Yirmeya 29 - MUKANDA WA MYIDI MUKULU

Yirmeya udi utumina bantu badi mu bupika mukanda

¹ Tshidimu atshi, muambi Yirmeya uvua mu Yerushalayime. Nanku bakulu ba mu meku, batuangaji, bambi, ne bantu bonsu bavua Nebukadnesare mukuate mu Yerushalayime bua kuya nabu mu Babilone, muambi kubatumina mukanda.

² (Mukanda awu Yirmeya uvua muutume pavuabu bamane kumuka mu Yerushalayime baye mu bupika kudi mukalenga Yekonya, mamuende mukalenga mukaji, balombodi ba mu bukalenga, bamfumu ba Yuda ne ba mu Yerushalayime, bansenda ne bena midimu ya biamu.)

³ Nanku Sedekiya, mukalenga wa bena Yuda, uvua mutume Elasha, muana wa Shafane, ne Ngemariya, muana wa Ilkiya, mu Babilone kudi mukalenga Nebukadnesare. Yirmeya kubapesha mukanda wende. Mu mukanda amu bavua bafundemu ne:

⁴ “Maweja-Nangila wa bukole buonsu, Mvidi Mukulu wa Izrayele, udi wambila bantu bonsu bavuaye mumushe mu Yerushalayime, mutume mu bupika mu Babilone ne:

⁵ Asayi nzubu. Nusombemu. Nudime, numiamine bintu mu madimi enu. Nudie binudi nunowamu.

⁶ Nuselangane. Nulele balume, nulele bakaji. Nuseleshe balume, nuseleshe bakaji, balelangane pabu. Kuine aku nuvulangane! Kanukepedi to!

⁷ Nuambuluishe tshimenga tshindi munutume ku bupika, tshipete bubanji. Nutshilombele kundi. Bualu, tshiotshi tshikale ne diakalenga, nenuikale nadi ne nuenu kabidi.

⁸ “Maweja-Nangila wa bukole buonsu, Mvidi Mukulu wa Izrayele, udi wamba kabidi ne: Kanuitabi malu a dishima adi bambi ba munkatshi muenu bamba, nansha malu adibu banuambila kudi bantu bua matuku atshidi kumpala. Kanuitabi badi banumvuija ndota yenu.

⁹ Bualu badi banuambila ne: tudi tunumanyisha malu mu dina dia Maweja-Nangila. Kadi badi banudinga. Meme Maweja-Nangila tshiena mubatume to.

¹⁰ “Maweja-Nangila udi wamba kabidi mpindiewu ne: Bukalenga bua bena Babilone nebushale kabidi bidimu makumi muanda mutekete. Diba adi nennusungidile. Nenkumbaje malu mimpe amvua munulaye. Nennupingaje mu Yerushalayime.

¹¹ Bualu meme Maweja-Nangila ndi mumanye meji andi nnuelela. Ndi nnujadikila ne: tshiena ne muoyi wa kunukengesha nansha, kadi amu bua kunufikisha ku diakalenga. Nennukumbajile malu anudi batekemene.

¹² Diba adi, nuenu bambikile, bantendelele, meme Maweja-Nangila nennuteleje.

¹³ Nuenu bankebe ne muoyi wenu mujima, nenumpete, nennupingaje muenu.

¹⁴ Nennumushe mu bisamba bionsu ne miaba yonsu imvua munutangalaje. Nennusangishe, nnupingaje muaba ewu umvua munukuatshishe bua kunutuma mu bupika. Meme Maweja-Nangila ndi njadika nanku.

¹⁵ “Maweja-Nangila udi unuambila bionsu ebi, bualu nudi nuamba ne: Maweja-Nangila mmututumine tuetu bambi mu Babilone.

¹⁶ “Telejayi bidi Maweja-Nangila nnumanyisha bua bidi bitangila mukalenga udi mupiane bukalenga bua Davide, ne bantu bonsu batshidi basombe mu Yerushalayime — ndi ntela bana benu bavua kabayi baye nenu mu bupika. —

¹⁷ Ke malu adi Maweja-Nangila wa bukole buonsu unumanyisha bualu buabu ne: Ndi mbatumina mvita, tshiyole tshia nzala, ne disama dia tshiambu. Nebikale bu bimuma bibole bia mutshi wa mfiku, bidibu kabayi mua kudia.

