Yirmeya 23 - MUKANDA WA MYIDI MUKULU

Balombodi babi, mukalenga muimpe

¹ Maweja-Nangila udi wamba ne: “Balombodi ba bantu banyi mbena diakabi. Badi balami babi ba mikoku, badi banyisha bua mikoku yanyi inyane, ipambuke.”

² Bua balami ba mikoku aba, Maweja-Nangila wa Izrayele udi wamba ne: “Nuvua banyishe bua mikoku yanyi ipambuke, itangalake. Kanuvua nayi ne bualu to. Eyowa, meme ndi musue kununyoka, bualu bulami buenu bua mikoku yanyi mbubi. Meme Maweja-Nangila ndi njadika nanku!

³ “Meme nkayanyi nensangishe mikoku idi mishale ne muoyi mu matunga amvua muyitangalaje. Nenyipingaje mu mpata yayi bua imone mua kudia kudiunda, kuvulangana.

⁴ Nenteke balami ba bushiwa badi bamanya mua kulama mikoku bimpe. Nanku, mikoku kayena mua kutshina kabidi to, kayena mua kuzakala. Nansha umue wa ku yoyi kawena mua kujimina. Ke mundi ngamba meme Maweja-Nangila.

⁵ Maweja-Nangila udi wamba ne: Dituku nedifike dindi mbikila muntu wa ku ndelanganyi ya Davide menemene. Neikale mukalenga muakane. Neenze amu malu mimpe. Neakose amu nsambu pa yoyi mu ditunga.

⁶ Pabuelaye mu bukalenga, kabakukengesha kabidi bena Yuda kudi baluishi babu. Bena Izrayele nebasombe talalaa. Nebinyike mukalenga awu ne: ‘Maweja-Nangila ke musungidi wetu!’ ”

⁷ Maweja-Nangila udi wamba ne: Eyowa, dituku nedifike didi bantu kabayi baditshipa kabidi bamba ne: “Ndi nditshipa mu dina dia Maweja-Nangila udi ne muoyi, uvua mupatule bena Izrayele mu Ejipitu…”

⁸ Kadi nebaditshipe bamba ne: “Ndi nditshipa mu dina dia Maweja-Nangila udi ne muoyi uvua mupatule bena Izrayele mu matunga a ku mutu kua ditunga ne mu matunga onsu avuaye mubatangalaje, bua basombe tshiakabidi mu ditunga diabu!”

Bambi badi kabayi bakumbanyine mudimu wabu

⁹ Ke miaku ya Yirmeya idi itangila bambi. Ndi ne kanyinganyinga, ndi nzakala mubidi mujima, ndi bu muntu mukuatshike maluvu, bu muntu uvua munue mvinyo mupite bungi. Anu bualu bua Maweja-Nangila, bualu bua Mvidi Mukulu wa tshijila, ne bua malu adiye mungambile ne:

¹⁰ “Ditunga ndiuwule tente ne bantu bena tshiendenda. Badi benza bibi ne disanka dionsu. Badi ne muoyi mukole anu bua kuenza malu mabi. Ke padi buloba mu madilu. Ke padi bisosa bionsu bia kudisha nabi nyama biume mu ditunga.

¹¹ Bambi ne batuangaji bonsu badi benza buenzavi. Meme kubasangana benza bibi ne mu nzubu wanyi. Meme Maweja-Nangila ndi ngamba nanku.

¹² Nanku njila wabu neafinunuke. Nebadishinde mu miidima. Nebalale panshi, bualu nembatumine dikenga, nembanyoke, Meme Maweja-Nangila ndi ngamba nanku.”

Bambi badi bapite ba mu Samariya ku bubi

¹³ “Bimvua mumone kudi bambi ba mu Samariya, bivua bintonde menemene. Meme Maweja-Nangila ndi ngamba nanku. Bavua bakula mu dina dia mvidie Baale. Bavua bapambule bantu banyi bena Izrayele.

¹⁴ Kadi bindi mumone kudi bambi ba mu Yerushalayime, bidi bibi bipite. Badi benza malu a tshiendenda, badi bashimangana. Badi bakolesha bena buenzavi ku muoyi, badi bakandika muntu yonsu bua kadilengeji. Badi amu bu bena Sodome. Bena Yerushalayime badi amu bu bena Ngomore.”

¹⁵ Maweja-Nangila wa bukole buonsu udi wamba bua bambi ne: “Nembadishe bintu bia bululu, nembanuishe mayi a lulengu ku bukole. Bualu bambi ba mu Yerushalayime badi mpokolu wa malu mabi, adi anyanga ditunga dijima.”

Bambi bena dishima

¹⁶ Maweja-Nangila wa bukole buonsu udi wamba ne: “Kanuteleji tshidi bambi banuambila. Badi banuambila malu a dishima. Malu adibu banuambila adi mafuma mu ngenyi yabu nkayabu. Meme tshivua mubaleje bualu nansha bumue.

¹⁷ Bantu badi baseka tshindi ngamba, bambi badi ne dikamakama dia kubambila ne: ‘Bionsu nebiende amu bimpe.’ Bantu batshimbakane badi batungunuka ne tshitunu tshiabu, bambi badi babambila ne: ‘Dikenga kadiakunukuata to.’

¹⁸ Kadi muambi kaayi uvua mubuele nanyi mu tshipangu? Nganyi uvua mumone nansha mumvue tshimvua ngamba meme Maweja-Nangila? Nganyi uvua mujingulule muvua muaku wanyi?”

