Yezekiyele 48 - MUKANDA WA MYIDI MUKULU

Maloba a bisamba bidi ku mutu

¹ Ke mena a bisamba ne maloba abi: Bena Dane, nebapete muaba ku mutu wa ditunga, ku muelelu wa njila udi upitshila ku Etlone, Lebo-Amate ne ku Ashare-Enane, pabuipi ne bukalenga bua Damase ne bua Amate. Mukalu wa buloba buabu udi umuka ku mukalu wa luseke ludi diba dipatukila, ushikidila ku Mayi manene a pankatshi pa matunga, luseke ludi diba dibuelela.

² Buloba bua bena Ashere nebutuangane ne bua bena Dane, biangatshile ku luseke ludi diba dipatukila too ne ku ludidi dibuelela.

³ Buloba bua bena Naftali nebutuangane ne buloba bua bena Ashere.

⁴ Bua bena Menashe nebutuangane ne bua bena Naftali.

⁵ Bua bena Efrayime nebutuangane ne bua bena Menashe.

⁶ Bua bena Rubene nebutuangane ne bua bena Efrayime.

⁷ Bua bena Yuda nebutuangane ne bua bena Rubene.

Buloba bua Maweja-Nangila

⁸ Biangatshile ku luseke ludi diba dipatukila too ne ku Mayi manene a pankatshi, luseke ludidi dibuelela, nebashiye buloba butuangane ne bua Yuda, buikale bule bumue ne bua tshisamba tshionsu. Mu bule nebuikale ne kilometre dikumi ne ibidi ne tshitupa. Nebase nzubu wa Mvidi Mukulu munkatshi mua buloba abu.

⁹ Buloba bua Maweja-Nangila nebuikale ne kilometre dikumi ne ibidi ne tshitupa mu bule, kilometre dikumi mu butshiama.

¹⁰ Buloba bunudi bapeshe batuangaji nebuikale bule bua kilometre dikumi ne ibidi ne tshitupa, biangatshile ku luseke ludi diba dipatukila too ne ku ludidi dibuelela. Nebuikale butshiama bua kilometre itanu, biangatshile ku mutu wa ditunga too ne kuinshi. Munkatshi muabu nebase nzubu wa Maweja-Nangila.

¹¹ Buloba ebu nebuikale bua batuangaji bavuabu bajidila, ba ku ndelanganyi ya Sadoke. Bualu bobu bavua benzela Mvidi Mukulu mudimu bimpe. Kabatua babenga Mvidi Mukulu, bu mutua bena Levi benza, patuabu bamone bena Izrayele bamubenga.

¹² Nanku nebapete buloba bua tshijila menemene mu buloba bua Maweja-Nangila, pabuipi ne buloba bua bena Levi.

¹³ Buloba bua bena Levi nebuikale bufuanangane ne bua batuangaji. Maloba onsu abidi neikale ne kilometre dikumi ne ibidi ne tshitupa mu bule, kilometre itanu mu butshiama.

¹⁴ Kabena mua kushintakaja nansha kusumbisha, anyi kupesha muntu muaba mu buloba ebu budi bupite makuabu onsu ku buneme, bualu bavua babujidila mu dina dia Maweja-Nangila.

Tshimenga ne buloba bia mukalenga

¹⁵ Mu buloba bua pa buabu ebu, nebishale muaba wa kilometre ibidi ne tshitupa mu butshiama, ne kilometre dikumi ne ibidi mu bule. Buloba abu kabuakuikala bujidila, bua bamone mua kuasamu tshimenga, ne nzubu mishilangane ya bantu. Munkatshi nemuikale tshimenga.

¹⁶ Tshimenga etshi netshikale bule bumue bua metre binunu bibidi nkama ibidi ne makumi atanu mu nseke yonsu inayi.

¹⁷ Ku nseke inayi ya tshimenga nekuikale muaba mushale mutupu wa metre lukama ne makumi abidi ne itanu mu butshiama.

¹⁸ Mu tshitupa tshidibu bajidila mu dina dia Maweja-Nangila, nekushale kabidi muaba wa kilometre itanu mu bule, ku luseke ludi diba dipatukila lua tshimenga, ne muaba mukuabu wa kilometre itanu ku luseke ludi diba dibuelela lua tshimenga. Nebapetemu biakudia bikumbane bua bena mu tshimenga.

