Yobe 17 - MUKANDA WA MYIDI MUKULU

Yobe kuandamuna kabidi ne: tshiena mua kutekemena kabidi to

¹ Ndi ngeyela ne lutatu, muoyi wanyi mmushikile munda, lukita luanyi lukadi buashi.

² Badi banyungulukila, badi anu banseka bampenda butuku bujima, tshiyi nansha mua kulala to.

³ Mvidi Mukulu wanyi udi musue kundumbuluisha, kadi wewe mene undumbuluile. Wewe kuyiku, udi mua kungambuluisha nnganyi?

⁴ Udi mumushe meji mu mutu mua balunda banyi. Kuanyishi bua bantshimune.

⁵ Badi bu muntu udibu bela mu lusumuinu ne: “Kuvua muntu mubikile balunda bende bua kudia nabu biakudia, kadi bana bende balala ne nzala.”

⁶ Meme ndi bu muntu udibu bela mate mu mpala, badi bansaka mu misambu, banseka.

⁷ Bua dikenga dindi nadi, mesu anyi adi amona bilejileji, mubidi udi mpindiewu anu bu mundidimbi.

⁸ Bantu ba muoyi muimpe badi bamona dikenga dianyi, badi bakatshila. Bantu badi badiamba ne: tudi bantu bimpe, badi bakema, bamona meme bu muena tshibawu.

⁹ Badi bamba ne: “Bantu badi bitaba Mvidi Mukulu, bananukile mu njila wabu, badi kabayi ne tshilumbu, bashale amu nanku.”

¹⁰ Kadi nuenu balunda banyi, semenayi pabuipi, luayi tshiena musangane muena meji nansha umue munkatshi muenu!

¹¹ Matuku anyi a panu mmamane kusemena, bimvua muele meji bua kuenza, bimvua mujinge kabiakukumbana nansha.

¹² Bu meme ne bua kuitaba balunda banyi, buanyi butuku mmunya. Ndi mumanye ne: butuku mbumane kuila. Kadi nudi nuamba ne: “Butuku mbumane kutshia.”

¹³ Ndi mua kutekemena kabidi tshinyi? — Nembuele mu dijimba dia bafue, bua meme kulala mu miidima.

¹⁴ Ndi ngambila lukita luanyi ne: “Wewe ke tatu wanyi.” Ndi ngambila bikusu ne: “Nuenu ke mamu wanyi, ne muanetu wa bakaji!”

¹⁵ Tshindi meme mua kutekemena kabidi ntshinyi? Kudi muntu udi mua kutshindeja anyi?

¹⁶ Bindi mutekemene bidi biya nanyi mu dijimba dia bafue. Tudi tuya kuikisha nabi mu lupuishi.