Yirmeya 34 - MUKANDA WA MYIDI MUKULU

Maweja-Nangila udi wambila Sedekiya malu

¹ Nebukadnesare, mukalenga wa mu Babilone, uvua muluishe Yerushalayime ne bimenga bikuabu bia bena Yuda. Uvua ne bena mvita bende bonsu, kabidi ne bena mvita ba mu matunga ne bisamba bionsu bivua ku diyi diende. Tshikondu atshi, ke Maweja-Nangila kuambila Yirmeya ne:

² — Meme Maweja-Nangila Mvidi Mukulu wa Izrayele, ndi nkutuma bua kuambila Sedekiya, mukalenga wa bena Yuda ne: Maweja-Nangila udi wamba ne: “Ndi mfila tshimenga etshi kudi mukalenga wa mu Babilone bua atshibutule, atshioshe.

³ Wewe kuena mua kunyema mukalenga awu to. Nebakukuate, bakufila mu bianza biende. Nenumonangane nende mpala ne mpala. Newikale ne tshilumbu tshia kuandamuna ku nkonku yende, bangabanga ne wewe kuya mu Babilone mu bupika.

⁴ “Kadi, wewe Sedekiya, mukalenga wa bena Yuda, bu wewe muitabe tshindi nkuambila, kabakukushipa to. Meme Maweja-Nangila ndi nkujadikila nanku.

⁵ Nenku, neufue mu bupole. Mu madilu ebe nebakuenzele muvuabu benzele bankambua bebe, bakalenga bavua bakudianjidile mu nkuasa wa bukalenga. Nebakoshile manananshi, bakudile bela kasala ne: Eyi! Mukalenga mmufue. Meme Maweja-Nangila ndi nkujadikila nanku.”

⁶ Ke bualu buvua muambi Yirmeya muambile Sedekiya mukalenga wa bena Yuda mu Yerushalayime.

⁷ Tshikondu etshi bena mvita ba mukalenga wa mu Babilone bavua baluisha Yerushalayime ne bimenga bibidi bia Lakishe ne Azeka, bivua mukalenga awu kayi muanji kukuata.

Badi bapikula bapika, kadi bamfumu babu badi babakuata kabidi

⁸ Maweja-Nangila kuambila kabidi Yirmeya malu makuabu. Bualu mukalenga Sedekiya uvua mumvuangane ne bena mu Yerushalayime bua bapikule bapika babu.

⁹ Muntu yonsu uvua ne bua kupikula bapika bende bena Ebrewu balume nansha bakaji. Muntu kavua mua kuenzeja kabidi muanabu muena Yuda mudimu wa bupika to.

¹⁰ Balombodi bonsu ba bantu ne bena Yerushalayime bavua bitaba diumvuangana adi. Nanku bavua banyisha bua kabenzeji kabidi bantu balume nansha bakaji bavua bapika babu mudimu wa bapika to. Bavua ne bua kubapikula. Muntu yonsu uvua muitabe diumvuangana adi. Uvua mupikule bapika bende.

¹¹ Kadi bavua bakudimune meji aa. Bavua bangate kabidi bantu balume ne bakaji bavuabu bapikule, babenzeja ku bukole bua bapingane mu bupika.

¹² Nanku, Maweja-Nangila kutuma Yirmeya bua kuambila bantu ne:

¹³ — Maweja-Nangila Mvidi Mukulu wa Izrayele udi unuambila ne: “Meme kabidi mvua mutue ndondu ne bankambua benu pavuabu mu Ejipitu. Meme kubapatulamu.

¹⁴ Mvua mubambile ne: Pakumbana bidimu muanda mutekete, yonsu wa kunudi apikule muanabu muena Ebrewu uvua mudipane kudiye bu mupika, ne ukavua mumane kumuenzela mudimu bidimu bisambombu. Nudi mua kumulekela aye mudiye musue. Kadi bankambua benu ki mbanteleje, ki mbitabe tshimvua mubambile to.

¹⁵ Nuenu nuvua benza bimpe. Mvuamuanyishe munuvua bapikule bapika benu. Nuvua bumvua-ngane kabidi bua kuenza nanku kumpala kuanyi mu nzubu udi mujidila mu dina dianyi.

¹⁶ Kadi nuenu kukudimuna meji enu. Nanku nuenu kumpepeja. Nuenu bamane kulekela bapika benu balume nansha bakaji bua baye kuonsu kuvuabu basue, ke nuenu kubakuata tshiakabidi, kubenzeja ku bukole bua bapingane ku bupika.”

¹⁷ Yirmeya kuamba kabidi ne: — Maweja-Nangila udi wamba ne: “Yonsu wa kunudi uvua ne bua kuanyisha bua mupika wende, muanabu nansha muena mutumba nende, aye mudiye musue. Kadi kanuena bangitabe to. Nanku, meme Maweja-Nangila ndi ngamba ne: Nennutumine mvita, tshiyole tshia nzala, ne disama dia tshiambu. Nenku makalenga onsu a pa buloba neikale ne bowa padiwu amona bidi binuenzekela.

^18-19 “Bamfumu ba bena Yuda ne ba mu Yerushalayime, balombodi ba bantu, batuangaji, ne bantu bonsu bavua kabayi bapika, bavua bumvuangana nanyi. Bavua bateke mu bitupa bibidi munyinyi wa muana wa nyama wa ngombe uvuabu basaye. Kupitshilabu munkatshi mua nseke yonsu ibidi ya nyama. Kadi bantu aba mbanyange ndondu. Kabena bakumbaje bivuabu balaye.

²⁰ Nanku nembafile kudi bantu badi bajinga kubashipa. Nyunyi ya mikanku ne nyama ya mibuabua neyidie bitalu biabu.

²¹ Ke mundi mfila Sedekiya mukalenga wa bena Yuda, ne balombodi bende ba mu bukalenga, kudi badi bajinga kubashipa. Nembafile kudi bena mvita ba bena Babilone. Bualu, nansha tshikulu etshi tshinushile muaba mpindiewu,

²² nentume diyi bua tshipingane, tshiluishe tshimenga etshi, tshi tshikuate, tshitshioshe. Bimenga bia Yuda nebishale tshipela. Ke mundi meme Maweja-Nangila ngamba nanku.”