Yobe 33 - MUKANDA WA MYIDI MUKULU

Elihu kuambila Yobe ne: Mvidi Mukulu ke udi ubela muntu

¹ Pashishe wewe Yobe, teleja tshindi nkuambila. Teya matshi ne ntema ku miaku yanyi.

² Nkadi nkeba kukumvuija meji andi nawu. Nenkuambile malu onsu patoke.

³ Nenkulongeshe anu malu malelela mudiwu.

⁴ Mvidi Mukulu mmumfuke ne Mueyelu wende, mupuya wa Muena bukole buonsu ke udi mumvuije ne muoyi.

⁵ Paudi ne tshia kungandamuna, ungandamune. Udilongolole tuelangane nebe mpata, unduishe tumone.

⁶ Wewe ne meme kumpala kua Mvidi Mukulu tudi mumue. Uvua mutufuke bonsu babidi ne diima.

⁷ Kuzakadi kumpala kuanyi nansha. Kuedi meji ne: ndi musue kukuzaza to.

⁸ Nanku diyi diebe ditshidi mu matshi anyi. Uvua wamba wambulula ne:

⁹ “Meme tshiena ne bualu, tshiena mutombokele Mvidi Mukulu. Tshiena muenze tshilema. Ndi amu mundi emu.

¹⁰ Kadi Mvidi Mukulu udi ukeba kungasa amu tshilumbu, bualu udi untangila bu muluishi wende.

¹¹ Udi munsuike nkanu ku makasa. Udi utentekela bionsu bindi ngenza.”

¹² Kadi Yobe ndi nkuambila ne: udi mupile. Mvidi Mukulu mmunene mupite muntu, kena mua kusangana nende mpata to.

¹³ Tshilumbu tshiudi mumuase ntshilumbu kaayi? Bualu kena musue kuandamuna ku nkonku yebe anyi?

¹⁴ Kadi Mvidi Mukulu udi amu wakula misangu ne misangu, mishindu ne mishindu. Kadi bantu kabena bamuteleja ne ntema nansha.

¹⁵ Udi wakula mu ndota nansha mu malu adiye uleja, patudi tulala tuikisha butuku.

¹⁶ Diba adi udi utulongesha malu, utubela bikole kashidi.

¹⁷ Udi musue tudilengeje, tulekele kuditambisha.

¹⁸ Ke mudiye utusungidila ku lufu, utumusha mu njila udi ufika ku kandondu ka bafue.

¹⁹ Kadi Mvidi Mukulu udi ubela kabidi muntu, diba didi muntu awu usama, ushala mu bulalu, luya lukole luzakaja mubidi wende mujima.

²⁰ Tshiakudia nansha tshimue katshiena tshimusamina muoyi. Nansha biakudia bidiye munange bikole, bikadi bimuendesha ku muoyi.

²¹ Udi wenda unyana, kabayi mua kumumanya kabidi to. Badi mua kubadika mifuba yende yonsu.

²² Ukadi mikolu ku tshiina, lufu lukadi lukeba kuya nende.

²³ Bumue, mutumibue wa Mvidi Mukulu, neikale pabuipi nende, bua kumuambuluisha. Umue wa ku batumibue binunu ne binunu, udi umumanyisha tshidi Mvidi Mukulu musue.

²⁴ Mutumibue awu udi umvuila muntu netu luse, ulomba Mvidi Mukulu ne: “Umulekele, kabuedi mu kandondu ka bafue to. Ndi mupete bia kumubingisha nabi.”

²⁵ Ke muntu kupeta tshiakabidi mubidi mukole muimpe, bu wa diba ditshivuaye nsongalume.

²⁶ Padiye utendelela, Mvidi Mukulu udi umuteleja bimpe. Nenku udi usemena kudi Mvidi Mukulu, wela mbila ya disanka. Bualu Mvidi Mukulu, mmumupingaje muende nuwuaye kale.

²⁷ Udi wimba misambu, wambila bantu bonsu ne: “Mvua muenze bibi. Tshivua mukumbaje mikenji. Kadi Mvidi Mukulu ki mmunnyoke to, mmumfuile luse.

²⁸ Mvidi Mukulu mmumpatule mu njila wa kandondu ka bafue. Ndi ne muoyi. Ndi mmona butoke.”

²⁹ Ke bidi Mvidi Mukulu muenzele bantu. Udi ubabela nanku misangu ibidi nansha isatu mene.

³⁰ Ke mudiye ubumusha ku lufu, ubapingajila disanka, didi bantu badi benda ne muoyi nadi.

³¹ Nanku, Yobe nteleja muebe muonsu. Shala talalaa nganji kuakula.

³² Paudi musue kuandamuna, wandamune. Bu wewe mua kubinga, nensanke bikole be.

³³ Kadi paudi kuyi ne tshia kuamba, unteleje. Puwa bua nkulongeshe malu upete meji.