Yobe 38 - MUKANDA WA MYIDI MUKULU

MAWEJA-NANGILA UDI WAKULA ( 38.1—42.6 )

¹ Munkatshi mua tshipepele tshikole, Maweja-Nangila kubikila Yobe ku mukonka ne:

² Wewe udi nganyi? Muudi wela mpata pa malu andi ndongesha mbishi? Muudi wakula pa malu audi kuyi mujingulule mmunyi?

³ Kadi bidi amu bimpe, juka, uleje muudi kalume ka mukaba, nenkuele lukonku bua ungandamune.

Mvidi Mukulu udi mfumu wa bionsu bidi kabiyi ne muoyi

⁴ Diba dimvua mufuke buloba uvua penyi? Neudi mumanye ngambile tumone?

⁵ Uvua mujadike bule ne butshiama buabu nnganyi? Nansha uvua mubupime ne muonji andamune tumone.

⁶ Makunji adi mabuimanyika mmasa pa tshinyi? Uvua muteke dibue mu ditumba diabu nnganyi?

⁷ Dituku adi mitotu ya nkesha ivua imba misambu pamue. Batumibue ba Mvidi Mukulu bavua basanka bela tunkunduluila.

⁸ Uvua mukangile mavuala a mayi manene biibi, pavuawu apatuka ne bukole mu buloba nnganyi?

⁹ Amu meme ke uvua mubuikile mayi manene ne mavuba, muajingile ne dibungi dikole.

¹⁰ Mvua muelele nkila, mualeje mikalu, muajikile njila ne biibi bikanga ne bikuvu.

¹¹ Meme kuambila mayi manene ne: “Neupueke too ne apa. Kusabuki kuaka nansha. Mavuala ebe adi adiela mulu awu, neimane apa.”

¹² Dituku kayi, diukadi muelele diba mukenji ne patuka? Nansha kabundubundu ne juka.

¹³ Ukadi mutume kabundubundu, bua kanyungishe buloba ku ntengu yabu yonsu, bua kele bantu babi bonsu panshi anyi?

¹⁴ Munya udi umuesha mikuna minene ne mikese, anu bu padibu batua tshitampi pa diima, nansha bu mudi mufudi ku tshilamba.

¹⁵ Kadi bantu babi kabena bamona butoke to, bualu budi bubakandika bua kabenji kabidi bibi.

¹⁶ Ukadi mufike ku mpokolu ya mayi manene anyi? Ukadi muende panshi pa mayi manene anyi?

¹⁷ Bakadi bakuleja tshiibi tshia mu kandondu ka bafue, muaba udi miidima kashidi anyi?

¹⁸ Ukadi mumanyeku kakese bule ne butshiama bua buloba anyi? Ungandamune bualu udi mumanye malu onsu.

¹⁹ Udi mumanye muaba udi butoke busombe anyi? Nansha kaba kadibu mua kupeta miidima anyi?

²⁰ Uvua mua kubishindikija mu luendu lujima, kupingana nabi muaba udibi bisomba.

²¹ Wewe udi mua kumanya bionsu abi, bualu bakavua bakulela diba divuabu bafuke buloba. Bidimu biebe mbipite bungi.

²² Ukadi mufike mu mayeba, miaba indi ndama neje ne mabue a mvula anyi?

²³ Mvua mubilamine mu tshikondu tshia makenga, bua matuku a mvita ne a ndululu.

²⁴ Udi mumanye njila udi butoke bulonda, bua kufika kutudi anyi? Mudi lupepele lufuma luseke ludi diba dipatukila, lutangila pa buloba anyi?

²⁵ Udi muenzele mvula mukidi mu diulu, mupandile makubakuba ne mikenya ya mvula njila nnganyi?

²⁶ Uvua mulokeshe mvula mu buloba budi bantu kabayi base, mu tshipele tshidi munda mutupu nnganyi?

²⁷ Udi mua kubolesha buloba mu miaba miatuke, bua kutolokesha mashinda ne kumenesha bisosa nnganyi?

²⁸ Mvula udi ne tatuende anyi? Lumuma bavua balulela anyi?

²⁹ Mamuende wa mabue a mvula nnganyi? Udi mulele mayi a mu diulu adi makuatakane nnganyi?

³⁰ Padiku mashika makole, mayi adi akuatakana, akola bu dibue, badi mua kuenda pa mutu pawu.

³¹ Tangila mitotu. Udi mua kusuika tshidimina nzaji, kutulakaja mbua, nyama ne muntu anyi?

³² Udi mua kuleja mitotu tshikondu ne tshikondu tshiayi anyi? Udi mua kuludika ditempu dinene ne dikese anyi?

³³ Udi mumanye mikenji idi diulu ditumikila anyi? Wewe udi mumanye bulongolodi bua buloba anyi?

³⁴ Amu wewe wela lubila lukole, mavuba alokesha mvula wa bungi, akubolesha anyi?

³⁵ Padi mikenya ya mvula yumuka, wewe ke udi uyituma anyi? Idi ikuambila ne: “Tudi tukumbaja diyi diebe” anyi?

³⁶ Uvua muambile nyunyi wa ibise ne musulu wa Nile newuwule nnganyi? Udi mumanyishe nzolu wa tshitala ne mvula nealoke nnganyi?

³⁷ Udi mua kubala mavuba nnganyi? Udi mua kuitshikija mayi adi mu nyingu ya mulu udiku anyi?

³⁸ Diba adi, buloba bume bua lupuishi nebukuatakane, bua kuenza mabuwa mu madimi.

Mvidi Mukulu mmfumu wa bukua nyama

³⁹ Udi ukebela mukaji wa nyama wa ntambue tshiakudia ngwewe anyi? Udi mua kutuyisha nzala ya bana bende,

⁴⁰ padibu basombe mu miaba yabu, balamine mu tshipuka anyi?

⁴¹ Udi uvuluka tshiakudia tshia tshikololu, diba didi tuana tuatshi tupange tshiakudia, tulomba diambuluisha kudi Mvidi Mukulu nnganyi?