Yobe 24 - MUKANDA WA MYIDI MUKULU

Yobe udi wamba ne: Mvidi Mukulu udi ulekela bantu babi bua kuenzabu mudibu basue

¹ Mvidi Mukulu wa bukole buonsu, kena mutufundile matuku adiye ulumbuluisha bantu bua tshinyi? Diba adi, bantu badi bamulamate, badi mua kumona mudiye ukosa nsambu amu pa yoyi.

² Bantu badi batentemuna mikalu ya madimi abu, bua kuiba bena mutumba nabu. Bakuabu badi biba mikoku ya bende, badi bayidishila mu mpata.

³ Bamue badi banyenga bana ba nshiya mpunde yabu, nansha badi mua kuangata ngombe wa mukaji mukamba bu tshieya.

⁴ Badi basakila bakengi ku mielelu ya njila. Badi batshinyisha bapela bua banyeme, basokome.

⁵ Nanku bu mudi mpunde muitu mu bipela, ke mudi bapela baya kukuata mudimu, bakeba biakudia mu tshipela, bua bamone mua kudisha bana.

⁶ Badi ne bua kuangula bisosa bidi mu madimi, nansha kupumbulula tumuma tua mvinyo mu budimi bua muntu mubi.

⁷ Kadi butuku, badi balala kabayi ne tshia kudibuikila. Kabena nansha ne tshilamba tshia kudibuikila bua mashika.

⁸ Mvula idi iloka pa mikuna, mmibabolesha. Bu mudibu kabayi ne muaba wa kusokoma, badi balamatangana ne mbuebue.

⁹ Badi banyafula muana nshiya ku dibela dia mamuende. Badi banyenga bapela tshinkutu ku bukole bu tshieya.

¹⁰ Badi bendesha bapela butaka. Bakengi badi ne nzala, badi ne bua kuambuila babanji miepu ya ntete ya kuenza bukula.

¹¹ Badi ne bua kukama mafuta mu tshiamu, nansha tumuma tua mvinyo, kabayi mua kubilabula to.

¹² Mu tshimenga, bantu badi batua mikemu, badi bapunga ne lufu, bela mbila. Kadi Mvidi Mukulu kena uteleja miadi ya bantu abu nansha.

¹³ Bantu babi badi babenga butoke. Kabena balue kukeba njila idi Mvidi Mukulu utuleja nansha. Kabena basue kuyilonda nansha.

¹⁴ Patshiatshia, mushipianganyi udi ujuka, uya kushipa mukengi udi kayi ne tshintu. Padi butuku buila, udi uya kuiba.

¹⁵ Mulume muena tshiendenda udi utentekela butuku, wamba ne: “Mpindiewu nempite kabayi bammona.” Nanku udi udibuikila kabidi tshilamba ku mesu.

¹⁶ Mu butuku, muivi udi utubula bimana bia nzubu, mu munya udi ushala musokome kuende, bualu udi utshina butoke.

¹⁷ Bonsu aba badi batshisha ne miidima. Bualu mbibidilangane amu ne miidima ya butuku.

¹⁸ Kadi nuenu nudi nujadika ne: “Bena malu mabi nebapueke ne mayi. Mvidi Mukulu mmutshipe madimi abu. Kabena mua kuya kukuata mudimu mu budimi bua mvinyo to.

¹⁹ Mudi mabue a mvula enguluka padi diba dibanda, ke mudi bena tshibawu babuela mu kandondu ka bafue bajimina.

²⁰ Mamu uvua mubalele ukadi mubapue muoyi. Badi babadia kudi misanda. Bantu kabena babavuluka kabidi to. Badi batshibula bubi bu mudi mutshi.

²¹ Bantu aba bavua bakengesha mukaji wa nkumba udi kayi mulele, bavua batatshisha mukaji mukamba.

²² Kadi Mvidi Mukulu udi ne bukole bua kubutula bena tshikisu. Padiye ujuka bantu babi badi bafue.

²³ Mvidi Mukulu udi muanyishe bua bende badiunwue, basombe talalaa. Kadi udi umona bionsu bidibu benza.

²⁴ Bantu aba, badi ne diakalenga amu katupa kakese, pashishe badi bafua. Badi binama, bafuba bu tshilongu. Badi bu miepu idibu bakosa.”

²⁵ Kadi tshindi ngamba meme ntshilelela! Udi mua kuntuisha bu muena dishima nnganyi? Udi mua kungamba ne: udi mutupakane, udiku anyi?