Yezekiyele 39 - MUKANDA WA MYIDI MUKULU

Mvidi Mukulu udi ukanyina Ngoge tshiakabidi

¹ Maweja-Nangila udi ungambila ne: — Muntu, ukanyine Ngoge mu dina dianyi. Meme Maweja-Nangila Mvidi Mukulu, ndi mmuambila ne: “Nenkuluishe wewe Ngoge, mukalenga munene wa mu Mesheke ne mu Tubale.

² Nenkupatule mu ditunga diebe. Nkuenzeje bua upatukile luseke lua ku mutu wa ditunga, bua kuya kuluisha mikuna ya bena Izrayele.

³ Pashishe, nenkunyoke. Buta buebe bua mikete nebutshibuke mu tshianza tshiebe tshia bakaji. Mikete yebe neyiponene panshi ku tshianza tshiebe tshia balume.

⁴ Nanku wewe, tshiluilu tshiebe tshionsu, ne bantu ba mu bisamba bivule biudi nabi, nenufuile pa mikuna ya mu Izrayele. Nentume nyunyi midianganyi ne nyama ya muitu, bua idie bitalu bienu.

⁵ Nenufue kabayi banujika mu buloba, bu mumvua meme Maweja-Nangila mumane kunumanyisha.

⁶ Nentemeshe kapia mu ditunga dia Magoge, ne ku muelelu wa mayi manene, muaba udi bantu bela meji ne: tudi tusomba talala. Nanku, bantu bonsu nebajadike ne: meme ndi Maweja-Nangila.

⁷ Nenkuate mudimu bua bantu banyi bena Izrayele bamanye mundi wa tshijila. Tshiena musue buabampeje kabidi to. Bisamba bikuabu nebimanye kabidi ne: meme ndi Maweja-Nangila Mvidi Mukulu wa tshijila wa bena Izrayele.

⁸ Eyowa, malu aa neenzeke. Akadi enzeka mene. Dituku dia kulumbuluisha bantu dimvua muambe dikadi dikumbane! Meme Maweja-Nangila Mvidi Mukulu, ndi njadika nanku.

⁹ Bena Izrayele nebapatuke mu bimenga biabu. Nebatemeshe kapia. Neboshemu bia mvita bia baluishi babu. Ngabu minene ne mikese, mata ne mikete, mafuma ne misongolu, nebabioshe mu kapia kadi ne bua kutema bidimu muanda mutekete.

¹⁰ Bantu kabakuya kukeba nkunyi mu mpata, nansha kabakukosa mitshi muitu to. Nebatemeshe kapia ne nkunyi ya mu bia mvita ebi. Nebibe pabu, nebanyangakaje bintu bia bantu bavua bibe biabu. Meme Maweja-Nangila Mvidi Mukulu ndi njadika nanku.

¹¹ “Malu onsu mamane kuenzeka, nempeshe Ngoge muaba mu Izrayele wa kujika bafue. Muaba awu newikale mu tshibandabanda tshia muaba wa Bapitshi ba mu njila, luseke ludi diba dipatukila lua Mayi manene a Luepu. Mu tshibandabanda amu, nebajikemu Ngoge ne bena mvita bende. Nkita eyi neyijikile bantu njila. Nebinyike muaba awu ne: ‘Tshibandabanda tshia bena mvita ba bungi ba Ngoge.’

¹² Bena Izrayele nebikale ne mudimu ngondu muanda mutekete wa kujika bitalu bia bantu aba, ne wa kumusha mikiya mu ditunga.

¹³ Bantu bonsu ba mu buloba abu nebenze mudimu awu. Ke mudibu mua kupeta pabu lumu dituku dindi ndeja butumbi buanyi. Meme Maweja-Nangila Mvidi Mukulu ndi njadika nanku.

¹⁴ Padi ngondu muanda mutekete ayi ijika, nebafume bantu mu ditunga dijima. Nebendakane miaba yonsu kabayi bikisha. Bantu abu nebakebe bitalu bionsu bidi bishale panshi. Nebabijike. Ke mudibu mua kumusha mikiya mu ditunga dijima nanku.

