Yobe 36 - MUKANDA WA MYIDI MUKULU

Elihu kumvuija Yobe mudi Mvidi Mukulu ubela bantu

¹ Elihu kuamba kabidi ne:

² Yobe umfuile luse nkumvuije kabidi, amue malu adi atangila Mvidi Mukulu.

³ Bantu badi kule bavua bangambila bindi ndongesha, bua mmone mua kubingisha Mvidi Mukulu Mumfuki wanyi.

⁴ Bulelela miaku yanyi ki nya dishima to. Udi kumpala kuebe mmuntu muakane.

⁵ Nansha Mvidi Mukulu ne bukole bupite, kena upetula muntu to. Udi Mfumu muena diyi dimue.

⁶ Udi ushipa bantu babi. Udi wenzela bapela bimpe.

⁷ Udi ulama badi bamulamate. Bakalenga badi mu nkuasa wa bumfumu, Mvidi Mukulu ke udi mubatekemu, bua bukalenga buabu bunenge. Kadi badi baditambisha.

⁸ Ke mudibu babakuata, babasuika nkanu, babuela mu dikenga.

⁹ Mvidi Mukulu udi ubaleja nanku muvuabu benze bibi, baditambisha, bamutombokela.

¹⁰ Udi ubabela bua bumvue malu, ubambila bua balekele kuenza malu mabi.

¹¹ Bobu bitabe, batumikila Mvidi Mukulu, nebikale ne diakalenga, kabidi ne disanka dinene, too ne mudibu bafua.

¹² Kadi padibu babenga kumuitaba, nebapitshile amu mu njila wa ku kandondu ka bafue. Nebabutuke bualu bavua bapange meji.

¹³ Bantu badi babenga Mvidi Mukulu, badi bamufikisha munda, kabena bamusengelela nansha yeye mubanyoke.

¹⁴ Badi bafua ne buana buabu bonsu. Badi bajimina mu bubi batshikale bansongalume.

¹⁵ Kadi Mvidi Mukulu udi uteleja bakengi mu dikenga didibu bumvua. Udi ubabela mu ntatu idibu nayi.

¹⁶ Kale, Mvidi Mukulu uvua mukumushe mu dikenga, mukupeshe disanka dinene. Pa mesa ebe pavua biakudia bisheme.

¹⁷ Kadi mpindiewu badi bakunyoke bua bubi buebe. Tshilumbu ntshikukuate.

¹⁸ Tshiji katshikufikishi ku buntomboji. Katshikueleshi meji a kudisungidila ku biuma.

¹⁹ Nansha biuma biebe, nansha tshiamu tshiebe tshia mpawungi, nansha bukole buudi nabu, kabiena bikumbane bua kujikija dikenga diebe.

²⁰ Kujingi butuku budi bujimija bisamba bia bantu.

²¹ Kadi kupinganyi ku malu mabi, bualu ke avua makukebele dikenga.

Mvidi Mukulu mmuena bukole buonsu

²² Eyowa, Mvidi Mukulu mmuena bukole buonsu. Udi ulongesha mudiye yeye ulongesha nnganyi?

²³ Udi ne bua kumuambila tshidiye ne bua kuenza nnganyi? Udi mua kumuamba ne: “Uvua muenze bibi” nnganyi?

²⁴ Kadi kupu muoyi bua kumutumbisha bua bionsu bidiye muenze, mudi bantu bonsu bamutumbisha ne misambu.

²⁵ Bantu bonsu badi bamone bidi Mvidi Mukulu muenze, kadi badi babitangile amu pa bule.

²⁶ Eyowa, Mvidi Mukulu mmunene. Katuena mua kujingulula bunene buende. Kabena mua kubadika bidimu biende to.

²⁷ Udi ukoka mayi adi pa buloba afika mulu, andamuka mvula, udi uloka panshi.

²⁸ Mavuba adi alokesha mvula miaba yonsu idi bantu basombe.

²⁹ Udi mua kujingulula mudi mavuba atangalaka, mudi makubakuba adila mu diulu nnganyi?

³⁰ Amu Mvidi Mukulu ke udi utuma mikenyi ya mvula, panshi pa mayi manene mpashale anu pafike.

³¹ Padi Mvidi Mukulu ulokesha mvula, udi ukuba bantu, ubapesha biakudia bivule.

³² Udi wangata mikenya mu bianza biende, udi uyasa padiye musue.

³³ Mukungulu wa mvula udi utumanyisha ne mvula udiku. Nansha nyama idi imanya kabidi ne mvula ukadi pabuipi.