Yirmeya 21 - MUKANDA WA MYIDI MUKULU

Yirmeya udi wandamuna mukalenga Sedekiya

¹ Mukalenga Sedekiya uvua mutume Pashekure, muana wa Malkiya, ne mutuangaji Sefanya, muana wa Masheya, bua kukonka Yirmeya ne:

² — Yirmeya, bu wewe musue, utukonkele Mvidi Mukulu, bualu Nebukadnesare, mukalenga wa bena Babilone, udi udiluisha. Ulombe Maweja-Nangila bua adienzele tshishima, bu muvuaye muenze kale, bua bena Babilone batushile muaba bumuke.

³ Kadi Yirmeya kuandamuna bantu bavua mukalenga mutume ne: — Pinganayi kudi mukalenga Sedekiya, numuambile ne:

⁴ Maweja-Nangila Mvidi Mukulu wa bena Izrayele udi wamba ne: “Nudi nuluisha tshiluilu tshia mukalenga wa bena Babilone tshidi tshinunyunguluila. Kadi meme nengambuluishe baluishi benu, bua bena mvita benu badi baluangana kumpala kua bimana bia tshimenga banyeme, bapingane munda mua tshimenga.

⁵ Meme nkayanyi nennuluishe mvita. Bu mundi ne tshiji tshikole, nennuleje mundi ne bukole, mumanye mvita.

⁶ Nenshipe bantu badi basomba mu tshimenga etshi, bantu ne nyama. Nebafue ku disama dikole dia tshiambu.

⁷ Pashishe, Sedekiya, mukalenga wa bena Yuda, balombodi ba bukalenga buende, ne bantu ba mu tshimenga etshi, badi bapanduke ku disama dia tshiambu, ku mvita, ne ku tshiyole tshia nzala, mukalenga wa bena Babilone neabakuate. Eyowa, nembafile kudi baluishi babu badi bajinga kubashipa. Mukalenga Nebukadnesare neabashipe kayi luse. Kakushiya muntu nansha umue ne muoyi.”

⁸ Maweja-Nangila kutuma bantu kudi Yirmeya bua kubambila ne: “Maweja-Nangila udi wamba ne: ndi munuteke mu mansanga a njila. Kumpala kuenu kudi lufu nansha muoyi.

⁹ Muntu yonsu washala mu tshimenga etshi, neafue anu ku mvita, ku tshiyole tshia nzala, nansha ku disama dia tshiambu. Kadi muntu wa kunudi udi umuka mu tshimenga etshi, uya kudi bena Babilone badi bamuluisha, neikale ne muoyi.

¹⁰ Tshiena ne meji a kusungidila tshimenga etshi, kadi anu a kutshibutula. Mukalenga wa bena Babilone neatshikuate, neatshioshe ne kapia.”

Malu adi Maweja-Nangila umanyisha bena diku dia bukalenga

¹¹ Telejayi malu avua Yirmeya ne bua kumanyisha bena diku dia bukalenga bua bena Yuda.

¹² Nuenu bantu ba mu diku dia Davide, telejayi tshidi Maweja-Nangila wamba. Udi wamba ne: Ku dituku ku dituku panualumbulula bilumbu, nukose nsambu amu pa yoyi. Bantu badibu banyenga bintu biabu, nubapatule mu bianza bia badi babakengesha. Tshianana tshiji tshianyi netshijuke bu mudi kapia kadi kuosha bionsu, kapia kadi muntu kayi mua kujima. Bualu nuvua benze malu mabi mapite bungi.

¹³ Meme ndi nnuluisha nuenu badi base kuinshi pa mukuna. Nudi nuamba ne: Muluishi nansha umue kena mua kumpeta, kena mua kubuela muaba utudi basombe!

¹⁴ Kadi meme nennuluishe, nennunyoke bua bubi bunuvua benze. Nengoshe mitshi ya sedre idi mu nzubu yenu. Kapia aka nekabutule bionsu. Meme Maweja-Nangila ndi ngamba nanku.