¹⁸ Nembalondakaje ne mvita, ne tshiyole tshia nzala, kabidi ne disama dia tshiambu. Nanku bena mu makalenga onsu a pa buloba nebakuatshike bonsu bowa. Nebabatangile bu bantu badibu bela mulawu. Bantu nebabaseke, bikale batela dina diabu bua kuditshipa nadi.

¹⁹ Bushuwa Maweja-Nangila udi wamba ne: kabavua bateleja bimvua mubambile. Meme kubatumina misangu yonsu bantu banyi bambi, bobu nansha kubateleja to.

²⁰ “Kadi nuenu bavua Maweja-Nangila mumushe mu Yerushalayime, mutume mu bupika mu Babilone, nuteleje tshidi Maweja-Nangila wamba!

²¹ “Maweja-Nangila wa bukole buonsu Mvidi Mukulu wa Izrayele, udi wamba malu adi atangila Akaba, muana wa Kolaya, ne Sedekiya, muana wa Masheya. Bonsu babidi badi bambi bena dishima. Nansha bobu bambila bantu ne: tudi tuakula mu dina dia Mvidi Mukulu, badi babadinga. Nembafile kudi Nebukadnesare, mukalenga wa mu Babilone. Neabashipe nuenu batangile.

²² Bantu bonsu ba mu Yuda bavuabu baye nabu mu bupika mu Babilone, nebele bantu mulawu, batele mena abidi aa, bamba ne: ‘Maweja-Nangila akunyoke nuwuaye munyoke Sedekiya ne Akaba. Mukalenga wa Babilone, mmuboshishe mu kapia batshikale ne muoyi!’

²³ Malu awu avua mabenzekele, bualu bavua benza malu mabi mu Izrayele andi mbenga. Bavua benza malu a bundu, bambila bantu malu mu dina dianyi, meme tshiyi mubatume. Kadi meme ndi mumanye malu onsu awu. Mvua muamone ne mesu anyi. Meme Maweja-Nangila ndi njadika nanku.”

Mukanda wa Shemaya

^24-25 Maweja-Nangila wa bukole buonsu Mvidi Mukulu wa Izrayele, kutuma muambi Yirmeya bua kuambila bantu malu adi atangila Shemaya wa mu Nekelame. Bualu Shemaya uvua mutumine mutuangaji Sefanya, muana wa Masheya, kabidi ne batuangaji bakuabu, kabidi ne bantu bakuabu bavua mu Yerushalayime mukanda. Shemaya uvua mufundile Sefanya ne:

²⁶ “Bu mudi Maweja-Nangila mukuteke bua kupingana Yoyada, utangile ne disu dikole bantu badi babuele mu nzubu wa Mvidi Mukulu! Nanku bantu batshimbakane badi badiamba ne: tudi bambi, ubele mu tshikunyi, ne nkanu mu nshingu.

²⁷ Kadi mmunyi muudi kuyi muanji kunyoka Yirmeya muena mu Anatote, udi unuambila ne: ndi muambi.

²⁸ Ku tshilema tshiebe, Yirmeya uvua mua kututumina mukanda kunu, mu Babilone, bua kutuambila ne: nenushale matuku mavule mu bupika. Uvua mutufundile kabidi ne: nuase nzubu, nusombe, nudime, nudie binudi nunowa.”

²⁹ Kadi mutuangaji Sefanya kubadila Yirmeya mukanda awu.

³⁰ Nanku, Maweja-Nangila kutumina Yirmeya diyi ne:

³¹ — Utumine bantu badi mu bupika mukanda ne: “Maweja-Nangila udi wamba ne: Shemaya udi udiamba ne: ndi muambi. Kadi tshiena mumumanyishe bualu nansha bumue bua yeye kunuambila. Bu mudiye munusake bua nuenu kuitaba malu a dishima,

³² meme Maweja-Nangila ndi nshindika ne: nenshipe Shemaya ne ndelanganyi yende yonsu. Muntu nansha umue wa ku diku diende kena ushala ne muoyi munkatshi muenu bua kumona malu mimpe angenzela bantu banyi. Bualu Shemaya mmusake bantu banyi bua bantombokele. Meme Maweja-Nangila ndi njadika nanku.”