Yirmeya 24 - MUKANDA WA MYIDI MUKULU

Bisaka bibidi bia bimuma bia mfiku

¹ Maweja-Nangila kundeja bisaka bibidi bia bimuma bia mfiku, bivua muntu muteke kumpala kua nzubu wa Mvidi Mukulu. Diba adi, Nebukadnesare, mukalenga wa bena Babilone, ukavua mumane kukuata Yekonya, muana wa Yoyakime, mukalenga wa bena Yuda, ne balombodi ba mu bukalenga, bansenda ne bena midimu ya bianza.

² Bimuma bia mu tshisaka tshia kumpala bivua bimpe bitambe, bivua bu bia ku ntuadijilu bia ku tshikondu tshia kupola bimuma. Bimuma bia mu tshisaka tshibidi bivua bibole, kabayi mua kubidia to.

³ Maweja-Nangila kunkonka ne: — Yirmeya, tshiudi umona ntshinyi? Meme kuandamuna ne: — Ndi mmona bimuma bia mfiku. Bikuabu bimpe bitambe, kadi binga bibole, kabayi mua kubidia nansha.

⁴ Nanku Maweja-Nangila kungambila ne:

⁵ — Meme Maweja-Nangila Mvidi Mukulu wa Izrayele, ndi bu bantu badi ne disanka dinene padibu batangila bimuma bimpe. Ke mundi ntangila ne disanka bena Yuda badi mu bupika, bamvua mumushe apa bua baye nabu mu Babilone.

⁶ Eyowa, ndi mbatangila ngunwua luse lua bungi. Nanku, nembapingaje mu ditunga edi. Tshiena musue kabidi kubabutula. Kadi nembafululule. Tshiena musue kubatula ne miji yabu, kadi ndi nkeba mundi mua kubakuna tshiakabidi.

⁷ Nembapeshe bukole bua kumanyabu ne: meme ndi Maweja-Nangila. Nebapingane kundi ne muoyi wabu mujima. Nanku, nebikale bantu banyi, meme nengikale Mvidi Mukulu wabu.

⁸ Kadi Sedekiya, mukalenga wa bena Yuda, balombodi bende ba mu bukalenga, bantu bavua bashale mu Yerushalayime, kabidi ne bonsu bavua baya kusomba mu Ejipitu, nembenzele mudibu benzele bimuma ba mfiku bimane kubola, kabayi mua kubidia.

⁹ Nanku bantu ba mu matunga onsu a pa buloba, pamonabu bionsu abi nebakeme bikole, bakuatshike bowa. Miaba yonsu indi mbatangalaja, bantu nebabaseke, babapende. Nebasake misambu, batela dikenga diabu bua tshilejilu tshia dikenga dinene. Bantu nebabatshipe.

¹⁰ Nembatumine mvita, tshiyole tshia nzala, ne disama dia tshiambu, bua bajimine pa buloba bumvua mubapeshe bobu ne bankambua babu.