Yirmeya 2 - MUKANDA WA MYIDI MUKULU

Badi balekela mpokolu wa mayi matoke, bakeba mayi mu bipanza biela mitanta

¹ Maweja-Nangila kungambila ne:

² — Yirmeya, uye kumanyisha muntu yonsu udi mu Yerushalayime ne: Maweja-Nangila udi wamba ne: Ndi muvuluke mushindu uuvua kale. Ndi muvuluke muuvua mundamate, pautshivua nsongakaji! Uvua munnange bikole, patutshivua babangilangane! Uvua undonda mu tshipela, muaba udi kauyi utoloka tshintu.

³ Wewe Izrayele, uvua wanyi meme nkayanyi, bu biakudia bia tshianyi bidibu banowa. Bantu bonsu bavua bakuluisha meme kubakengesha. Diakamue kupetabu diakabi. Meme Maweja-Nangila, ndi njadika nanku.

⁴ Nuenu ndelanganyi ya Yakobe, nuenu bena mu bisamba bionsu bia Izrayele, telejayi bindi ngamba.

⁵ Maweja-Nangila udi unukonka ne: Bankambua benu bavua bammone ne bualu bubi kaayi? Bakandekela bua tshinyi? Bakambenga amu bua kutendelela mvidie ya tshianana. Nanku bobu kabidi badi bantu ba tshianana!

⁶ Kabavua nanyi bualu, kabavua bebejangana ne: ‘Maweja-Nangila udi penyi? Yeye ke uvua mutupatule mu Ejipitu, mutupitshishe mu tshipela, muaba muume uvua ne mbuwa, muaba kauyi mayi, udi ukuatshisha bantu bowa, muaba udi muntu kayi upitshila, kayi wasa nzubu.’

⁷ Meme Maweja-Nangila mvua munufikishe mu ditunga didi ne biakudia bia bungi, bua nuenu kupeta biakudia bisheme bia mishindu yonsu bidi muaba awu. Ditunga edi divua dianyi meme Maweja-Nangila. Nuenu kubuelamu, kadi nuenu kunyanga ditunga edi ne mikiya. Muaba awu uvua wanyi meme. Nuenu kuunyanga, kushalawu muaba mubi mutambe.

⁸ Batuangaji kabena bankeba ne: ‘Maweja-Nangila udi penyi?’ Bantu bavua bamanye mikenji bikole, kumpangabu. Balombodi ba bantu kuntombokela meme Maweja-Nangila. Bambi kuambila bantu malu mu dina dia Baale. Bantu bonsu kutendelela mvidie ivua kayiyi ne bukole.

⁹ Nanku, ndi nenu tshilumbu. Nendumbuluishe ndelanganyi yenu. Meme Maweja-Nangila ndi njadika nanku.

¹⁰ Nanku, nuye kukonka bantu badi mu bidiila bia bena Ngreke, banuambile. Nuye kukonka bena Arabe badi mu Kedare. Nenujadike ne: bobu kabena benza bibi, munudi nuenu nuenza to.

¹¹ Nenujadike ne: kakuena tshisamba tshidi tshianji kubenga mvidie yatshi. Kabidi mvidie ayi, kayena nansha mvidie ya bushuwa! Kadi, tshisamba tshianyi tshia bena Izrayele, nansha bobu bamane kumona butumbi buanyi, kumbengabu, kunshintakaja ne mvidie idi kayiyi mua kubambuluisha.

¹² Nuenu badi mu diulu, kemayi bikole. Uminyinayi ne bowa, bua bualu bua mushindu ewu. Meme Maweja-Nangila, ndi njadika nanku.

¹³ Bantu banyi bena Izrayele mbenze malu mabi abidi: Mbambenge meme, mpokolu wa mayi mimpe. Mbadiumbuile biina bia mayi. Kadi biina bia mayi abi mbimane kuela mitanta, kabiena mua kulama mayi to!

Udi ubenga Maweja-Nangila mmuena diakabi

¹⁴ Mpindiewu bena Izrayele mbapika bavuabu basumbe anyi? Bavua babalele bapika bua bashale nanku kashidi anyi? Nansha kakese! Kadi mudibu bashale lelu tshiakudia tshia bantu ba bisamba bikuabu mbishi?

¹⁵ Bena bisamba abi badi bakungula bu nyama ya lonji, badi baluisha bena Izrayele, badi babakanyina. mBanyangakaje ditunga dia bena Izrayele bikole, bikuate bowa. Mbuoshe bimenga bia bena Izrayele. Bantu kabena basamu kabidi to.

¹⁶ Bena mu tshimenga tshia Memfise ne tshia Tapanese mene kubeyabu bena Izrayele nsuki.

¹⁷ Bionsu ebi mbienzeke, bualu nuenu bena Izrayele nudi badikebele diakabi. Nudi babenge Maweja-Nangila, Mvidi Mukulu wenu, uvua unulombola mu njila.

¹⁸ Mpindiewu, nudi nuya kuenza tshinyi mu Ejipitu? Nudi nuya kunua mayi a musulu wa Nile anyi? Nudi nuya kudi bena Ashure bua tshinyi? Bua kunua mayi a mu musulu wa Perate anyi?

