Yobe 21 - MUKANDA WA MYIDI MUKULU

Yobe kuandamuna ne: bantu babi ke badi batuta dikasa dimpe

¹ Yobe udi wandamuna ne:

² Teleja amu tshindi ngamba, ke munudi mua kunsamba mene!

³ Nuanyishe, nuitabe mua meme kuakula munudi basue. Meme mumane kuakula, nudi anu mua kunseka.

⁴ Undi meme mua kuasa tshilumbu, mmuntu wa panu anyi? Nansha kakese! Ke mundi anu mua kupanga lutulu.

⁵ Nuntangile bimpe, nanku nenuzakale, nupuwe tshianza ku mishiku.

⁶ Pandi ngela meji a bionsu bivua bingenzekele, mubidi wanyi mujima udi uzakala ne bowa.

⁷ Mudi bantu badi bela Mvidi Mukulu nyima, bashala ne muoyi, benda bakola, bakulakaja mene mbishi?

⁸ Badi balela bana, batuala ne bikulu, batshidi bamona ne mesu abu, mudi ndelanganyi yabu yenda ikola.

⁹ Mu nzubu muabu, bionsu bidi bienda amu biakane. Kabena bakuatshisha bowa. Dikenga dia kudi Mvidi Mukulu kadiena dibakuata to.

¹⁰ Misangu yonsu idi mulume wa ngombe wimitshisha mukaji difu, awu udi ulela kana ka ngombe kayi mua kutula difu.

¹¹ Bana ba bantu babi aba badi banyema bu mikoku, bikulu babu badi batupika, baja maja.

¹² Badi bimba ngoma ne lunzenze basanka, bateleja bedi ba nshiba ne musangelu.

¹³ Bamane kulala panu ne diakalenga, badi bafua talalaa, babuela mu dijimba dia bafue.

¹⁴ Kadi abu bantu bavua bambila Mvidi Mukulu ne: “Katuena nebe ne bualu. Katuena basue kumanya tshiudi musue.

¹⁵ Badi bakuinyika ne: wa bukole buonsu. Kadi tudi ne bua kuikala bapika bebe anyi? Patudi tukutendelela, tshitudi tupeta ntshinyi?”

¹⁶ Bantu aba badi bamba diakamue ne: Diakalenga ditudi nadi ndifume ku mudimu wetu tuetu. Ke mudibu balengulula Mvidi Mukulu nanku,

¹⁷ Muendu wa bantu aba udi ujima misangu mivule anyi? Misangu bungi munyi idi dikenga dibakuata? Mvidi Mukulu udi ubanyoka ne tshiji anyi?

¹⁸ Badi baya nabu bu mudi lupepele luambula bisosa anyi? Peshi bu mudi mvunde ujula lupuishi anyi?

¹⁹ Kadi nuenu nudi nuamba ne: “Mvidi Mukulu neanyoke bana ba bantu babi aba.” Kadi Mvidi Mukulu kena unyoka batatuabu bena tshibawu bua tshinyi? Diba adi bavua mua kumanya ne badi batunyoka bua bubi buetu.

²⁰ Bena malu mabi ke bavua mua kubuela mu dikenga, ke bavua mua kumvua pambidi pabu tshiji tshidi Mvidi Mukulu wa bukole buonsu natshi.

²¹ Bualu muntu mumane kufua, diakalenga anyi diakabi, dia bana babu kadiena dimutangila kabidi yeye to.

²² Muntu udi mua kulongesha Mvidi Mukulu malu anyi? Mvidi Mukulu ke udi ulumbuluisha ne batumibue bende mene.

²³ Bantu bakuabu badi basomba bimpe too ne ku lufu luabu, kabena ne lutatu, nansha dikenga.

²⁴ Badi badiunda ne mubidi muimpe, bu wa bansonga.

²⁵ Kadi bakuabu badi bafua ne kanyinganyinga kakole, kabayi bapeta disanka panu nansha dimue.

²⁶ Kadi bonsu aba badi amu balala munda mua buloba, anu matuku makese, bikusu bikadi bibadia.

²⁷ Kadi ndi mumanye meji anudi nuela. Nudi nukeba kumpisha ne nkonku yenu.

²⁸ Bualu nudi nuebeja ne: “Nzubu wa muena biuma awu udi penyi? Nudi mua kutuleja muaba udi muena malu mabi usomba anyi?”

²⁹ Kadi nuenu kanuena banji kuyukila ne bantu badi bafuma ku luendu anyi? Kanuena banji kuteleja malu adibu bajadika anyi?

³⁰ Padi dikenga difika, kadiena dikuata muena malu mabi. Tshiji tshia Mvidi Mukulu katshiena tshimulenga to.

³¹ Utshidi mua kubela muntu uvua wenza bubi nanku nnganyi? Udi mua kumunyoka bua bibi bivuaye muenze udiku anyi?

³² Padi muntu awu ufua, badi batshisha pambelu mu madilu, bamujika amu bimpe mu lukita luende.

³³ Bantu bonsu badi bamushindikija. Bantu ba bungi badi basempela kumpala kua tshitalu tshiende. Nansha buloba mene budi bupepele pambidi pende.

³⁴ Nuenu munudi basue kunsamba ne miaku ya bupale mbishi? Bionsu binudi nuamba bidi patupu, bidi anu bua kudinga bantu.