Yirmeya 22 - MUKANDA WA MYIDI MUKULU

¹ Maweja-Nangila kutumina Yirmeya diyi ne: — Uye ku nzubu wa bakalenga ba bena Yuda bua kubamanyisha miaku yanyi.

² Wele mbila ne: “Wewe mukalenga wa bena Yuda udi mu nkuasa wa Davide, nuenu balombodi ba mu bukalenga, nuenu bantu badi babuela mu nzubu wa bukalenga, telejayi tshidi Maweja-Nangila wamba.”

³ Udi wamba ne: Nukose tshilumbu tshionsu amu pa tshiotshi. Nupatule bantu badibu bakengesha mu bianza bia bantu badi biba bintu biabu. Kankengeshi muena tshimuangi, kanunyengi tshintu tshia muana nshiya, nansha tshia mukaji mukamba. Lekelayi kushipa mwaba ewu bantu kabayi ne bualu.

⁴ Nuenu bitabe bua kuenza tshindi nnulomba, nanku bakalenga nebasombe amu kusomba mu nkuasa wa Davide. Nebendakane pa nyama ya tubalu, nansha pa matempu. Bantu bonsu, balombodi ba mu bukalenga, ne bantu bakuabu, nebabuele amu kubuela mu nzubu wa bukalenga.

⁵ Kadi panuabenga kuteleja mundi nnuambila, ndi nditshipa ne: meme Maweja-Nangila, bu mundi Mvidi Mukulu mulelela, ndi njadika ne: nzubu ewu wa bukalenga neupuke ashale lubuwa.

⁶ Bua nzubu wa bukalenga bua bena Yuda, Maweja-Nangila udi wamba ne: Nansha meme musakidile nzubu wa bukalenga ewu, mumumone muakane, amu bu mundi nsankidila metu a Ngilaade, nansha nsongu ya mikuna ya Lebanone, ndi nditshipa ne: nzubu ewu neashale tshipela, muaba udi bantu kabayi basombe.

⁷ Ndi kutumina bantu ne tshisuyi. Nebupule makunji ebe mimpe a mitshi ya sedre. nebaoshe mu kapia.

⁸ Bantu benyi ba bungi nebapitshile pabuipi ne tshimenga etshi. Nebebejangane ne: “Maweja-Nangila Mvidi Mukulu mmunyoke tshimenga tshinene etshi naku bua tshinyi?”

⁹ Nebabandamune ne: “Bualu bantu bavua basombemu bavua bakukuila mvidie mikuabu, bayitendelela. Kabavua bakumbaja dilaya divuabu balaye Maweja-Nangila Mvidi Mukulu wabu.”

Shalume mupinganyi wa Yoshiya

¹⁰ Nuenu bena Yuda, kanudidi mukalenga Yoshiya uvuabu bashipe. Kanuikadi ne tshinyongopelu bualu buende. Dilayi amu mukalenga Shalume, udibu baye nende mu bupika. Bualu kakupingana kabidi to. Kakumona kabidi ditunga diende divuabu bamulele nansha.

¹¹ Bua Shalume, mukalenga wa bena Yuda, udi mupingane tatuende Yoshiya mu bukalenga, Maweja-Nangila udi wamba ne: “Kena upingana kabidi to.

¹² Neafuile muaba udibu baye nende mu bupika. Kakumona kabidi ditunga edi to.”

Badi babela Yoyakime

¹³ Wewe Yoyakime udi muena dikabi, bualu udi washisha nzubu wa bukalenga, kuyi ukosa nsambu pa yoyi. Udi ulungkaja nzubu ya kulu, kuyi unemeka bantu ne bintu biabu. Udi ukuatshisha bantu midimu, kuyi ubafuta!

¹⁴ Udi wamba ne: “Ndi musue kuibaka nzubu munene wa bukalenga, muikale ne nzubu mialabale ya bilala kulu.” Udi uyibaka ne madidishi ku bimana. Udi ulamika mabaya a mitshi ya sedre ku bimana. Udi ulaba mukubu mukunze pa nzubu mujima.