¹⁹ Nuenu bena Izrayele, badi banunyoka bua bubi buenu. Badi banukengesha bualu nudi bantomboji! Nenku, mimanye ne: kulekela Maweja-Nangila Mvidi Mukulu wenu, kubenga kumutshina, mbualu butambe bubi. Meme Maweja-Nangila Mvidi Mukulu wa bukole buonsu, ndi njadika nanku. eku ne eku

Tshisamba tshia bena Izrayele tshidi bu mukaji utombokela bayende, utua

²⁰ Maweja-Nangila udi wamba ne: Wewe Izrayele, kukadi matuku a bungi audi mumbenge, muntombokele, wamba ne: “Ndi musue kudisombela.” Ke paudi ulala miaba yonsu pa mikuna, ne muinshi mua mitshi idi ne dileji dia bungi, bu mukaji muena tshiendenda.

²¹ Meme Maweja-Nangila mvua munukune, mudibu bakune mionji ya mvinyo muimpe. Nuvua bu maminu mimpe amvua mukune mu buloba. Kadi nudi banyanguke bua tshinyi? Nukadi bu mionji ya mvinyo mibole, indi tshiyi mua kumanya kabidi to.

²² Izrayele, nansha wewe muowe mayi ne nsabanga, nansha wewe mudilabe nsabanga wa bungi, bubi buebe kabuena bujimina to. Budi amu bumueneka pambidi pebe pandi nkutangila. Meme Maweja-Nangila Mvidi Mukulu, ndi njadika nanku.

²³ Izrayele, mmunyi muudi ukimina kuamba ne: “Tshiena ne manyanu, tshiena mutendelele mvidie Baale?” Tangila biudi wenza mu tshibandabanda! Utonde bionsu biuvua muenze! Udi bu muana wa kamelu mukaji, udi unyemakana eku ne eku.

²⁴ Udi bu nyama wa mpunde mukaji, udi muibidile mu tshisuku, mumanye njila yonsu ya mu tshipela. Nyama awu udi ununkila lupepele ne lukuka lukole. Kakuena tshidi mua kumukandika bua kuyaye kudi nyama mikuabu. Nyama ya mpunde milume idi ikeba mukaji awu, imupeta lukasa misangu yonsu idiye mumvue muoyi wa kuya kudi mulume.

²⁵ “Wewe Izrayele, udimuke! Paudi unyema lubilu lukole neutapike ku makasa, muminu webe neume ne nyota!” Kadi, wewe udi wamba ne: “Lekela kulengelela, ndi munange mvidie ya bantu ba bisamba bikuabu. Ndi musue kuyitendelela.”

²⁶ Nuenu bena Izrayele: bakalenga ne balombodi ba mu bukalenga, batuangaji ne bambi, matuku makese aa nenuikale ne bundu, bu muivi udibu bajikidila.

²⁷ Nudi nuambila lupingu lua mutshi ne: “Wewe ke tatu wetu!” Nudi nuambila lupingu lua dibue ne: “Wewe ke mamu udi mutulele!” Pa mutu pa nuenu kupingana kundi meme Maweja-Nangila, nudi bangele nyima. Kadi panuapeta dikenga, nenumbikile nuamba ne: “Luaku, utupandishe!”

²⁸ Kadi, meme Maweja-Nangila nennukonke ne: “Mvidie inuvua badienzele idi penyi? Pikalayi ne bukole, inusungidile, panudi mu dikenga! Bualu nuenu bena Yuda, bungi bua bimenga bienu, ke bungi bua mvidie yenu.”

²⁹ Maweja-Nangila udi ukonka ne: Nudi nundiwula bua tshinyi? Nuenu bonsu nukadi bambenge.

³⁰ Meme kununyoka, kadi kabiena binuenzela bualu to. Kanuena bateleja mibelu eyi. Kadi nuenu kushipa bambi benu, bu nyama ya ntambue ya lonji.

³¹ (Bantu badi babala bualu ebu mpindiewu, bateleje bimpe tshidi Maweja-Nangila wamba!) Bena Izrayele, meme Maweja-Nangila ndi nnukuatshisha bowa mudi tshipela nansha mudi ditunga didi ne miidima bikuatshisha bantu bowa anyi? Eyi, bantu banyi bena Izrayele, mmunyi munudi nuamba ne: “Tudi tuenza mutudi basue, katuena tupingana kuudi!”

³² Nsongakaji udi mua kupua muoyi bilengejilu ne mabue a mushinga mukole anyi? Mukaji udi ku dibaka udi mua kupua muoyi mukaba muimpe muluka, uvuaye muvuale mu tshibilu tshia dibaka anyi? Nansha kakese. Kadi nuenu bantu banyi bena Izrayele, nudi bampue muoyi matuku a bungi kaayi mua kubala to.

³³ Bu muudi ne budimu mu nsombelu webe udi udikebela baudi musue kunanga. Bua kubapeta, ukadi muibidilangane ne buenzavi.

³⁴ Badi basangana mashi a bakengi, badi kabayi ne bualu too ne ku nzemba ya bilamba bienu. Nuvua babashipe bua tshinyi? Kanuvua babajikidile batula biibi bia nzubu yenu bua kuiba to. Kadi nansha nuenu benze bionsu abi,

³⁵ nudi amu nuamba ne: katuena ne tshilumbu to. Maweja-Nangila ke udi mupile, bualu udi utufikila munda kapayi bualu. Kadi bu munudi nuamba ne: katuena benze bualu bubi, ndi musue kunulumbuluisha.

³⁶ Nudi nutua eku ne eku, nukeba kutua ndondu ne matunga a bende. Kadi bena Ejipitu nebanufuishe bundu, muvua bena Ashure banufuishe bundu.

³⁷ Nenupingane ne bundu, babuikile bianza ku mesu. Bualu, meme Maweja-Nangila, tshiena musue bua nukebe bantu ba nanku bua banuambuluishe. Kanuena mua kupeta diakalenga kudi bantu aba to.