Yirmeya 16 - MUKANDA WA MYIDI MUKULU

Yirmeya ntshiasa nkaya

¹ Maweja-Nangila kungambila ne:

² — Kusedi mukaji. Kuledi bana ba balume, nansha ba bakaji mu ditunga edi to.

³ Bualu meme Maweja-Nangila ndi nnumanyisha ne: bana ba balume ne ba bakaji badibu balele mu ditunga edi, ne batatuabu ne bamamuabu,

⁴ bonsu nebafue lulu lubi. Kabakumona udi mua kubadila nanshakubajika to. Bitalu biabu nebifukishe buloba. Nebafile mu mvita, nansha ku tshiyole tshia nzala. Bitalu biabi nebabizokole kudi nyunyi ya mikanku, babidie kudi nyama ya mibuabua.

⁵ Maweja-Nangila kungambila kabidi ne: — Kufiki muaba udi tshitalu, kufiki muaba udibu bajika muntu. Kusambi muntu mu madilu, bualu tshiena kabidi bulunda ne bantu aba to! Tshiena mubamanye, tshiena mubanange kabidi to.

⁶ Nanku, mu ditunga edi bantu bonsu, bena biuma ne bapele, nebafue. Bantu kabakubajika, kabakubadila. Kakuakuikala muntu udi mua kunyingalala, kuditapa mputa pambidi, nansha kudibeya nsuki.

⁷ Muntu nansha umue kakufila biakudia mu nzubu wa madilu, nansha maluvu, bua kusamba badi mu madilu, nansha bobu badila tatu anyi mamu.

⁸ Kuena mua kubuela kabidi mu nzubu udibu benza tshibilu. Kuena mua kusomba bua kudia nansha kunua ne bantu badibu babikila.

⁹ Bualu meme Maweja-Nangila Mvidi Mukulu wa bukole buonsu, Mvidi Mukulu wa Izrayele, ndi ngamba ne: “Nenkandike mitoyi ne mbila ya disanka, kabidi ne misambu ne musangelu bia bantu batshidi babuela mu dibaka. Wewe neushale ne muoyi bua kumona malu onsu aa.”

¹⁰ Pawambila bantu aba bualu ebu, nebakukonke ne: “Maweja-Nangila udi musue kututumina dikenga bunene nanku bua tshinyi? Tudi benze bualu bubi kaayi? Tudi benzele Maweja-Nangila Mvidi Mukulu bibi mushindu kaayi?”

¹¹ Wewe ubandamune ne: “Maweja-Nangila udi wamba ne: bualu baledi benu bavua bambenge, balamate ku mvidie ya bantu ba bisamba bikuabu. Bavua bayitendelela, bayifuila binu panshi. Kabavua bamvuluke, kabavua balame mikenji yanyi.

¹² Nuenu kabidi nudi nuenza malu mabi mapite, avua baledi benu kabayi benza. Yonsu wa kunudi udi unanukila kuenza anu malu mabi ne muoyi mubi wa tshitunu. Muntu nansha umue kena uteleja tshindi ngamba.

¹³ Nenku nennuipate mu ditunga edi, bua nuye mu dikuabu, divua baledi benu kabayi bamanye, dinuvua nuenu mene kanuyi bamanye. Kuine aku nenutendelele munya ne butuku mvidie ya bantu ba bisamba bikuabu. Kadi meme tshiakunuenzela kabidi bualu buimpe nansha bumue.”

Nebapingane mu ditunga bafume mu bupika

¹⁴ Maweja-Nangila udi wamba ne: dituku nedikumbane, didibu kabayi baditshipa bamba ne: “Ndi nditshipa mu dina dia Maweja-Nangila udi ne muoyi, udi mupatule bena Izrayele mu bupika!”

¹⁵ Kadi nebambe ne: “Ndi nditshipa mu dina dia Maweja-Nangila udi ne muoyi, udi mumushe bena Izrayele mu ditunga dia ku mutu, ne mu matunga makuabu avuaye mubatume mu bupika!” Bualu nembapingaje mu buloba buabu, bumvua mupeshe bankambua babu.

Nebakuate bena tshibawu bonsu

¹⁶ Maweja-Nangila udi wamba ne: ndi ntuma bilembi bia bungi bua bikuate bena Yuda, mudibu bakuata minyinyi ya mu mayi. Pashishe ndi ntuma bilembi bia bungi bua bibakebe miaba yonsu, mudibu bipata nyama mu mikuna minene ne mikese, too ne mu mbuebue.

¹⁷ Bualu ndi ntangila bimpe tshidibu benza. Kakuena tshidi mua kunjimina. Tshilumbu tshiabu ndi mutshimanye.

¹⁸ Ndi musue kubanyoka bikole bua malu mabi avuabu benze, ne bua tshilema tshiabu. Bualu mbanyange ditunga dianyi ne mpingu yabu indi mbenga idi bu bitalu. Bavua bateka mvidie ya dishima miaba yonsu mu ditunga dianyi.

Bantu bonsu nebamanye Mvidi Mukulu mulelela

¹⁹ — Maweja-Nangila, wewe udi umpesha bukole. Wewe udi undama. Mu tshikondu tshia dikenga, ndi mua kunyemena kuudi. Bantu ba bisamba bikuabu nebafike kuudi wewe, bafuma ku nshikidilu wa buloba. Diba adi nebambe ne: “Bankambua betu bavua anu ne mvidie ya dishima. Mvidie yabu ivua anu lupepele, kayivua mua kuambuluisha muntu nansha umue.

²⁰ Muntu kena mua kudienzela mvidie wende. Mvidie idi bantu benza kayena mvidie nansha!”

²¹ Maweja-Nangila udi wamba ne: — Nanku mpindiewu nemmanyishe bantu mundi mfumu, mundi mukole. Nebamanye ne: Maweja-Nangila ke meme!