Yezekiyele 43 - MUKANDA WA MYIDI MUKULU

Mvidi Mukulu udi upingana mu nzubu wende

¹ Muntu kuya nanyi ku tshiibi tshia luseke ludi diba dipatukila lua nzubu.

² Diba adi meme kumona butumbi bua Mvidi Mukulu wa Izrayele bufume ku luseke ludi diba dipatukila. Diyi dia Mvidi Mukulu dikole, bu mutoyi wa mayi manene, divua dienda kumpala kuabu. Butumbi abu buvua butokesha kabidi buloba ne nkenka yabu.

³ Malu avua Mvidi Mukulu undeja avua mafuanangane ne amvua mumone pavuaye mufike bua kubutula Yerushalayime, ne amvua mumone pamvua ku muelelu wa musulu wa Kebare. Nanku meme kutua mpala panshi.

⁴ Butumbi bua Maweja-Nangila kubuela mu nzubu wende, bupitshila ku tshiibi tshia luseke ludi diba dipatukila lua nzubu.

⁵ Mueyelu wa Mvidi Mukulu kungambula pa buloba, kunteka mu lubanza lua munda mua nzubu wa Mvidi Mukulu. Meme kumona butumbi bua Maweja-Nangila buvua tente mu nzubu amu.

⁶ Meme kumvua muntu ungakuisha. Diyi diende difumine munda mua nzubu wa Mvidi Mukulu. Kadi muntu uvua mumfikishe muaba awu utshivua anu ku luseke luanyi.

⁷ Maweja-Nangila kungambila ne: — Muntu, tangila muaba ewu. Ke muaba udi nkuasa wanyi wa bumfumu. Ke muaba undi ndiata makasa anyi. Nenshale muaba ewu munkatshi mua bena Izrayele kashidi. Bena Izrayele, nansha bakalenga babu, kabena mua kupepeja kabidi dina dianyi dia tshijila, ne buenzavi buabu, padibu bajika munemu bitalu bia bakalenga babu.

⁸ Bakalenga mbateke mushiku wa mbelu ne makunji bia ku nzubu wabu wa bukalenga, anu luseke lua mushiku wa mbelu ne makunji bia ku nzubu wanyi, bitangilangane. Mudi amu tshimana tshimue pankatshi pa nzubu wanyi ne wabu. Nanku bavua banyanga dina dianyi dia tshijila pavuabu benza malu mabi. Ke pamvua mubabutule ne tshiji.

⁹ Mpindiewu bena Izrayele mbalekele kuenza malu mabi ku mesu anyi. Nebumushe bitalu bia bakalenga babu muaba undi. Nanku nensombe munkatshi muabu kashidi.

¹⁰ Wewe, Yezekiyele, umanyishe bena Izrayele mushindu udi nzubu wa Mvidi Mukulu. Ubabele bua bumvue bundu bua malu mabi abu, batangile bimpe mushindu udibu ne bua kuasa nzubu ewu.

¹¹ Padibu bumvua bundu menemene bua malu mabi avuabu benza, ubaleje dibeji didi dibumvuija mudibu ne bua kuibaka nzubu wa Mvidi Mukulu, kabidi mudibu ne bua kukosolola nzubu: kushiya miaba ya kubuelela ne kupitshila, kulongolola nzubu mujima. Ubafundile, ubaleje bua badimuene meyi ne mikenji bidibu ne bua kukumbajamu, bua babilonde.

¹² Ke mukenji munene udi utangila nzubu wa Mvidi Mukulu: miaba yonsu idi inyungulula nzubu pa katongabela ka mukuna, ke miaba ya tshijila menemene.

