga luendu musangu umue.

²⁵ Diba didi mpungi udila, kadi kela muadi katshidi kule. Kakadi kumvua mupuya wa mvita, ne mbila idi balombodi ba mvita ne bantu babu bela.

²⁶ Wewe ke uvua mupeshe nyunyi wa kabemba, meji a kuya kuinshi kua ditunga, diba didiye ne bua kuasulula masala ende anyi?

²⁷ Ku diyi diebe, ke kudi nyunyi wa tshiminyi ubuka, nansha wibaka disua, pa mukuna mule anyi?

²⁸ Udi wasa pa lubuebue, pa lusongu mene, muaba udibu kabayi mua kumupeta.

²⁹ Koku aku, udi ukeba tshiakudia, udi utshimuena pa bule.

³⁰ Bualu bana batshi, badi bananga kanyinyi ka mashi. Nanku tshiminyi, udi miaba yonsu, idi bitalu.