Yirmeya 35 - MUKANDA WA MYIDI MUKULU

Yirmeya ne diku dia bena Rekabe

¹ Tshikondu tshia Yoyakime, muana wa Yoshiya, mukalenga wa bena Yuda, Maweja-Nangila kuambila Yirmeya ne:

² — Uye kudi tshiota tshia bena Rekabe. Wambile bantu aba bua babuele mu tshibambalu tshia ku nzubu wa Mvidi Mukulu. Muaba awu neubapeshe maluvu a mvinyo a kunuabu.

³ Yirmeya kuya kukeba Yazaniya, muana wa Irmeya, ne muikulu wa Abashinya, kabidi ne bana babu ne Yazaniya ne bana bende, mmomumue ne bantu bonsu ba mu diku dia bena Rekabe.

⁴ Kubabuejaye mu nzubu wa Mvidi Mukulu, mu tshibambalu tshia balongi ba Anane, muntu wa tshijila, muana wa Igdaliya. Tshibambalu etshi tshivua pabuipi ne tshia bamfumu ba nzubu. Tshivua kabidi kulu ku mutu kua tshibambalu tshia Masheya, muana wa Shalume, mutuangaji uvua ne mudimu wa kulama tshibuelelu tshia nzubu wa Mvidi Mukulu.

⁵ Yirmeya kuteka milondu miwule tente ne maluvu, ne makopu kumpala kua bena Rekabe. Pashishe kubambilaye ne: — Nuayi maluvu makese aa.

⁶ Kadi bobu kuandamuna ne: — Katuena tunua maluvu a mvinyo to, bualu nkambua wetu Yonadabe, muana wa Rekabe, uvua mutuelele mukenji ne: Kanuena mua kunua maluvu a mvinyo, nansha nuenu, nansha bana benu.

⁷ Kanuena mua kuenza nzubu to. Kanuena mua kudima madimi to. Kanuena mua kukuna mionji ya mvinyo to. Kanuena mua kuikala nabi to. Kadi nusombe mu nzubu ya ntenta matuku onsu anudi ne muoyi panu. Nanku nenulale matuku mavule, mu ditunga didi kadiyi dienu.

⁸ Nanku, tuvua bitabe bionsu bivua Yonadabe nkambua wetu mutuambile. Tuetu, bakaji betu, bana betu ba balume ne ba bakaji, katuena tunua mvinyo to.

⁹ Katuena tuasa nzubu bua kusombamu, nansha bua kulalamu to. Katuena ne madimi a mvinyo, nansha madimi makuabu to.

¹⁰ Kadi tudi tusomba talalaa mu ntenta. Bualu tudi tunemeka mikenji yonsu ituvua bapete ya kudi Yonadabe nkambua wetu.

¹¹ Kadi tshikondu tshivua Nebukadnesare, mukalenga wa mu Babilone mubuele mu ditunga, tuvua bumvuangana bua kubuela mu Yerushalayime bua kunyema bena mvita ba bena Babilone ne ba bena Ashure. Nanku lelu, tudi tusomba mu Yerushalayime.

¹² Ke Maweja-Nangila kuambila Yirmeya ne:

¹³ — Mpindiewu, ambila bena Yuda ne bantu badi basombe mu Yerushalayime ne: “Maweja-Nangila wa bukole buonsu, Mvidi Mukulu wa Izrayele udi wamba ne: Kanuena mua kuitaba mibelu yanyi, kuteleja tshindi nnuambila anyi?

¹⁴ Yonadabe, muana wa Rekabe, uvua mukandike bana bende bua kabanu maluvu a mvinyo to. Bena Rekabe kuitaba miaku yende too ne lelu. Ki mbanue maluvu a mvinyo to. Bualu bavua bitabe mukenji wa kudi nkambua wabu. Meme Maweja-Nangila kunubela misangu ne misangu, kadi kanuena nunteleja to.

¹⁵ Meme kunutumina bantu banyi bavule, bambi, bua banuambile ne: ‘Muntu yonsu wa kunudi adilengeje. Enzayi malu mimpe. Kanulamatshi mvindie ya bantu ba bisamba bikuabu bua kuyitendelela. Nenku nenusombe mu buloba bumvua munupeshe nuenu ne bankambua benu.’ Kadi kanuvua banteleje ne ntema, kanuvua bangumvue nansha.

¹⁶ Bena Rekabe pabu bavua balonda mukenji wa kudi Yonadabe nkambua wabu. Kadi nuenu bena Yuda kanuvua banteleje to.”

¹⁷ Yirmeya kuamba kabidi ne: — Ke padi Maweja-Nangila wa bukole buonsu, Mvidi Mukulu wa Izrayele wamba ne: “Nuenu bena Yuda ne bena Yerushalayime, nennutumine makenga onsu amvua mudianze kunumanyisha. Bualu mvua munubele, kadi kanuvua banteleje. Mvua munubikile, kadi kanuvua bitabe to.”

¹⁸ Pashishe Yirmeya kuambila bena Rekabe ne: — Telejayi bidi Maweja-Nangila wa bukole buonsu, Mvidi Mukulu wa Izrayele unuambila ne: “Nuvua bitabe mukenji wa kudi Yonadabe nkambua wenu. Nuvua benze ne muoyi umue bionsu bivuaye munutumine diyi.

¹⁹ Nanku, mu diku dia Yonadabe, muana wa Rekabe, nemuikale kabidi muntu udi mua kungenzela mudimu. Ke mundi meme Maweja-Nangila wa bukole buonsu Mvidi Mukulu wa Izrayele ngamba.”