Yirmeya 5 - MUKANDA WA MYIDI MUKULU

Bena tshimenga bonsu mbena buenzavi (Maweja-Nangila)

¹ Endakanayi misesu yonsu mu Yerushalayime. Nutangile bimpe, nukebulule. Nutangile mu bisalu bionsu. Nuenu bapete muntu nansha umue udi wenza malu mempe, udi musue kuikala muntu muakane, nuenu basangane muntu wa nanku, meme Maweja-Nangila nemfuile Yerushalayime luse.

(Yirmeya)

² Padi bena mu Yerushalayime baditshipa bamba ne: “Tudi tuditshipa mu dina dia Maweja-Nangila udi ne muoyi…”, mitshipu eyi nya dishima.

³ Maweja-Nangila, tshidi tshikusankisha ki nnsombelu muimpe wa muntu anyi? Wewe kunyoka bantu bebe, kadi dinyoka adi kadiena dibelesha meji to. Uvua musue kubabutula bonsu, kadi kubengabu mibelu yebe. Bena Yerushalayime mbena tshitunu. Badi babenga kupingana kuudi.

⁴ Meme kuamba ne: “Bantu badi benza nanku mbantu bapele nkayabu. Kabena ne lungenyi to. Kabena bamanye tshidi Maweja-Nangila musue. Kabena bamanye mikenji ya Mvidi Mukulu wabu.

⁵ Ndi musue kuyukila ne bantu baneme. Bobu badi bamanye tshidi Maweja-Nangila musue. Badi bamanye mikenji ya Mvidi Mukulu wabu.” Kadi, bantu bonsu badi amu mushindu umue, kabena batshina kabidi Maweja-Nangila. Badi babenga mikenji ya ndondu ivuabu batue nende.

⁶ Nanku, nyama wa ntambue neapatuke muitu, abaluishe. Nyama wa tshimungu neapatuke mu mpata, abasunsule. Tshisumpa ntambue netshibaalamine pabuipi ne bimenga biabu. Netshipandulule bantu bonsu badi bapatukamu. Bualu bantu badi amu ne buenzavi. Badi bela Mvidi Mukulu nyima misangu mipite bungi kayiyi kubala.

(Maweja-Nangila)

⁷ Wewe Yerushalayime, ndi ne bua kukufuila luse bua tshinyi? Bana bebe mbambenge. Badi batela mvidie ya tshianana padibu baditshipa. Meme kubapesha bintu bionsu bua badie bukute. Kadi bobu kuenda anu tshiendenda. Badi basomba diba dionsu anu mu nzubu wa mukaji muena tshiendenda.

⁸ Badi bu nyama midiunde ya tubalu milume, tshikondu tshidiyi ikeba nyama mikaji. Bonsu badi bakekemena, babikila mukajabende.

⁹ Maweja-Nangila udi ukonka ne: Tshiena mua kunyoka bantu aba anyi? Tshiena mua kudisombuela bua tshisamba tshia mushindu ewu anyi?

¹⁰ Nentume baluishi bua kunyanga madimi abu a mvinyo adi pa mikuna. Kadi kabakunyangakaja madimi onsu to! Nebakose matamba adi kaayi anyi meme Maweja-Nangila!

¹¹ Maweja-Nangila udi wamba ne: Bulelela, bena mu bukalenga bua Yuda, ne bena mu bukalenga bua Izrayele, bonsu mbantombokele!

Malu adi enzekela bantu badi balengulula Maweja-Nangila

¹² Bena Yuda badi bayila Maweja-Nangila, bamba ne: “Kena ne tshidiye mua kutuenzela. Tuetu katuena mua kukenga. Kabena mua kutuluisha. Katuena mua kupeta tshiyole tshia nzala to.

¹³ Bidi bambi benda bamba bidi bipite amu bu lupepele. Kabena bamba malu mu dina dia Maweja-Nangila to. Malu adibu bamanyisha abakuate amu bobu!”

¹⁴ Maweja-Nangila wa bukole buonsu udi wamba ne: “Bu mudibu bakula nanku, wewe Yirmeya, ndi nkutuma. Meyi audi wamba ikale bu kapia. Bantu aba nebikale bu nkunyi. Kapia aka nekababutule.

¹⁵ Maweja-Nangila udi wamba ne: nuenu bena Izrayele, nennutumine tshisamba tshikuabu, tshidi tshifume kule bua tshinuluishe. Tshisamba atshi kabena mua kutshipita bukole to. Tshisamba atshi ntshia ku bisamba bia kale. Kanuena mua kumvua muakulu watshi. Bidi bantu aba bamba kanuena mua kubimanya to.