¹⁵ Udi wela meji ne: udi mukalenga muimpe, bua paudi usungula mabaya a sedre, adi bakalenga bakuabu kabayi nawu anyi? Tatuebe uvua udia unua, anu mudi bantu bonsu benza. Kadi uvua ukosa nsambu amu pa yoyi. Ke muvuaye mupete dikasa dimpe.

¹⁶ Uvua wakuila bapela ne bena dikenga. Nanku bantu bonsu bavua basombe amu bimpe. Muntu udi wenza nanku, ke udi uleja mudiye mummanye meme Maweja-Nangila.

¹⁷ Kadi wewe udi musue anu tshidi tshikulengelela wewe nkayebe. Udi ukeba anu kushipesha bantu badi kabayi ne bualu, ne kukengesha bantu ne tshikisu.

¹⁸ Bua Yoyakime, muana wa Yoshiya, mukalenga wa bena Yuda, Maweja-Nangila udi wamba ne: Yeye mufue, bantu kabakumudila to. Muntu kakuamba ne: “Tutu wanyi, diakabi kaayi edi?” “Yaya wanyi, diakabi kaayi edi?” Kabakumudila bamba ne: “Mfumuanyi, diakabi kaayi?” “Mukalenga, diakabi kaayi edi.”

¹⁹ Nebamujike bu nyama. Nebakoke tshitalu tshiende panshi, bua kutshimansha, kutshiela pambelu pa biibi bia Yerushalayime.

Bundu ne kapeja nebikuate Yerushalayime

²⁰ Bena mu Yerushalayime, bandayi ku lusongu lua mukuna wa Lebanone, elayi mbila. Pa mukuna wa Bashane, dilayi muadi. Tuayi mikemu biangatshile ku mikuna ya Abarime, bualu mbabutule balunda bebe.

²¹ Mvua mukubele, pavua bualu nansha bumue kabuyi buanji kuenzeka. Kadi wewe kuandamuna ne: “Tshiena musue kuteleja nansha.” Ke muuvua wenza misangu yonsu, biangatshile ku buana buebe! Kuena muteleje musangu nansha umue, bimvua nkuambila.

²² Balombodi bebe nebaye nabu, mudi lupepele lujula bintu. Balunda bebe nebabuele mu bupika. Malu mabi onsu auvua muenze, neakukebele anu bundu ne kapeja.

²³ Wewe uvua musombe talalaa pa mukuna wa Lebanone. Uvua muenze disua diebe mu mutshi wa sedre. Kadi neudinyenge bu mukaji udi ukeba kulela. Neutue mikemu bikole, padi makenga akukuata.

Konya muana wa Yoyakime

²⁴ — Newambile Konya, muana wa Yoyakime, mukalenga wa bena Yuda, ne: “Nansha wewe muikale bu tshitampi tshianyi tshindi natshi ku tshianza tshia balume, nenkumushe ku munu wanyi. Bu mundi ne muoyi Bulelela, ndi nditshipa ne:

²⁵ Ndi nku fila kudi bantu badi bakeba kukushipa, bantu baudi utshina bikole; ke Nebukadnesare, mukalenga wa bena Babilone, ne bena mvita bende.

²⁶ Nenkuipate wewe ne mamuebe. Nennutume mu ditunga dishilangane ne ditunga didibu bakulele. Nenufuile muaba awu, wewe ne yeye.

²⁷ Nenujinge mua kupingana mu ditunga dienu. Kadi kanuakupingana mu to.”

²⁸ Bantu nebakonke ne: “Konya, udi muntu mufuanangane ne luesu lufue ludibu bimansha anyi? Udi bu tshintu tshia patupu anyi? Yeye ne bana bende mbabipate baye nabu mu ditunga didibu kabayi bamanye bua tshinyi?”

²⁹ — Eyi, ditunga dianyi, ditunga dianyi! Teleja tshidi Maweja-Nangila wamba!

³⁰ Udi wamba ne: “Bafunde muntu ewu mu mukanda wa bakalenga bu muntu udi kayi ne bana! Nsongalume awu mmupange bionsu. Muntu nansha umue wa ku ndelanganyi yende kakusomba pa nkuasa wa bukalenga bua Davide, kakuikala mfumu wa Yuda to.”