Yobe 27 - MUKANDA WA MYIDI MUKULU

Yobe kuandamuna kabidi ne: muena tshibawu udi mua kubikila Mvidi Mukulu bua amuambuluishe anyi?

¹ Pashishe Yobe kuamba kabidi ne:

² Ndi nditshipa mu dina dia Mvidi Mukulu udi ne muoyi, udi kayi musue kukosa nsambu yanyi biakane, mu dina dia Wa bukole buonsu udi unkengesha.

³ Matuku onsu andi ne muoyi panu, adi Mueyelu wa Mvidi Mukulu mu diulu dianyi,

⁴ mishiku yanyi kayivua miambe miaku ya dishima, ludimi luanyi kaluvua ludinga.

⁵ Tshiena musue kuitaba nansha kakese ne binudi nuamba bidi bia bulelela. Kashidi too ne ku lufu luanyi, nengambe amu kuamba ne tshiena ne bualu.

⁶ Ndi muenze bimpe. Tshiena mua kuyila bimvua muenze to. Tshiena mfua bundu bua dituku nansha dimue dimvua musombe panshi.

⁷ To, ki mmeme nansha, kadi udi unduisha, unkina, bamunyoke bu muena tshibawu.

⁸ Muntu udi kayi muitabe Mvidi Mukulu, padi Mvidi Mukulu umunyenga Mueyelu wende, udi ushala ne tshinyi?

⁹ Padi dikenga dimukuata, yeye mutendelele Mvidi Mukulu, neamuteleje anyi?

¹⁰ Pa mutu pa kusamuna Mvidi Mukulu amu lelu, uvua ne bua kukeba diakalenga diende kudi Mvidi Mukulu, kutendelela wa bukole buonsu matuku onsu.

¹¹ Ndi nnuleja mudi bukole bua Mvidi Mukulu. Tshiena nnusokoka meji adi munda muende nansha.

¹² Nuenu bonsu, nuvua bajingulule mudi Mvidi Mukulu. Nanku nudi nuamba miaku ya patupu bua tshinyi?

Dikasa dibi didi bantu babi batuta, kadiena dinenga

¹³ Umvuayi tshidi Mvidi Mukulu mulongoluele bena tshibawu, makenga adi Wa bukole buonsu ulongoluela bena tshibawu adi nenku:

¹⁴ Padi bana badibu balele bakola, badi babashipa mu mvita. Kabakuikala ne biakudia bikumbane.

¹⁵ Disama dia tshiambu nedishipe badi bashale, nansha bakaji babu, kabakubenzele madilu.

¹⁶ Nansha bobu bakunguje nkanu mitoke ya mushinga mukole, bungi bu lupuishi, nansha bakunguje bilamba bivule, mudibu bukunguje bitotshi,

¹⁷ kadi amu badi balamata Mvidi Mukulu nebabivuale, muntu muakane neangate nkanu ya mushinga mukole ayi.

¹⁸ Bantu aba mbase nzubu mitekete bu mutanda wa mabeji, bu muaba udi muntu, udi ulama budimi bua mvinyo usomba.

¹⁹ Badi ne biuma, kadi kabakukulakaja nabi. Padibu batabuluka, kabena ne tshintu kabidi to.

²⁰ Bowa budi bubakuata bu mudi mayi apasalala. Butuku, lupepele lukole lua mvunde ludi lubapepula luya nabu.

²¹ Lupepele ludi lufuma kudi diba dipatukila ludi lubambula, luya nabu kule, lubumusha ku bukole muaba udibu basombe.

²² Mvidi Mukulu kena ubumvuila luse, udi ukeba kubasa mikete yende. Badi mua kuepuka mikete yende anu padibu banyema lubilu.

²³ Bantu ba muaba udibu basomba badi babamona, badi batuta bikashi, bela tunkunduluila bua dikenga edi.