(Yirmeya)

¹⁹ Mvunde mukole wafiki. Ke tshiji tshia Maweja-Nangila! Mvunde munene udi unyoka bena tshibawu.

²⁰ Maweja-Nangila kayi muanji kuenza bualu bujima budiye mupangadike, tshiji tshiende katshiena tshijika to. Tshikondu tshikuabu nenujingulule malu awu.

(Maweja-Nangila)

²¹ Maweja-Nangila udi wamba ne: Tshiena mutume bambi abu to. Kadi badi anu benda baya. Meme tshiena mubambile bualu to. Kadi badi amu bambila bantu malu!

²² Bu bobu babuele mu tshipangu tshianyi, bavua mua kuambila bantu banyi malu onsu amvua muambe. Nanku bavua mua kuambuluisha bantu bua badilengeje.

Maweja-Nangila udi miaba yonsu

²³ Maweja-Nangila udi ukonka ne: Meme ndi Mvidi Mukulu udi umona anu bidi pabuipi nende anyi? To, ndi Mvidi Mukulu udi umona bionsu, ne bidi kule kuaka!

²⁴ Maweja-Nangila udi webeja ne: pikala muntu usokoma, tshiena ne mushindu wa kumumona anyi? Ndi miaba yonsu: mu diulu ne pa buloba. Kanuena bamanye bualu ebu anyi?

Kanufuanyikiji mpengela ne nyimu

²⁵ Meme Maweja-Nangila mvua mumvue bivua bambi bamba. Badi bamba ne: tudi tuakula mu dina dia Maweja-Nangila. Kadi mbia dishima. Badi bamanyisha bantu ne: “Mvua mulote! Mvua mumone malu!”

²⁶ Nebadinge bantu nanku, too ne ku tshikondu kaayi? Padibu balonda malu a dishima, adi afuma amu ku lungenyi luabu, tshidi bambi aba bipatshila ntshinyi?

²⁷ Padibu balondelangana malu adibu bamone, badi bakeba bua bantu banyi kabavuluki kabidi ne: meme ndi nganyi, amu muvua bankambua babu bampua muoyi, batendelela mvidie Baale.

²⁸ Padi muambi ulota ndota, mbimpe awule anu ndota yende! Kadi padiye ne bualu bundi mumuambile bua kumanyisha bantu, abuambe anu bu mudibu. Ki mbimpe kufuanyikija mpengelane nyimu to. Meme Maweja-Nangila ndi ngamba nanku!

²⁹ Numanye ne: muaku wanyi udi bu kapia, bu nyindu mukole, udi uzaza lubuebue.

³⁰ Ke padi Maweja-Nangila wamba ne: Nenduishe bambi badi bibangana meyi, badingangana ne: nga kudi Maweja-Nangila.

³¹ Eyowa, nenduishe kabidi bantu aba badi badiamba ne: tudi bambi, bambila bantu meyi abu, babadinga ne: nga kudi Maweja-Nangila.

³² Ndi nduisha bambi badi bamba malu avuabu bamone mu ndota, bapambuisha bantu banyi, babadinga. Meme tshiena mubapeshe mudimu nansha umue, tshiena mubelele mukenji nansha umue. Kabena bambuluisha bantu banyi. Meme Maweja-Nangila ndi ngamba nanku.

Muaku wa Mvidi Mukulu mbujitu anyi?

³³ Maweja-Nangila kuambila Yirmeya ne: — Padi muambi, mutuangaji, nansha muntu mukuabu, ukukonka ne: “Maweja-Nangila udi wamba bishi, bujitu budiye uteka pambidi petu mbujitu kaayi,” umuandamune ne: “Maweja-Nangila udi wamba ne: Nuenu mene nudi bujitu bundi meme ne bua kuambula! Kadi nembuitshikije panshi.”

³⁴ Pikala muambi, mutuangaji, nansha muntu mukuabu, webeja ne: “Bujitu budi Maweja-Nangila muteke pambidi petu mbujitu kaayi” nemmunyoke yeye ne bena diku diende.

³⁵ Tshinudi mua kukonkangana tshidi amu ne: “Maweja-Nangila mmuandamune tshinyi” Nansha ne: “Maweja-Nangila mmuambe tshinyi”

³⁶ — Kadi kanuambi ne: Maweja-Nangila mmuteke bujitu pambidi petu. Muaku wa Maweja-Nangila udi wenza bujitu budi muntu ne bua kuambula anyi? Nansha kakese! Kadi padibu bamba nanku, badi banyanga muaku wa Maweja-Nangila Mvidi Mukulu wa bukole buonsu udi ne muoyi, Mvidi Mukulu wa Izrayele.

³⁷ Eyowa, badi mua kukonka muambi ne: “Maweja-Nangila mmukuandamune tshinyi, wakuambidi tshinyi?”

³⁸ Panuikala nutungunuka ne kuamba bua bujitu budi Maweja-Nangila muteke pambidi, nansha meme mumane kukandika bua nuambe miaku eyi, nanku, ndi nnuambila ne:

³⁹ nennuambule bu bujitu pa makaya anyi. Nennuimanshe nuenu, kabidi ne tshimenga etshi tshimvua munupeshe nuenu ne bankambua benu.

⁴⁰ Nennuluishe bundu. Nebanupepeje bidimu ne bidimu kabayi mua kupuwa to.