Yezekiyele 45 - MUKANDA WA MYIDI MUKULU

Tshitupa tshia buloba tshia Maweja-Nangila

¹ “Padibu bamane kuabanyina bisamba bia bena Izrayele ditunga, nebalame tshitupa tshia buloba tshidibu bajidila Maweja-Nangila. Tshitupa tshia buloba atshi netshikale ne kilometre dikumi ne ibidi ne tshitupa mu bule, kilometre dikumi mu butshiama. Tshitupa tshia buloba tshionsu atshi netshikale tshia tshijila.

² Mu tshitupa tshia buloba atshi, nulame muaba wa metre nkama ibidi ne makumi atanu ku nseke yonsu bua kuasa nzubu wa Mvidi Mukulu. Badi ne bua kunyungulula nzubu awu ne muaba udi mushale mutupu wa metre makumi abidi ne itanu mu butshiama.

³ Mu tshitupa tshia buloba atshi, badi ne bua kupima muaba wa kilometre dikumi ne ibidi ne tshitupa mu bule, kilometre itanu mu butshiama. Mu tshitupa atshi nebase nzubu wanyi, muaba menemene wa tshijila.

⁴ Tshitupa tshia ditunga etshi ntshia tshijila, ntshia batuangaji badi bangenzela mudimu muaba wa tshijila. Mu tshitupa atshi nebapete miaba ya kuasa, nebashiye kabidi muaba wa tshijila bua kuasa nzubu wanyi.

⁵ Muaba mukuabu wa kilometre dikumi ne ibidi ne tshitupa mu bule, ne kilometre itanu mu butshiama, nebaupeshe bena Levi, badi benza midimu mimpe mu nzubu wanyi. Nebapetemu bimenga bidibu ne bua kusomba.

⁶ Bilamatangane ne tshitupa tshia buloba etshi tshinudi nunjidila meme Maweja-Nangila, nupime kabidi muaba wa kilometre dikumi ne ibidi ne tshitupa mu bule, kilometre ibidi ne tshitupa mu butshiama, bua nuasemu tshimenga, muaba udi muena Izrayele yonsu mua kusomba.

⁷ Mukalenga wa ditunga neapete pende muaba ku nseke yonsu ibidi ya tshitupa tshia buloba tshivuabu bajidila Maweja-Nangila, ne tshivuabu balama bua kuasa tshimenga. Tshitupa tshia mukalenga etshi netshiye too ne ku Mayi manene a pankatshi luseke ludi diba dibuelela, kabidi netshifike too ne ku mukalu wa ditunga dia bena Izrayele wa luseke ludi diba dipatukila. Muaba awu wikale bule bua momumue ne bua tshitupa tshia buloba tshivua tshisamba tshionsu tshipete.

⁸ Nanku, bakalenga nebapete muaba wabu mu Izrayele. Kabakukengesha kabidi bantu ba Maweja-Nangila to. Nebashile bisamba bia bena Izrayele bitupa bikuabu bia mu ditunga.”

Meyi ne mikandu bidi bitangila mukalenga

⁹ Telejayi bidi Maweja-Nangila wamba ne: “Bakalenga bena Izrayele, nuvua bakoleshe malu bushiwa! Lekelayi malu a tshinyangu a kukengesha bantu, kanubanyengi bintu biabu, nuenze anu bimpe, nulonde anu njila wa malu mimpe. Kanuipatshi kabidi bantu banyi mu buloba buabu to. Meme Maweja-Nangila ndi nnutumina diyi edi.

¹⁰ “Muntu yonsu apime bintu ne tshipimu tshimpe.”

¹¹ Nuangate “efa” bua kupima ntete ya kuenza bukula, “bate” bua kupima bintu bia muendundu, kadi bidi ne bua kuikala bunene bumue bua tshia dikumi tshimue tshia “omere.” Omere ke tshipimu tshiudi ne bua kukuata natshi mudimu bua kujadika bunene bua bipimu bikuabu.

¹² Lukanu lua tshiamu tshitoke tshia mushinga mukole lua “sikle” ludi ne bujitu bua ngrame dikumi ne umue ne tshitupa, mmomumue ne “ngera” makumi abidi. Bidi bikengela nkanu eyi makumi asambombu bua kupeta bujitu bua ngrame nkama isambombu ne makumi muanda mukulu, mmomumue ne bua “mine” umue.

