Yirmeya 36 - MUKANDA WA MYIDI MUKULU

Yoyakime udi osha muvungu wa tshiseba uvuabu bafunde kudi Baruke

¹ Mu tshidimu tshinayi tshia bukalenga bua Yoyakime, muana wa Yoshiya, mukalenga wa bena Yuda, Maweja-Nangila kuambila Yirmeya ne:

² — wangata muvungu wa tshiseba, ufundemu malu onsu amvua mukuambile adi atangila bukalenga bua Izrayele, bukalenga bua Yuda, ne bisamba bikuabu biangatshile tshikondu tshia Yoshiya, pamvua mutuadije kukuambila malu too ne lelu.

³ Misangu mikuabu bena Yuda badi mua kumvua mundi musue kubatumina makenga. Nanku nebadilengeje. Nemmone mua kubafuila luse bua bilema biabu ne mibi yabu.

⁴ Nanku, Yirmeya kubikila Baruke, muana wa Neriya. Kumumanyishaye malu onsu avua Maweja-Nangila mumuambile. Baruke kuafunda pa muvungu wa tshiseba.

⁵ Pashishe, Yirmeya kuambila Baruke ne: — Mbakandike bua meme kubuela mu nzubu wa Mvidi Mukulu. Nanku meme tshiena mua kuyamu to.

⁶ Kadi wewe neubuelemu dituku dia kujila biakudia. Neubalemu ne diyi dikole malu avua Maweja-Nangila mungambile amvua mufundishe. Mu nzubu wa Mvidi Mukulu, neumvuije bantu bende too ne bonsu badi bafume mu bimenga bia Yuda malu aa.

⁷ Bumue nebasengelele Maweja-Nangila bua abafuile luse. Nanku nebadilengeje. Bualu Maweja-Nangila uvua muambe ne tshiji tshikole ne: bantu aba mbamfikishe munda bikole.

⁸ Baruke uvua mulonde mikenji yonsu ivua muambi Yirmeya mumuambile. Kubuelaye mu nzubu wa Mvidi Mukulu bua kubalamu ne diyi dikole malu a Maweja-Nangila avuaye mufunde pa tshiseba.

⁹ Ebi bivua bienzeke tshidimu tshitanu tshia bukalenga bua Yoyakime, muana wa Yoshiya, mukalenga wa bena Yuda, mu ngondu wa tshitema wa tshidimu atshi. Bavua babikidishe bantu bonsu ba mu Yerushalayime ne bonsu ba mu bimenga bia Yuda, bua bajile biakudia mu ngondu ewu bua kutalaja tshiji tshia Maweja-Nangila.

¹⁰ Baruke kuya kuimana kumpala kua bantu bonsu mu nzubu wa Mvidi Mukulu. Kubalaye ne diyi dikole bivua Yirmeya mufundishe pa muvungu wa tshiseba. Uvua musombe mu tshibambalu tshia Ngemariya, muana wa Shafane, mufundi wa kale wa mu bukalenga. Tshibambalu etshi bavua batshiasa mu lupangu lua kulu luaku nzubu wa Mvidi Mukulu, pabuipi ne tshiibi Tshipiatshipia.

¹¹ Mika, muana wa Ngemariya, ne muikulu wa Shafane, kumvua malu onsu a Maweja-Nangila avua Baruke mubale.

¹² Kupuekaye mu nzubu wa bukalenga, too ne ku muaba uvua mufundi wa mikanda musombe. Balombodi bonsu ba mu bukalenga bavua mu tshisangilu. Muaba awu uvua Elishama, mufundi wa mikanda ya mu bukalenga, Delaya, muana wa Shemaya, Elnatane, muana wa Akbore, Ngemariya muana wa Shafane, Sidekiya, muana wa Ananiya, ne balombodi bakuabu bonsu ba mu bukalenga.

¹³ Mika kubambila malu onsu avuaye mumvue pavua Baruke ubala ne diyi dikole malu avua pa tshiseba kumpala kua bantu bonsu.

¹⁴ Nanku, balombodi ba mu bukalenga kutuma Yekudi, muana wa Netaniya, ne muikulu wa Shelemiya. (Shelemiya uvua muana wa Kushi), bua kuambila Baruke ne: ufike ne muvungu wa tshiseba uuvua mubadile bantu bonsu. Nanku Baruke kuangata muvungu wa tshiseba kuya kudibu.

¹⁵ Kumuambilabu ne: — Somba panshi, utubadile malu adi mu muvungu wa tshiseba awu. Pashishe kubabadilaye mukanda.

