Yirmeya 20 - MUKANDA WA MYIDI MUKULU

Badi bela Yirmeya ku tshikunyi

¹ Pashekure, muana wa Imere, mutuangaji mulombodi wa bena mudimu ba mu nzubu wa Mvidi Mukulu, uvua mumvue Yirmeya ulongesha malu aa mu dina dia Maweja-Nangila.

² Kufutaye Yirmeya mapi, kumuelaye ku tshikunyi tshivua ku tshiibi tshia kulu tshia bena Binyamine, tshivua mu nzubu wa Mvidi Mukulu.

³ Butshia, Pashekure kumusha Yirmeya ku tshikunyi. Yirmeya kumuambila ne: — Maweja-Nangila kena ukubikila kabidi ne Pashekure, kadi neakubikile ne: “Luzakalu miaba yonsu.”

⁴ Bualu Maweja-Nangila udi wamba ne: “Wewe ne balunda bebe bonsu nenuikale tshintu tshidi tshikuatshisha bantu bowa. Balunda bebe nebafue ku muele wa mvita wa baluishi babu, wewe muikalepu. Bena Yuda, nembafile bonsu kudi mukalenga wa Babilone. Yeye neabakuate. Neaye nabu mu bupika mu ditunga diende, nansha neabashipe.

⁵ Bubanji bonsu buvua bantu ba mu tshimenga etshi nabu, difutu dionsu dia ku mudimu wabu, bintu bia mushinga bivuabu nabi, nansha biuma mene bivua bakalenga ba bena Yuda nabi, bionsu abi, nembifile kudi baluishi babu. Bobu abu nebabipawule, nebabiangate, baye nabi mu Babilone.

⁶ Ne wewe kabidi Pashekure ne bonsu baudi nabu, nenuye mu bupika. Pawafika mu Babilone neufue. Nebakujikemu wewe ne balunda bebe bonsu bauvua wambila malu a dishima.”

Yirmeya udi umanyisha Mvidi Mukulu dikenga diende

⁷ Maweja-Nangila wewe kuntekesha! Meme kuanyisha bua wewe kuntekesha! Wewe kunkuata, wewe kumpita bukole! Bantu badi banseka matuku onsu. Bonsu badi bampetula.

⁸ Pandi musue kuakula, ndi amu ne bua kuela mbila ne: Nebanukengeshe, nebanubutule! Badi banseka, bampenda matuku onsu pandi mmanyisha bantu muaku webe.

⁹ Pandi ngamba ne: “Tshiena musue kuvuluka kabidi Mvidi Mukulu to. Tshiena musue kuakula kabidi mu dina diende”, diba adi munda muanyi, muaku webe udi bu kapia kadi katema. Ndi ngenza muanyi muonsu bua kukajima munda muanyi, kadi tshiena ne mushindu to.

¹⁰ Ndi ngunwua bantu ba bungi bangamba bibi. Badi banginyika dina: “Luzakalu miaba yonsu.” Banga badi bamba ne: “Mufundayi ku tshilumbu.” Bakuabu badi bamba ne: “Eyowa, tumufunde patoke.” Balunda banyi ba pa muoyi mene, badi bantentekela, bua kumanya ne: neatupakane anyi? Badi bamba ne: “Yeye muambe bibi, tudi mua kumukuata, kudisombuela kudiye.”

¹¹ Kadi Maweja-Nangila wewe udi ne bukole! Wewe udi unduila meme mvita. Badi bankengesha, badishinde. Nebapange tshia kuenza. Bu mudibu kabayi bapeta tshintu, nebafue bundu. Kakuena muntu wapua bualu ebu muoyi.

¹² Wewe Maweja-Nangila wa bukole buonsu, udi mumanye muntu udi ukulamata. Udi ujingulula meji adi muntu nawu munda. Mvua muteke tshilumbu tshianyi mu bianza biebe. Nanku ndi musue kumona muudi unyoka bena lukuna banyi.

¹³ Imbilayi Maweja-Nangila musambu, numusamune, bualu uvua mumushe muena dikenga mu bianza bia baluishi bende.

¹⁴ Dituku divua dimona muvuabu bandele, ndia diakabi. Muntu kambi ne: dituku divua mamu mundele ndia dikasa dimpe!

¹⁵ Muntu uvua muambile tatu, mumusankishe ne: “Mbakulelele muana wa balume”, asangane muena diakabi kuenza anyi? Enze!

¹⁶ Muntu ewu ikale bu bimenga bivua Mvidi Mukulu munyange kayi ne luse. Dinda muntu ewu umvue anu miadi! Munda munya umvue anu mitoyi ya mvita!

¹⁷ Bu Mvidi Mukulu muanyishe bua meme kufuila munda mua mamu, kayi muanji kundela, bivua bimpe bitambe! Munda mua mamu wanyi muvua kuikala luanyi lukita. Uvua mua kundama munda muende kashidi.

¹⁸ Bavua bandele bua tshinyi? Amu bua kumvua ntatu ne makenga anyi? Amu bua banseke kashidi anyi?