Tshilambuilu ne milambu

¹³ Bunene butudi tunwuija ebu ke bua tshilambuilu. Badi bapima ne tshipimu tshia santimetre makumi atanu, tshivuabu bapima natshi nzubu wa Mvidi Mukulu. Mukidi uvua mutshinyungulukile uvua ne bondoke bua santimetre makumi atanu, ne santimetre makumi atanu mu butshiama. Ku luseke lua lubanza kuvua mubangu wa santimetre makumi abidi ne itanu mu butumbuke. Butumbuke bua tshilambuilu,

¹⁴ bavua babupima metre umue biangatshile panshi, bua tshibumba tshia kumpala, tshivua mutantshi wa santimetre makumi atanu ne ku mukidi. Tshibumba tshibidi tshivua kabidi mutantshi wa santimetre makumi atanu ne ku mubangu wa tshibumba tshia kumpala. Tshibumba atshi tshivua ne butumbuke bua metre ibidi.

¹⁵ Tshibumba tshia kulu tshia tshilambuilu, muaba uvua mbabula, uvua metre ibidi mu butumbuke. Matumba anayi avua malepesha matangile kulu.

¹⁶ Mbabula uvua ne metre asambombu ku nseke yonsu.

¹⁷ Tshibumba tshibidi tshia tshilambuilu tshivua kabidi ne butshiama bua momumue ku nseke yonsu inayi, metre muanda mutekete. Tshivua ne mubangu luseke lua lubanza, uvua ne centimetre makumi abidi ne itanu mu butumbuke. Mukidi uvua unyungulule tshibumba atshi, uvua ne santimetre makumi atanu mu butumbuke. Bavua babanda ku tshilambuilu pa tshibandilu tshivua luseke ludi diba dipatukila lua nzubu.

¹⁸ Mvidi Mukulu kungambila ne: — Yezekiyele, teleja tshindi meme Maweja-Nangila nkutumina diyi. Ke mikenji eyi inudi ne bua kulonda diba dinudi basa tshilambuilu, bua boshilepu milambu, numiamineku mashi a nyama.

¹⁹ Neufile kudi batuangaji ba bena Levi ba ku ndelanganyi ya Sadoke ngombe mulume. Anu bobu, ke bamvua muitabe bua bangenzele mudimu, meme Maweja-Nangila Mvidi Mukulu. Neboshe mulume a ngombe awu bua meme kubajimijila mibi yabu.

²⁰ Wangate mashi a ngombe awu, ualabe ku matumba anayi a tshilambuilu avuabu balepesha maye mulu, kabidi ku matumba a tshibumba tshibidi, ne panshi ku nseke yonsu inayi ya tshilambuilu. Ke muudi mua kumusha mikiya idi ku tshilambuilu, kutshijidila.

²¹ Pashishe, wangate mulume wa ngombe uvuabu balambula awu, bamoshile ku mpenga kua muaba wa tshijila wa Maweja-Nangila, muaba udibu balongolola bua mudimu awu.

²² Dinda, wangate mbuji wa mpumbu udi kayi ne bulema pambidi. Umulambule kabidi bu mulambu wa kukobolola nawu bantu. Neumushe mikiya idi ku tshilambuilu, bu muuvua muenze ne mulume a ngombe.

²³ Paudi ujikija kulambula, wangate mulume a ngombe ne mukoku wa tshimpanga, bidi kabiyi ne bulema pambidi.

²⁴ Ubintuadile meme Maweja-Nangila Mvidi Mukulu. Batuangaji bele luepu pambidi pabi, bandambule nyama eyi bu milambu ya kuosha.

²⁵ Dituku dionsu lumingu lujima, ufile mulambu wa mbuji wa mpumbu, wa kukobolola nawu bantu. Pashishe, ulambule kabidi mulume wa ngombe ne mukoku wa tshimpanga bidi kabiyi ne bulema pambidi.

²⁶ Nanku, matuku malondangane muanda mutekete, neumushe mikiya ku tshilambuilu, batshijidile bua kutshibanjija.

²⁷ Papita lumingu alu, dituku dia muanda mukulu, batuangaji nebamone mua kulambula pa tshilambuilu milambu ya kuosha ne ya bobumue inudi nufila. Nuenu benza nanku, nenganyishe milambu yenu. Meme Maweja-Nangila Mvidi Mukulu ndi ngamba nanku.