¹⁹ Bantu bonsu badi benza mudimu mu tshimenga, ne mba tshisamba kampanda nansha tshisamba kansanga, badi mua kudima mu buloba ebu.

²⁰ Buloba bua Maweja-Nangila ne buloba bua tshimenga, onsu abidi masanga neikale bunene bumue bua kilometre dikumi ne ibidi ne tshitupa ku nseke yonsu inayi.

²¹ Muaba udi ushala newikale wa mukalenga. Buloba buende nebuikale ku nseke yonsu ibidi ya buloba bua Maweja-Nangila ne bua tshimenga. Nebutuangane nabu, kilometre dikumi ne ibidi ne tshitupa mu butshiama, too ne ku mukalu wa luseke ludi diba dipatukila, kabidi too ne ku Mayi manene a pankatshi pa matunga luseke ludi diba dibuelela. Nanku, buloba budibu bajidila mu dina dia Maweja-Nangila, ne muaba wa tshijila, nebikale munkatshi mua buloba busunguluke.

²² Buloba bua tshisamba tshia bena Levi ne tshimenga, nebikosolole buloba bua mukalenga mu bitupa bibidi, budi pankatshi pa buloba bua Yuda ku mutu, ne buloba bua Binyamine kuinshi.

Buloba bua bisamba bidi kuinshi mu ditunga

²³ Bisamba bikuabu ne miaba yabi, bidi mushindu ewu: Buloba bua bena Binyamine budi butuadija ku mukalu udi luseke ludi diba dipatukila, too ne ku Mayi manene a pankatshi pa matunga, luseke ludi diba dibuelela.

²⁴ Buloba bua bena Binyamine biangatshile ku luseke ludi diba dipatukila, too ne ku luseke ludidi dibuelela, nebutuangane ne buloba bua bena Shimeyone.

²⁵ Bua bena Shimeyone nebutuangane ne bua bena Isakare.

²⁶ Bua bena Isakare nebutuangane ne bua bena Zebulone.

²⁷ Bua bena Zebulone nebutuangane ne bua bena Ngade.

²⁸ Mukalu wa bena Ngade luseke lua kuinshi mu ditunga newikale kabidi mukalu wa ditunga. Neutuadije ku tshimenga tshia Tamare luseke ludi diba dipatukila too ne ku mpokolu wa Meriba-Kadeshe. Pashishe neutungunuke ku musulu wa mu Ejipitu, too ne ku Mayi manene a pankatshi pa matunga.

²⁹ “Nanku, ke munudi mua kukosolola buloba budi tshisamba tshionsu tshia bena Izrayele tshipeta mu ditunga. Meme Maweja-Nangila Mvidi Mukulu ndi ntuma diyi adi.”

Biibi dikumi ne bibidi bia Yerushalayime

^30-31 Bibueledi bia tshimenga tshia Yerushalayime bidi dikumi ne bibidi. Tshibueledi tshionsu netshikale ne dina dia tshisamba tshia bena Izrayele. Ku luseke lua ku mutu, tshimana netshikale ne biibi bisatu: tshiibi tshia Rubene, tshia Yuda, ne tshia Levi. Tshimana tshidi ne bule bua metre binunu bibidi, nkama ibidi ne makumi atanu.

³² Ku luseke ludi diba dipatukila, nekuikale kabidi tshimana tshia bule bua metre binunu bibidi, nkama ibidi ne makumi atanu. Mu tshimana nemuikale biibi bisatu: tshiibi tshia Yozefe, tshia Binyamine ne tshia Dane.

³³ Kuinshi nekuikale tshimana tshia bule bumue ne bikuabu. Mu tshimana nemuikale biibi bisatu: tshia Shimeyone, tshia Isakare ne tshia Zebulone.

³⁴ Pashishe, ku luseke ludi diba dibuelela nekuikale tshimana tshia bule bua momumue, tshikale kabidi ne biibi bisatu: tshia Ngade, tshia Ashere ne tshia Naftali.

³⁵ Bimana bionsu bidi binyungulula tshimenga pamue, bidi ne bule bua metre binunu tshitema. Nanku, tshimenga etshi nebatshinyike ne: “Maweja-Nangila udiku.”