Yirmeya 39 - MUKANDA WA MYIDI MUKULU

¹ Mu tshidimu tshia tshitema tshia bukalenga bua Sedekiya, mukalenga wa bena Yuda, mu ngondu wa dikumi, mukalenga Nebukadnesare wa mu Babilone uvua mufike ne tshiluilu tshiende tshionsu bua kuluisha Yerushalayime.

² Mu tshidimu tshia dikumi ne tshimue, dituku dia tshitema dia ngondu muinayi, bena Babilone bavua bapande disosu ku tshimana tshia tshimenga.

³ Nanku balombodi bonsu ba bena mvita ba bena Babilone kubuela mu tshimenga, kuimanabu ku tshiibi tshia pankatshinkatshi. Muaba awu, uvua Nergale-Sareshe, mulombodi wa balombodi ba bena mvita, Samgare-Nebo, Sare-Sekime, muntu uvua mufidi wa ngenyi wa kumpala wa mukalenga, ne balombodi ba bena mvita ba bena Babilone bakuabu bonsu.

⁴ Mukalenga Sedekiya ne bena mvita bende, kunyemabu pavuabu bamone bena Babilone. Butuku buila, kumukabu mu tshimenga. Kupitshilabu ku lupangu lua bukalenga ne ku tshiibi tshivua pankatshi pa bimana bibidi. Pashishe kupitshilabu mu njila uvua mutangile mu tshibanda tshia Yardene.

⁵ Kadi bena mvita ba bena Babilone kubalondakaja, kuluisha kabidi mukalenga Sedekiya mu mpata wa Yeriko, kumukuatabu. Pashishe, kumufilabu kudi Nebukadnesare, mukalenga wa mu Babilone uvua ku Ribla mu ditunga dia Amate. Aku ke kuvua mukalenga Nebukadnesare mulumbuluishe mukalenga Sedekiya.

⁶ Ke kuvuaye mushipeshe kabidi bana ba balume ba mukalenga Sedekiya, tatuabu mutangile. Yeye kushipeshamu kabidi bakulu bonsu ba bena Yuda.

⁷ Kutumabu Sedekiya ku Babilone, musuike ne nkanu bikole, mutonkone mesu.

⁸ Bena Babilone kuosha nzubu wa bukalenga mu Yerushalayime, ne nzubu mikuabu. Kushimbulabu kabidi tshimana tshia tshimenga.

⁹ Pashishe, Nebuzaradane, mfumu wa bena mvita balami ba mukalenga, kukuata bantu bavua bashale mu tshimenga ne bavua badifile kudiye, too ne bena midimu ya bianza bavua bashale.

¹⁰ Mu ditunga dia bena Yuda kushiyaye amu bantu bapele bavua kabayi ne kantu. Kubabanyinaye mionji ya mvinyo, kubapeshaye ne madimi.

Badi bapatula Yirmeya mu lukanu

¹¹ Mukalenga Nebukadnesare uvua muelele Nebuzaradane, mfumu wa bena mvita balami ba mukalenga mikenji ivua itangila Yirmeya. Uvua mumuambile ne:

¹² “Uye kukeba Yirmeya, kadi kumuenzedi bibi to. Umuenzele muonsu muakuambilaye!”

¹³ Ke Nebuzaradane, mfumu wa bena mvita balami, kumyuangana ne Nebushazbane, mufidi wa ngenyi wa kumpala wa mukalenga, kabidi ne Nergale-Sareshe, mfumu wa balombodi be bena mvita, ne balombodi banene bakuabu babena mvita ba mukalenga wa Babilone.

¹⁴ Kutumaye diyi bua baye kuangata Yirmeya mu lubanza lua bena mvita balami ba mukalenga. Ke kumupatuishamu, bamufite kabidi kudi Ngedaliya, muana wa Akikame, ne muikulu wa Shafane. Ngedaliya uvua muanyishe bua bafile Yirmeya kuende. Ke Yirmeya kusomba mpindiewu munkatshi mua bantu bakuabu.

Malu adibu bamanyisha Ebede-Meleke

¹⁵ Tshikondu tshivuabu balame muambi Yirmeya mu nzubu wa lukanu, Maweja-Nangila uvua mumuambile ne:

¹⁶ — Uye kuambila Ebede-Meleke, muena Kushe ne: “Maweja-Nangila wa bukole buonsu Mvidi Mukulu wa Izrayele udi wamba ne: Mvua muambile bantu ba mu tshimenga etshi ne: nenupete dikenga, kanuakupeta disanka to. Nanku nengenze bionsu bimvua muambe. Nenujadike bionsu abi amu mpindiewu.

¹⁷ Kadi pafika dituku dia dikenga, tshiakuanyisha bua uye mu bianza bia bantu baudi utshina.

¹⁸ Eyowa, nenkuepule ku lufu. Neushale ne muoyi, bualu uvua muntekemene meme. Ke mundi meme Maweja-Nangila ngamba nanku.”