¹³ “Nufile milambu yenu mushindu ewu: nufile tshia makumi asambombu tshimue tshia ntete ya bukula ya mishindu yonsu inudi nunowa.

¹⁴ Nufile kabidi tshia lukama tshia mafuta anudi nuenza. Nupime mafuta ne bate, tshipimu tshia bintu bia muendundu. Bate udi tshia dikumi tshimue tshia omere, nansha tshia “kor.”

¹⁵ Pashishe, mu mpata ya bena Izrayele, pa mikoku nansha pa mbuji nkama ibidi, numushe tshimuna tshimue. Tshimuna atshi, nutshilambule bu mulambu wa bintu bia mu madimi, nansha bu mulambu wa kuosha, nansha bu mulambu wa bobumue, bua kupeta dijimija dia mibi yenu. Meme Maweja-Nangila Mvidi Mukulu, ndi ntuma diyi edi.

¹⁶ “Milambu eyi, bantu bonsu ba mu ditunga badi ne bua kuyifila. Nebaye kuyipesha mukalenga wa ditunga dia bena Izrayele.

¹⁷ Nanku, yeye ke udi ne mudimu wa kufila milambu ya kuosha, milambu ya bukula, ne milambu ya maluvu a mvinyo, bidibu bafila mu bibilu. Udi wenza nanku nangananga bua tshibilu tshia ngondu mupiamupia, bua matuku a Dikisha, ne bua matuku makuabu adi bena Izrayele basangile. Mukalenga udi ne bua kufila milambu bua kudikobolola, milambu ya bintu bia pa madimi, milambu ya kuosha, ne ya bobumue, bua bakobolole bena Izrayele.”

¹⁸ Maweja-Nangila udi wamba kabidi ne: “Dituku dia kumpala dia ngondu wa kumpala, nebalambule mulume wa ngombe udi kayi ne bulema pambidi, bua kumusha mikiya idi ku muaba wa tshijila.

¹⁹ Mutuangaji neangate mashi a ngombe udibu balambula awu, aalabe ku mabaya a ku tshiibi tshia ku nzubu wa Mvidi Mukulu, mu matumba anayi a ku tshibumba tshia tshilambuilu, ne ku mabaya a ku biibi bia lubanza lua munda mua nzubu wa Mvidi Mukulu.

²⁰ Dituku dia muanda mutekete dia ngondu, nebalambule kabidi ngombe mushindu awu, bua bantu bavua benza bibi mu mpukapuka, kabayi basue, kabayi nansha bamanye. Ke mudibu mua kumusha mikiya ku nzubu wa Mvidi Mukulu.

²¹ “Matuku dikumi ne anayi a ngondu, nenutuadije kuenza tshibilu tshia Dipita dia Maweja-Nangila. Netshinenge matuku muanda mutekete. Matuku onsu aa nenudie anu mampa kaayi mela buanga.

²² Dituku dia kumpala dia tshibilu, mukalenga nealambule ngombe mulume, bua kudikobolola yeye, ne kukobolola bena Izrayele.

²³ Kabidi, dituku dionsu dia mu matuku muanda mutekete a tshibilu, neandambule ngombe milume muanda mutekete, ne mikoku ya bimpanga muanda mutekete idi kayiyi ne bulema, bua mulambu wa kuosha. Dituku dionsu nealambule kabidi mbuji ya mpumbu bua kukobolola bena Izrayele.

²⁴ Pashishe neafile mulambu wa kilo makumi asatu a ntete ya kuenza bukula. Neasakidile litre isambombu ya mafuta ku ngombe yonsu ne tshimpanga bidibu balambula.

²⁵ “Bua tshibilu tshidi tshituadija dituku dia dikumi ne ditanu dia ngondu wa muanda mutekete, mukalenga neenze anu bu muvuaye muenze mu tshibilu tshia Dipita dia Maweja-Nangila. Dituku dionsu dia mu matuku muanda mutekete, nealambule milambu ya mushindu umue bua kukobolola bena Izrayele: ke milambu ya kuosha, ya ntete ne ya mafuta.”