Yobe 28 - MUKANDA WA MYIDI MUKULU

Meji adi afuma penyi

¹ Bantu mbamanye muaba udibu bumbula tshiamu tshitoke tshia mushinga mukole, miaba idibu basukula tshiamu tshia mpawungi.

² Bantu badi bakeba tshiamu munda mua buloba, badi bapeta tshiamu tshia kabanda padibu bapanda mabue.

³ Bakebi ba biamu badi baya ne miendu munda mua buloba, badi bakenketa mabue, bumbula too ne mu miidima.

⁴ Badi bumbula njila muinshi mua buloba, miaba idi bantu kabayi base, kabayi mua kufika. Bakebi ba biamu, badi batenkakana, balembelela ku mionji.

⁵ Buloba budi bumenesha biakudia, kadi muinshi muabi bionsu mudi kapia kadi mua kubutula bionsu.

⁶ Badi basangana mabue a safire a mushinga mukole, mu mbuebue ya mu buloba. Mu lusenga luabu badi bapeta tubulu tua tshiamu tshia mpawungi.

⁷ Nyunyi wa mukanku kena mumanye njila ya muinshi mua buloba eyi to. Nansha nyunyi idi idiangana kayena mianji kumona miaba eyi to.

⁸ Nyama wa ntambue nansha nyama wa lonji, kabiena bianji kunyemena mu njila eyi to, nansha mukalenga wa bukua nyama kena muanji kupitshilamu.

⁹ Amu muntu udi ukimina kupanda mabue makole, udi usengula mikuna too ne ku tshitaku tshiayi.

¹⁰ Udi upanda njila munda mua lubuebue muaba awu. Tshionsu tshidi ne mushinga mukole udi utshimona ne mesu ende.

¹¹ Udi umisha too ne mpokolu ya mayi. Udi upatula biuma bivua bisokome mu buloba.

¹² Kadi meji badi mua kuasangana penyi? Lungenyi ludi lusomba muaba kaayi?

¹³ Kadi bantu kabena bamanye mudibu mua kubituila mushinga. Bualu kabena mua kubisangana mu matunga a bantu.

¹⁴ Nansha mayi manene malabale adi amba ne: “Meji kaena apa to.” Nansha dijimba dile didi diamba ne: “Meji kaena kuanyi nansha.”

¹⁵ Kabena mua kuashintakaja ku tshiamu tshimpe tshia mpawungi. Kabena baasumba ku tshiamu tshitoke tshia mushinga mukole, nansha tshiotshi bungi bishi?

¹⁶ Kaena mushinga umue ne tshiamu tshia mpawungi, tshia safire, nansha ne mabue a mushinga mukole a komaline.

¹⁷ Tshiamu tshia mpawungi nansha talatala, kabiena bifuanangane nawu ku mushinga. Kabena mua kuashintakaja ne luesu lua tshiamu tshia mpawungi.

¹⁸ Mabue makuabu a mushinga mukole: a korale anyi a kristale, kaena ne mushinga bu wa meji. Kupeta meji nkupita kukeba mabue a busanga mu mayi.

¹⁹ Dibue dia kalabi dia bena Kushe kadiena ne mushinga bu wa meji. Kabena baafuanyikija nansha ne tshiamu tshia mpawungi tshimpe menemene.

²⁰ Kadi meji adi afuma penyi? Nzubu wa lungenyi udi penyi?

²¹ Bantu kabena baamona. Nansha nyunyi ya mulu kayena yamona.

²² Lufu nansha kandondu ka bafua bidi biamba ne: “Eyowa, tuvua bumvua amu bantu bakula bua meji.”

²³ Amu Mvidi Mukulu mmumanye muaba udiwu afuma. Yeye nkayende ke udi mujingulule muaba udi nzubu wa meji.

²⁴ Bualu yeye ke udi utangila too ne ntengu ya buloba. Udi umona tshionsu tshidi muinshi mua diulu.

²⁵ Diba divuaye upima bujitu bua lupepele, ubujadika, ubushindika,

²⁶ diba divuaye ufundila mvula tshikondu tshiende ne muaba wende, uleja makubakuba njila wa kulonda,

²⁷ ke divuaye mumone meji, wateta. Ke divuaye ujingulula mushinga wawu, waanyisha.

²⁸ Pashishe uvua wambila bantu ne: “Meji nkunemeka Maweja-Nangila. Lungenyi nkumuka ku malu mabi.”