Yobe 23 - MUKANDA WA MYIDI MUKULU

Yobe kuandamuna ne: Mvidi Mukulu mmubenge bua kuyukilangana nanyi

¹ Pashishe Yobe kuamba ne:

² Tshivua musue bua bantu bumvue mikemu yanyi. Kadi nansha mpindiewu, ntshidi ntua anu mikemu.

³ Eyi, bu meme mumanye muaba udi Mvidi Mukulu, mvua mua kuya too ne kuende.

⁴ Diba adi mvua mua kumuleja tshilumbu tshianyi patoke, mvua mua kudilumbuluila bua amanye tshindi ngela meji.

⁵ Musangu awu mvua mua kumanya tshivuaye mua kungandamuna. Mvua mua kujingulula tshidiye musue kungambila!

⁶ Mvidi Mukulu udi ne bua kunduisha muende muonsu anyi? Too, mbikumbane bua anteleje ne ntema.

⁷ Mvua mua kuyukidilangana nende bualu ndi muntu muakane. Yeye mukoshi wa nsambu uvua mua kumbingisha kashidi.

⁸ Kadi meme muye eku nansha eku, kenaku nansha. Tshiena mua kumusangana to.

⁹ Udi ukuata mudimu ku mutu kua ditunga anyi? To! Tshiena mumumoneku to. Kadi mmusokome kuinshi kua ditunga anyi? Tshiena musunguluje bualu to.

¹⁰ Kadi Mvidi Mukulu udi mumanye bimpe njila undi ndonda, kuntetaye. Meme kupatuka mu kapia anu bu tshiamu tshia mpawungi tshitoke zezeze.

¹¹ Meme kulonda amu mu makasa ende. Tshivua mupambuke mu njila ivuaye undeja.

¹² Tshivua mubenge kukumbaja bivuaye muntumine diyi, meme kuenza bivuaye mujinge, bivuaye mumfundile bua kuenza.

¹³ Mvidi Mukulu udi muena diyi dimue. Udi mua kuandamuna ngenzelu yende udiku anyi? Tshidiye musue, udi amu utshikumbaja.

¹⁴ Neankumbajile bionsu bivuaye mungelele meji bua kungenzela. Bidiye musue kungenzela bidi bia bungi be.

¹⁵ Ke padi bowa bunkuata kumpala kuende. Eyowa, pandi mpita kuela meji, ndi mpita kumutshina.

¹⁶ Bualu Mvidi Mukulu udi muntekeshe mu maboku. Udi unkuatshisha bowa, bualu udi wa bukole buonsu.

¹⁷ Tshidi tshinzakeja ki mmidima nansha, kadi amu yeye Mvidi Mukulu. Bushuwa, ndi mu miidima, ndi bu mpofu udi kayi umona bimpe.