Yobe 12 - MUKANDA WA MYIDI MUKULU

Yobe kuandamuna ne: mudi Mvidi Mukulu utukengesha, tudi tukeba mua kumumvua tupanga

¹ Pashishe Yobe kuamba ne:

² Bushuwa, amu nuenu nkayenu ke badi ne meji, nuenu bafua, meji adi afua kabidi.

³ Kadi meme kabidi ndi ngela meji anu bu nuenu! Lungenyi lundi nalu kaluena lushadile ku luenu. Udi kayi mumanye bia nanku nnganyi?

⁴ Pandi ndomba kudi Mvidi Mukulu bua angandamune, tshidi tshingenzekela ntshinyi? Nkadi bu muntu udibu balembakaja kudi balunda bende, udibu bapetula, nansha meme tshiyi ne tshilumbu, tshiyi muenze bibi.

⁵ “Muena dikenga badi bamuseka bikole.” Ke meji a bantu badi kabayi ne lutulu. Muntu udi ukeba kudishinda, badi bamuela museba.

⁶ Bena tshikisu badi basomba kabayi bapampakana. Badi bajula tshiji tshia Mvidi Mukulu badi ne ditalala. Bukole buabu ke wabu mvidie, kabena bamanye mvidie mukuabu.

⁷ Kadi wanji kukonka nyama ne nyunyi, nebikulongeshe.

⁸ Nanku ebeja buloba, nebukuambile malu. Mishipa idi mu mayi manene neikulongeshe malu a bungi.

⁹ Munkatshi mua bifikibua bionsu ebi, tshidi katshiyi tshimanye ne: Maweja-Nangila, ke udi muenze bionsu ebi, tshidiku anyi?

¹⁰ Amu yeye ke udi mulame mu tshianza tshiende, muoyi wa bifukibua. Mueyelu wa bantu mmufume kudiye.

¹¹ Bena kale bavua bela lusumuinu ne: “Ditshi mudimu wadi ngua kujingulula malu adi bantu bamba, bu mudi tshilakalaka tshijingulula buimpe bua biakudia.

¹² Bantu bakulumpe badi bajingulula malu. Badi balala panu baboboke, ke badi ne lungenyi.”

¹³ Kadi udi ujingulula malu, udi lungenyi lutue, udi amu Mvidi Mukulu. Yeye udi kabidi ne bukole ne meji, bidiye ne bua kukumbaja.

¹⁴ Tshidi Mvidi Mukulu mupule, kabena batshibakulule kabidi. Udiye wela mu lukanu, kabena mua kumupatulamu nansha!

¹⁵ Padiye kayi mulokeshe mvula, bionsu bidi biuma. Padiye amu ulokesha mvula, buloba budi bunyanguke.

¹⁶ Amu yeye ke udi ne bukole, anu yeye ke udi utshimuna. Muntu udi upambuka, ne muntu udi upambuisha mukuabu, bonsu babidi mbantu bende yeye.

¹⁷ Mvidi Mukulu, udi wendesha ku makasa kutupu bavua balombola ditunga. Udi ujimija lungenyi lua bantu bavua balumbuluila bantu nabu.

¹⁸ Udi usulula mukaba wa bumfumu wa bakalenga, ubasuika muonji wa bupika mu tshimonu.

¹⁹ Nansha batuangaji babu, udi ubatuma mu bupika. Udi unyenga bantu bakane mianzu ivuabu bapete kale.

²⁰ Udi upuwisha bavua bamanye mua kufila lungenyi. Bantu bakulakaje, udi ubanyenga meji avuabu nawu.

²¹ Bantu bavuabu banemeka, bakadi babapepeja. Bena tshikisu, udi ubanyenga bukole buabu, bashale bianza bitupu.

²² Udi utuma butoke muaba udi miidima, uleja patoke bivua bisokome mu miidima.

²³ Udi uvudija bantu, pashishe udi ubabutula. Udi ubamuangalaja, ubapingaja kuabu.

²⁴ Udi utshimbisha bamfumu ba matunga, ubatambakajija mu tshipela kamuyi njila.

²⁵ Bakadi benda babubuta butuku kabayi bamona tshintu. Batetuka bu bakuatshika maluvu.