¹⁵ Nebendakane mu ditunga nseke yonsu. Padi umue wa kudibu usangana mifuba ya bantu, udi wela mishiki ya mabue pabuipi nayi, bua bumbudi ba mikidi bamone muaba awu, bambula mifuba ayi, baya kuyijika mu Tshibandabanda tshia bena mvita ba bungi ba Ngoge.

¹⁶ Nekuikale kabidi tshimenga tshinyika dina ne: Amona, Babungi. Ke mudibu mua kumusha mikiya mu ditunga dijima nanku.”

¹⁷ Maweja-Nangila Mvidi Mukulu kungambila kabidi ne: — Yezekiyele, bikila nyunyi ne nyama ya muitu, uyambile ne: “Umbukayi miaba yonsu inudi. Nudisangishe pamue bua kudia mulambu undi munulongoluele. Mulambu ewu newikale tshibilu tshinene pa mikuna ya Izrayele. Nenudiepu munyinyi, nunuapu ne mashi.

¹⁸ Nenudie munyinyi wa bena mvita ba bukitu, nunue mashi a balombodi ba buloba, badibu bafile bu mulambu, pa mutu pa kufila bimpanga, bana ba mikoku, mpumbu, ne ngombe ya mafuta ya mu Bashane.

¹⁹ Ku mulambu ewu ke kundi munubikidile. Nenudie mafuta nukute. Nenunue mashi mikuatshike.

²⁰ Ku tshibilu tshianyi nenudie minyinyi ya nyama ya tubalu ne ya bantu badi babandapu, ya bena mvita ba bisumbu bishilangane. Nenukute. Meme Maweja-Nangila Mvidi Mukulu, ndi njadika nanku.

²¹ “Nendeje bisamba bikuabu butumbi buanyi. Nebimone mundi ne bukole bua kukumbaja tshindi mujadike bualu buabu.

²² Biangatshile dituku adi, bena Izrayele nebajadike ne: meme ndi Maweja-Nangila Mvidi Mukulu wabu.”

Nkomenu wa dilongesha dia Yezekiyele

²³ “Maweja-Nangila udi wamba ne: Bisamba bikuabu nebiumvue ne: bena Izrayele bavua baye mu bupika bua bubi buvuabu bangenzela. Ke mumvua tshiyi kabidi nabu ne bualu to. Meme kubalekela mu bianza bia baluishi babu, bua babashipe bonsu mu mvita.

²⁴ Pandi mubalekele nanku, ndi mubanyoke bilondeshile malu abu mabi, ne mikiya isuabu bapie.

²⁵ “Kadi, meme Maweja-Nangila Mvidi Mukulu, ndi ngamba ne: Biangatshile mpindiewu, nengumvuile bena Izrayele, ndelanganyi ya Yakobe, luse. Nembapatule mu dikenga diabu. Bantu bonsu nebanemeke dina dianyi dia tshijila.

²⁶ Nanku, nebapue muoyi bundu buvuabu nabu, bualu bavua bantombokela. Nebasombe tshiakabidi mu ditunga diabu, kabayi batshina tshintu. Muntu nansha umue kakubakuatshisha bowa to.

²⁷ Nembapatule mu ditunga dia baluishi babu, mbapingaja kuabu. Ke mundi ndeja bisamba bidibu nabi mutumba mundi Mvidi Mukulu wa tshijila.

²⁸ Nembumushe mu bisamba bikuabu mumvua mubatume mu bupika, mbasangishe mu buloba buabu, tshiyi nshiya muntu wabu nansha umue panyima. Nanku nebajadike ne: meme ndi Maweja-Nangila Mvidi Mukulu wabu.

²⁹ Nenguwuje bena Izrayele ne Mueyelu wanyi. Tshiena mua kubalekela kabidi to. Meme Maweja-Nangila Mvidi Mukulu, ndi njadika nanku.”