¹⁶ Balombodi ba mu bukalenga bamane kumvua bionsu, kutangilanganabu ne bowa. Kuambilabu Baruke ne: — Bidi bimpe, tuambile mukalenga malu aa onsu.

¹⁷ Pashishe, kukonkabu Baruke ne: — Udi mua kutumvuija mushindu uudi mufunde bionsu ebi anyi?

¹⁸ Baruke kubandamuna ne: — Muambi Yirmeya ke uvua mungambile malu onsu aa, bua meme kuafunda ku bumue ku bumue ne mayi a mukanda.

¹⁹ Ke balombodi ba mu bukalenga kuambila Baruke ne: — Nuenu bonsu babidi, Yirmeya ne wewe Baruke, nuye kusokoma. Muntu nansha umue kamanyi muaba unudi.

²⁰ Pashishe, kushiyabu mukanda mu nzubu wa Elishama, mufundi wa mikanda ya mu bukalenga. Bobu kuya mu nzubu wa mukalenga bua kuya kumuambila malu onsu avua menzeke.

²¹ Ke mukalenga kutuma Yekudi bua aye kuangata muvungu wa tshiseba mu nzubu wa Elishama, kabidi bua aubale ne diyi dikole kumpala kua mukalenga ne kua balombodi ba mu bukalenga bavua pabuipi nende.

²² Bu muvuabu mu ngondu wa tshitema wa mu tshidimu, mukalenga uvua musombe mu nzubu wende mu tshibambalu ota kapia tshikondu tshia mashika makole.

²³ Pavua Yekudi mumane kubala tshitupa tshia mukanda, mukalenga kutshikosa ne kele, kutshiela mu kapia. Uvua mutungunuke nanku too ne pavua muvungu mujima mubutuke.

²⁴ Mukalenga ne balombodi bende bonsu ba bena mvita bavua bajingulula bimpe malu avuabu bafunde pa muvungu wa tshiseba. Kadi kabavua ne bowa nansha ne dibungama.

²⁵ Kadi Elnatane, Delaya ne Ngemariya, bavua balomba mukalenga bua kuoshi tshiseba mu kapia. Kadi mukalenga kavua mubateleje to.

²⁶ Mukalenga kutuma diyi kudi Yerameyele mulombodi wa bena mvita, kudi Seraya, muana wa Azriyele, ne kudi Shelemiya, muana wa Abdeyele, bua bele muambi Yirmeya ne Baruke mufundi mu nzubu wa lukanu. Kadi Maweja-Nangila kusokoka Baruke ne Yirmeya.

²⁷ Mukalenga mumane kuosha muvu-ngu wa mabeji uvuabu bafunde malu avua Yirmeya muambile Baruke bua kufundaye, Maweja-Nangila kuambila Yirmeya ne:

²⁸ — Angata muvungu mukuabu wa tshiseba. Ufundemu kabidi malu onsu avua-bu bafunde mu muvungu wa tshiseba wa kumpala, udi Yoyakime muoshe.

²⁹ Pashishe, newambile Yoyakime, mukalenga wa bena Yuda ne: “Maweja-Nangila udi wamba ne: Yirmeya uvua mufunde ne: mukalenga wa mu Babilone neafike bulelela bua kubutula ditunga edi, ne bua kushidisha bantu ne nyama. Kadi Yoyakime uvua mumutandishe, muoshe too ne muvungu wa tshiseba.

³⁰ Ke padi Maweja-Nangila wamba ne: Ku ndelanganyi ya Yoyakime kakuakuikala muntu nansha umue udi mua kubuela mu bukalenga bua Davide kunyima kuende. Tshitalu tshia Yoyakime nebatshimanshe pambelu, butuku netshikanyanyanye ne mashika, mu munya netshiuminyine ne luya.

³¹ Nemmunyoke yeye ne ndelanganyi yende ne balombodi bende ba bena mvita. Nembanyoke bua bilema biabu. Makenga onsu amvua muambe, nembatuminewu, bobu bantu ba mu Yerushalayime ne bantu ba mu Yuda, bualu kabavua banteleje.”

³² Nanku, Yirmeya kuangata muvungu mukuabu wa tshiseba, kuupesha Baruke mufundi. Awu kufunda bionsu bivua Yirmeya umuambila, ke malu onsu avuabu bafunde mu mukanda uvuabu boshe kudi mukalenga Yoyakime, ne malu makuabu a bungi a mushindu wa momumue.