Yirmeya 30 - MUKANDA WA MYIDI MUKULU

Maweja-Nangila udi ulaya bantu bende bua kubapingaja muabu

¹ Maweja-Nangila kuambila Yirmeya ne:

² Meme Maweja-Nangila Mvidi Mukulu wa Izrayele, mpindiewu ndi nkuambila ne: Ufunde bimpe malu anyi onsu amvua mukumanyishe.

³ Bualu ndi nkuambila ne: dituku nedifike, dingapikula bantu banyi bena Izrayele mu bupika, kabidi ne bena Yuda. Nembapingaje mu ditunga dimvua mupeshe bankambua babu. Nebasombemu tshiakabidi. Ke tshindi meme Maweja-Nangila ngamba.

^4-5 Ke Maweja-Nangila kuambila Yirmeya bua kumanyishaye bena Izrayele ne bena Yuda kabidi ne: Ndi ngunwua bantu bela mbila ne bowa. Badi bazakala, kabayi bikisha.

⁶ Kadi ebejanganayi ne: nukadi bamone muntu mulume muimite difu mulela muana anyi? Kadi mmunyi mundi mmona bantu balume bonsu, bianza mu tshimonu bu mukaji ukenga pa kulela. Badi batokoloka mpala bu bafue.

⁷ Dituku dia dikenga didi dienda disemena pabuipi. Kakuena dikuabu bu diodi. Makenga neikale miaba yonsu munkatshi mua ndelanganyi ya Yakobe. Kadi nebashale ne muoyi!

⁸ Maweja-Nangila wa bukole buonsu udi wamba ne: Pafika matuku awu, nentshibule mutshi wa bupika udi pa makaya abu. Nenkose mionji yabu. Nanku kabakuikala kabidi bapika ba bantu bakuabu to.

⁹ Kadi nebankuatshile mudimu meme Maweja-Nangila Mvidi Mukulu wabu. Nenku nempingaje mu bukalenga bua Davide muana wa ku ndelanganyi yende. Nebamuenzele mudimu, bualu mmukalenga wabu.

¹⁰ Maweja-Nangila udi wamba ne: Nuenu bena Izrayele nudi bantu banyi, kanutshinyi to. Nuenu ndelanganyi ya Yakobe, kanuzakadi to. Bualu nennusungidile, nnumushe ku matunga adi kule. Nensungidile bana banudi balele badi mu matunga a bende, muvuabu baye nenu mu bupika. Bena Izrayele, nenupingane kuenu, nenusombe talalaa. Kabakunutatshisha kabidi to.

¹¹ Ndi mufike bua kunusungidila. Meme Maweja-Nangila ndi ngamba nanku. Ndi musue kubutula matunga onsu, miaba yonsu imvua munutangalaje. Kadi tshiena imubutula nuenu to. Bushuwa, ndi amu ne bua kununyoka. Tshiena mua kunutangila bu bantu badi kabayi ne bualu.

¹² Maweja-Nangila udi wambila Yerushalayime ne: mbakutape bibi! Mputa yebe kabena mua kuyondapa nansha.

¹³ Kakuena muntu udi mua kukuambuluisha. Bantu batu bondapa mputa. Kadi kakuena buanga bua kuondapa webe.

¹⁴ Nansha bantu bavua bakunanga, kabena bakuvuluka kabidi to! Kakuena muntu udi ukufuila luse to. Bualu ndi mukunyoke, mudileje bu muluishi webe. Ndi mukutuute bibi.

¹⁵ Udi udila bua makenga audi nawu, bua mputa ivuabu bakutapa bua tshinyi? Ndi mukunyoke nanku, bualu bubi buebe mbunene, mibi yebe nya bungi.

¹⁶ Kadi bonsu badi bakudia, nebabadie bobu kabidi. Bonsu badi bakupetula, nebaye bobu kabidi mu bupika. Bonsu badi bakunyenga bintu, nembanyenge bobu kabidi bintu. Badi bapawula bintu biebe, nebapawule bintu biabu kabidi.

¹⁷ Bonsu mbakutangile bu “tshintu tshia patupu.” Badi bamba ne: “Mukuna ewu wa Siyone, bonsu mbalengulule.” Kadi meme nengondape, nengumishe mputa yebe. Ke mundi ngamba meme Maweja-Nangila.

¹⁸ Maweja-Nangila udi wamba ne: — Bena meku a Izrayele, nennupingaje mu ditunga dienu! Nemfuile meku enu onsu luse. Nenuasulule bimenga bienu, nenuibakulule nzubu yenu milenga miaba yayi ya kale.

¹⁹ Bantu badi basombamu nebimbe misambu, nebele mbila ya disanka. Nuenu ndelanganyi ya Yakobe nemwulangane. Kanuakukepela kabidi to. Bonsu nebanunemeke.

²⁰ Nuenu ndelanganyi ya Yakobe, nenuikale bu munuvua kale. Nennusombeshe talalaa mu ditunga dienu. Nembutule baluishi benu bonsu.

²¹ Mfumu wenu neikale muntu wa mu tshisamba tshienu. Eyowa, muntu wa munkatshi muenu neanulombole. Nengitabe bua asemene pabuipi nanyi. Bualu, muntu udi mua kufika kundi, meme tshiyi mumubikile anyi? Meme Maweja-Nangila ndi njadika nanku.

²² Nuenu nenuikale tshiakabidi bantu banyi. Meme nengikale Mvidi Mukulu wenu.

²³ Tshiji tshia Maweja-Nangila tshidi bu mvunde, tshidi tshituuta bena tshibawu bu tshipepele tshikole.

²⁴ Tshiji tshikole tshia Maweja-Nangila, katshiena tshijika, kayi muanji kuenza bionsu bivuaye muambe. Dituku dikuabu nenujingulule mudi Maweja-Nangila wenza nanku.