Yezekiyele 47 - MUKANDA WA MYIDI MUKULU

Mayi adi apatuka mu nzubu wa Mvidi Mukulu

¹ Muntu kupingana nanyi ku tshibuelelu tshia nzubu wa Mvidi Mukulu. Nanku meme kumona mayi apatukila muinshi mua mushiku wa mbelu, wa ku luseke ludi diba dipatukila. Bualu tshibuelelu tshia nzubu wa Mvidi Mukulu tshivua tshitangila ku luseke ludi diba dipatukila lua nzubu. Nanku mayi avua apuekela ku luseke lua kuinshi kua nzubu wa Mvidi Mukulu, pashishe avua apitshila luseke lua kuinshi kua tshilambuilu.

² Muntu kumpatuila mu nzubu wa Mvidi Mukulu ku luseke lua tshiibi tshia nzubu wa Mvidi Mukulu tshivua ku mutu. Kunyungulukaye nanyi pambelu too ne ku tshiibi tshia luseke ludi diba dipatukila lua nzubu. Mayi avua apueka ku luseke lua kuinshi kua tshiibi etshi.

³ Muntu kuyaye ku luseke ludi diba dipatukila. Uvua ne muonji wa kupima nawu. Kupimaye metre nkama itanu ku luseke alu. Pashishe kunsambuishaye mayi, avua mankuate mu tupombu.

⁴ Kupimaye kabidi metre nkama itanu, kunsambuishaye mayi, avua mankuate mu binu. Ku ndekelu kua metre nkama itanu mikuabu, kunsambuishaye kabidi mayi. Musangu ewu mayi avua mankuate mu tshimonu.

⁵ Musangu wa ndekelu kupimaye kabidi metre nkama itanu. Kadi tshivua mua kusabuka kabidi mayi to, bualu avua mapite kuwula. Avua mpindiewu ne muenji mukole, akengela kuowela bua kusabuka.

⁶ Kunkonkaye ne: — Yezekiyele, udi mutangile bimpe anyi? Kuyaye nanyi ku luseke katupa. Pashishe kumpingajaye ku muelelu wa muenji wa mayi.

⁷ Nanku meme kumona ne mitshi ya bungi ivua mpindiewu ku mielelu yonsu ya muenji wa mayi.

⁸ Muntu kungambila ne: — Muenji wa mayi ewu udi uya ku luseke ludi diba dipatukila lua ditunga, upueka mu tshibandabanda tshia musulu wa Yardene, udiela mu Mayi manene a luepu. Padi mayi awu abuela mu Mayi manene aa, adi aalengeja, ashale mimpe.

⁹ Muaba onsu udi mayi awu afika, nyama ya mishindu yonsu, kabidi ne mishipa, neyivulangane. Mayi awu nealengeje mayi manene. Muaba onsu udiwu abuela neafile muoyi.

¹⁰ Matuku adi kumpala, biangatshile ku Ene-Ngedi too ne ku Ene-Eglayime, balobi ne banyikile makondu abu ku muelelu wa mayi manene, bua kuumisha. Nebasanganemu mishipa ya mishindu ne mishindu, anu bu mudibu bayipeta ku Mayi manene a pankatshi pa matunga.

¹¹ Kadi mayi aa kaena alengeja bisense ne majiba bidi ku muelelu wa Mayi manene aa, bua bantu bamone mua kupetamu luepu.

¹² Mitshi ya bimuma ya mishindu yonsu neyitoloke ku mielelu yonsu ya musulu wa muenji. Mabeji ayi kaakuuma to. Mitshi neyikuame bimuma diba dionsu. Neyikuame bimuma ku ngondu ku ngondu; bualu mayi adi ayidisha, adi afumina ku nzubu wa Mvidi Mukulu. Bimuma biayi nebikale tshiakudia. Mabeji ayi neikale buanga bua kuondapa nabu.

Maweja-Nangila udi ujadika mikalu ya bena Izrayele

¹³ Maweja-Nangila Mvidi Mukulu udi wamba ne: “Ndi nnuleja mikalu ya ditunga, didi bisamba dikumi ne bibidi bia bena Izrayele mua kuabanyangana. Tshisamba tshia Yozefe netshipete bitupa bibidi bia ditunga.

¹⁴ Nudi mua kuabanyangana buloba ne muoyi wa kalolu. Bualu mvua muditshipe bua kufila ditunga dia bena Izrayele kudi bankambua benu. Nanku nudi mua kudipeta bu bumpianyi buenu.

¹⁵ Mukalu wa luseke lua ku mutu wa ditunga udi utuadija ku Mayi manene a pankatshi pa matunga, upitshila ku tshimenga tshia Etlone, tshia Lebo-Amate, ne tshia Sedade.

¹⁶ Pashishe mukalu udi upitshila ku bimenga bia Bereta ne Sibrayime, bidi pankatshi pa bukalenga bua Damase ne bua Amate, ne ku tshimenga tshia Ashere-Tikone pabuipi ne mukalu wa buloba bua Awurane.

¹⁷ Nanku, mukalu ewu udi utuadija ku Mayi manene a pankatshi pa matunga too ne ku tshimenga tshia Ashare-Enane ku luseke ludi diba dipatukila. Ku mutu kua mukalu awu, kudi bukalenga bua Damase ne bua Amate. Ke mukalu wa ku mutu wa ditunga.

¹⁸ Mukalu wa luseke ludi diba dipatukila udi utuadija ku muaba udi pankatshi pa buloba bua Damase ne bua Awurane, ulonda tshibandabanda tshia Yardene pankatshi pa buloba bua Ngilaade ne ditunga dia Izrayele, uya too ne ku tshimenga tshia Tamare ku Mayi manene a luepu. Ke mukalu wa ku luseke ludi diba dipatukila.

¹⁹ Kuinshi mu ditunga, mukalu udi utuadija ku Tamare, too ne ku mpokolu wa Meriba-Kadeshe. Udi ulonda musulu wa Ejipitu too ne ku Mayi manene a pankatshi pa matunga. Ke mukalu wa kuinshi mu ditunga.

²⁰ Ku luseke ludi diba dibuelela, mukalu udi amu Mayi manene a pankatshi pa matunga, biangatshile kuinshi kua ditunga too ne ku Lebo-Amate, ku mutu mu ditunga. Ke mukalu wa ku luseke ludi diba dibuelela.

²¹ “Nuabanyangane ditunga munkatshi mua bisamba bienu.

²² Nutshinke tshitupa tshionsu, nutshiabanyangane munkatshi muenu. Nuvuluke benyi badi munkatshi muenu, bakadi bamane kulelela bana mu ditunga. Bantu aba badi amu bu bena Izrayele. Mubenzele bionsu bidibu ne bua kuenzela bena Izrayele. Nanku, nebapete yabu miaba, munkatshi mua bisamba bia bena Izrayele.

²³ Yonsu wa kudibu neapete muaba wa kuasa mu tshisamba tshidiye musombe. Meme Maweja-Nangila ndi ntuma diyi edi.”