¹⁶ Mikete ya mvita ya tshisamba atshi idi ibutula bantu. Bena mvita batshi bonsu badi bilobu.

¹⁷ Bena tshisamba atshi nebadie bintu bienu bionsu, binudi nunowa, ne binutshidi nabi mu mayeba, bana benu ba balume ne ba bakaji, bimuna bienu binene ne bikese, mionji yenu ya mvinyo ne mitshi yenu ya bimuma. Bena mvita nebanyangakaje bimenga bienu bivuabu bakoleshe ne bimana, muaba unudi nuela meji ne: njiwu kayena mua kutukuata munemu to.”

¹⁸ Kadi Maweja-Nangila udi wamba ne: Tshikondu atshi, tshiena musue kunubutula bonsu to.

¹⁹ Kadi, pakonkabu ne: “Maweja-Nangila wetu mmutukengeshe nenku bua tshinyi,” wewe Yirmeya, wandamune ne: “Bualu nudi babenge Maweja-Nangila, bua kutendelela mvidie ya bantu ba bisamba bikuabu munda mua ditunga dienu. Nenku, nenuye momumue mu ditunga dia bende bua kukuatshila bantu ba bisamba bikuabu mudimu!”

Bantu badi balengulula bumfumu bua Mvidi Mukulu

²⁰ Maweja-Nangila udi wamba ne: Ambila ndelanganyi ya Yakobe manyisha bena Yuda ne:

²¹ Telejayi, nuenu bantu tshianana, badi kabayi bumvua bualu, kabayi ne lungenyi. Nuenu nudi ne mesu, kadi kanuena numona to. Nudi ne matshi, kadi kanuena numvua.

²² Maweja-Nangila udi ukonka ne: Kanuena nuvuluka bukole buanyi anyi? Kanuena nuntshina bua tshinyi? Meme ndi muteke lusenga bua luikale mukalu wa mayi manene. Ludi bu nkila muasa bua kashidi. Mayi kaena mua kusambuka nkila awu to. Adi atuuta ku nkila, kadi nkila kena ubumbuka to. Mavuala adi atuutaku ne tshiona tshikole, kadi kaena asambuka nkila to.

²³ Kadi nuenu nudi bantu ba tshitunu. Nudi bantu batomboke. Nuenu kuntombokela meme Maweja-Nangila, nuenu kumuka kundi, muntu yonsu ulonda wende njila.

²⁴ Kadi nuvua mua kuamba ne: “Tudi mua kunemeka bumfumu bua Maweja-Nangila Mvidi Mukulu wetu. Bualu udi utupa mvula amu pa diba diende. Kabidi ku tshidimu tshionsu udi ukuata mudimu, bua bintu bia mu madimi bipie diba diakane.”

²⁵ Buenzayi buenu mbunyangishe bionsu ebi. Bubi buenu kunupangisha masanka onsu aa.

²⁶ Munkatshi mua bantu banyi bena Izrayele mudi bantu badi kabayi ne ditaba, kabayi balama mikenji. Badi bu bilembi bidi bialamina nyunyi bua kuyikuata. Basokome munkatshi mua mitshi, badi bateya bantu, babakuata.

²⁷ Bu mudi nsanji muwule tente ne nyunyi, ke mudi nzubu ya bena Izrayele miwule tente ne bintu bivuabu bapete mu buivi. Ke padi bena Izrayele bapete bukole, bapete bubanji bua bungi.

²⁸ Bena Izrayele badi badiunda bikole, mubidi wabu mmusenene. Kadi badi anu benza malu mabi, kabayi bapungila. Kabena bakosa nsambu pa yoyi, kabena bakuila bana ba nshiya mu bilumbu biabu, bua bamone mua kubinga. Kabena bambuluisha bapele, bua bapete bidibu ne bua kupeta.

²⁹ Maweja-Nangila udi ukonka ne: Tshiena mua kunyoka bantu aba anyi? Tshiena mua kudisombuela bua ditunga dia nanku anyi?

³⁰ Bualu budi buenzeka mu ditunga emu mbualu budi bukemesha, bukuatshisha bowa.

³¹ Bambi, badi bamba malu mu dina dia mvidie ya tshianana. Batuangaji badi bakeba amu kudisankisha nkayabu. Bantu banyi bena Izrayele badi banyisha bionsu ebi. Kadi, ku nshikidilu nenuenze tshinyi?