Yobe 31 - MUKANDA WA MYIDI MUKULU

Yobe ne: tshiena ne bualu

¹ Meme ne: tshiena mua kutangila nsongakaji, nansha kumualakana.

² Tshidi Mvidi Mukulu wa bukole buonsu, udi mu diulu, undongoluela ntshinyi?

³ Nudi nuamba ne: “Muena tshibawu udi upeta dikenga, benji ba malu mabi badi babutuka.”

⁴ Nanku Mvidi Mukulu kena umona bindi ngenza anyi? Udi ubadika njila yonsu indi ngenda.

⁵ Ndi muena dishima anyi? Ndi mudinge bantu anyi?

⁶ Mvidi Mukulu ampime ne tshipimu tshidi tshiakane. Nanku neamanye ne tshiena ne bualu.

⁷ Pikala makasa anyi masesuka mu njila ivuaye mundeje, pikala muoyi wanyi mualakane bivua mesu anyi majinga, pangikala munyange bianza bianyi ne malu mabi,

⁸ nanku muntu mukuabu adie bindi mumiamine. Biakudia bitshidi pa madimi babibutule.

⁹ Pangikala mualakane mukaji wa muena mutumba, mumutentekela, nansha musokome pambelu ku tshiibi tshiende,

¹⁰ nanku mukajanyi akuatshile muntu mukuabu mudimu. Balume bonsu bamubuelele mu nzubu!

¹¹ Bualu diba adi ndi mubunde tshibawu tshinene, tshidi ndumbulula yonsu mua kunyoka muntu bikole.

¹² Diba adi, tshilema tshianyi tshivua mua kuikala bu kapia, kadi kanshidisha, kosha bionsu bimvua mupete.

¹³ Pavua muena mudimu wanyi mulume, nansha muena mudimu mukaji ne bualu, mvua mmuteleja, mmulongoluela tshilumbu anu mu buakane.

¹⁴ Meme tshiyi muenze nanku, Mvidi Mukulu yeye mungase tshilumbu, tshimvua mua kuenza ntshinyi? Yeye mukonkonone bualu bujima, tshimvua mua kuandamuna ntshinyi?

¹⁵ Bualu Mvidi Mukulu udi mumfuke meme munda mua mamu. Badi bangenzela mudimu, ke yeye udi mubafuke munda mua bamamuabu.

¹⁶ Mvua mubenge kuambuluisha bapele anyi? Mvua mushiye bakaji bakamba mu dikenga anyi?

¹⁷ Mvua mudie biakudia bianyi anu nkayanyi anyi? Mvua mupale muana nshiya bimvua nabi anyi?

¹⁸ Nansha kakese! Biangatshile ku buana buanyi, mvua muvuluke muana nshiya, mvua mumukoleshe bu mudi tatu wenza. Mvua mukuate tshianza tshia mukaji mukamba bua kumuludika.

¹⁹ Mvua mumone mupele kayi ne bilamba, mukengi kayi ne tshia kudibuikila.

²⁰ Meme kumuvuadika tshilamba tshia luya, tshienza ne miosa ya ku mikoku yanyi, yeye kungela tuasakidila.

²¹ Bu meme mukanyina muana nshiya ku tshilumbuluilu, bualu bandumbulula bonsu mbalunda banyi,

²² dikaya dianyi dituke ku mbaala, diboku dianyi ditshibuke mu lukengibua.

²³ Bualu ndi ntshina Mvidi Mukulu udi mua kunyoka. Tshiena mua kuenza bidiye ubenga to.

²⁴ Mvua mutekemene kudi tshiamu tshia mpawungi anyi? Mvua mutshiambile ne: “Kuudi wewe ke kundi mpeta dikisha anyi?”

²⁵ Tshivua muditambishe bua biuma bivule bimvua nabi nansha. Tshivua muditembe bua bintu bia bungi bimvua mupete, ku mudimu wanyi.

²⁶ Pamvua mmona diba dikenka muadi muonsu pamvua mmona ngondu wenda utokesha buloba,

²⁷ muoyi wanyi uvua mulenduke mu musokoku anyi? Mvua mubinemeke bu mvidie anyi?

²⁸ Bu meme muenze nanku, bandumbulula bavua mua kunnyoka, bualu diba adi mvua muyile Mvidi Mukulu wa bukole buonsu.

²⁹ Mvua ne disanka pavua muluishi wanyi mu dikenga, nansha pavua diakabi dimukuata anyi?

³⁰ Tshivua nansha muanyishe bua kutshipa muluishi, nansha kumulombela kudi Mvidi Mukulu bua afue.

³¹ Udi kayi mudie munyinyi muanyi, nnganyi? Benyi bonsu bamvua muakidile badi mua kujadika bindi ngamba.

³² Muenyi kavua ulala pambelu musangu nansha umue. Ku mbelu kuanyi kuvua anu kunzuluila muena luendu yonsu.

³³ Mvua musokoke bilema bianyi anyi? Mvua muyile ntupakanyi yanyi anyi? Nansha bantu bavule benze nanku, kadi meme, tshivua muenze nanku to.

³⁴ Tshivua ne bowa bua kudileja patoke mu bantu nansha. Tshivua mutshine kapeja kabu. Tshivua mushale mupuwa ne bowa nansha.

³⁵ Wampetela muntu udi mua kunteleja nnganyi? Ku miaku yanyi imvua muambe, ndi mua kuela tshiala. Mvidi Mukulu wa bukole buonsu angandamune! Mukanda uvua muluishi wanyi mufunde bua kunsonguela,

³⁶ ndi muwambule pa makaya ne disanka, ndi muusuika ku mutu bu mukaba wa lumu.

³⁷ Nengambile Mvidi Mukulu malu onsu amvua muenze, nensemene kudiye mubandulule mutu bu mukalenga.

³⁸ Budimi buanyi budi mua kudila, mabula adi mua kuasa muadi,

³⁹ bualu mvua munowe tshiyi mudime anyi? Bualu tshivua mufute babidime anyi?

⁴⁰ Eyi, padibi nanku, mitshi ya meba ne bisosa bia tshianana, bimene mu madimi anyi, pa muaba wa ntete ya kuenza bukula ya mishindu mishilangane. Ke muvua miaku ya ndekelu ya Yobe nanku.