Yobe 32 - MUKANDA WA MYIDI MUKULU

ELIHU UDI WAKULA ( 32—37 )

¹ Pashishe bantu aba basatu, Elifaze, Bildade ne Sofare kabavua basue kuandamuna kabidi Yobe bualu to, bualu uvua udiunwua ne tshiena ne bualu.

² Kadi Elihu, muana wa Barakele wa mu tshisamba tshia Buze, mu diku dia Arame, kufika munda bikole, bualu Yobe uvua udibingisha, upisha Mvidi Mukulu.

³ Uvua kabidi mufikile bantu basatu aba munda, bualu kabavua mua kuandamuna Yobe, bafuana kupisha nanku Mvidi Mukulu.

⁴ Elihu uvua mupuwe bua bakulumpe badianze kuakula, bualu yeye utshivua mushadile ku bidimu.

⁵ Kadi Elihu kupeta tshiji tshikole, diba divuaye mumone bantu aba basatu kabayi kabidi ne tshidi mua kuashila Yobe.

Elihu kuamba ne: ndi panyi ne diyi dia kuamba

⁶ Pashishe, Elihu kuamba ne: Ntshidi amu nsongalume. Nuenu nukadi bakulumpe. Ke pamvua ntshina mua kunumvuija mumvua muele meji.

⁷ Meme kuamba ne: “Bakulumpe banji kuakula. Bantu bakadi bamane kulala panu, mbamane kulongesha bantu nabu meji.”

⁸ Kadi amu Mueyelu udi ufuma kudi Mvidi Mukulu wa bukole buonsu, utulukila muntu, ke udi umupesha lungenyi.

⁹ Meji adi muntu nawu kaena afuma ku bungi bua bidimu biende nansha. Muntu udi mumanye bidi bantu ne bua kuenza, ki mmuntu uvua mulale panu bikole to.

¹⁰ Nenku ndi nnulomba ne: nunteleje, ndi musue kunumvuija mundi muele meji.

¹¹ Mvua munuteleje ne lutatu diba dinuvua nuakula. Meme kutekemena ne nenumvuije bionsu bimpe, nenuandamune ku nkonku yonsu, muntu kayi mua kuela kabidi mpata.

¹² Mvua munuteleje ne ntema. Kadi muntu nansha umue wa kunudi kena mupishe Yobe to. Kavua muandamune ku nkonku yende to.

¹³ Kadi, kanuambi ne: “Tudi tuela meji ne: anu Mvidi Mukulu udi mua kupisha Yobe, ki ntuetu to.”

¹⁴ Bidi Yobe muambe, kabiena bintangila meme nansha. Binudi nuenu nuamba, kabiena bingambuluisha bua meme kuandamuna Yobe nansha.

¹⁵ Nudi ne bowa, kanuena kabidi ne tshiakuamba. Nudi bapuwa anu vivivii.

¹⁶ Meme kuindila. Kanutshivua nuakula kabidi to. Nuenu kushala biname, katuyi tunwua diyi nansha dimue.

¹⁷ Nanku ke dianyi diba dia kuakula edi! Ndi musue kumvuija mundi muele meji.

¹⁸ Ndi ne miaku ya bungi munda muanyi indi ne bua kuamba. Meji anyi mavule adi ansaka bua kuakula.

¹⁹ Bia nanku bidi amu bitutuka munda muanyi, bu maluvu adibu bela mu milondu ya biseba mipiamipia, akeba kuyipanda.

²⁰ Nundekele nganji kuakula panyi bua mpete dikisha, nengandamune muntu yonsu.

²¹ Bulelela, tshiakutua ku tshia muntu nansha umue. Tshiena musue kulabidila muntu wa kunudi nansha umue.

²² Tshiena ne tshibidilu atshi to. Kabidi meme muenze nanku, Mvidi Mukulu udi mua kunnyoka lukasa.