Yezekiyele 38 - MUKANDA WA MYIDI MUKULU

Mvidi Mukulu udi ukanyina Ngoge

¹ Maweja-Nangila kungambila ne:

² — Muntu, tangila kudi Ngoge, mukalenga munene wa bantu badi basombe mu Tubale ne mu Mesheke mu ditunga dia Magoge. Umutandishe mu dina dianyi.

³ Meme Maweja-Nangila ndi mmuambila ne: “Nenkuluishe wewe Ngoge, mukalenga munene wa bantu badi basomba mu Tubale ne mu Mesheke.

⁴ Nenkuele nkanu ku binyanganyanga bua mmone mua kuya nebe kundi musue. Nenkupatule mu ditunga diebe, wewe ne tshiluilu tshiebe tshijima, ne nyama yebe ya tubalu, ne babandi ba pa nyama yebe ya tubalu, badi batuala bimpe, ne bisumbu bia bungi bia bena mvita bebe badi bambula ngabu ne miele ya mvita.

⁵ Bena mvita ba bena Persa, ba bena Kushe, ne ba bena Pute nebikale muntu yonsu ne ngabu wende, kabidi ne tshifulu tshiende tshia bena mvita. Bonsu aba nebaye nebe.

⁶ Bena mvita ba mu ditunga dia Ngomere, ne ba mu Bete-Togarma badi basomba ku mutu wa ditunga, nebaye nebe bisumbu ne bisumbu. Nansha bantu ba bungi kabidi ba bisamba bikuabu nebaye anu nebe.

⁷ Longolola bintu bia kuya nabi. Udilongolole wewe kabidi ne bantu bonsu badi ne bua kuitaba ku diyi diebe.

⁸ Padi bidimu bia bungi bipita, nenkutume bua kuluisha bena Izrayele. Bena Izrayele batua bapanduke ku mvita, nebumuke mu matunga mashilangane atuabu basombe. Nebaye kusomba pa mikuna ya Izrayele itua mishale munda mutupu bidimu bia bungi. Katshia bena Izrayele bumuke munkatshi mua bisamba bikuabu, batua basomba amu talala.

⁹ Kadi wewe Ngoge Mubaluishe ne tshiluilu tshiebe, kabidi ne bantu ba mu bisamba bikuabu baudi nabu. Neubuele ne mvita mu ditunga diabu ne lubilu bu lua mvula wa tshipupu. Newikale bu matuba adi abuikila ditunga diabu.

¹⁰ “Meme Maweja-Nangila Mvidi Mukulu, ndi ngamba ne: Padi tshikondu atshi tshikumbana, neutuadije kuela meji mabi.

¹¹ Newele meji a kuluisha bantu aba badi kabayi ne bualu, basomba mu bimenga tatuabu kabayi bakolesha ne bimana, kabiyi ne biibi bidibu bakanga ne bikuvu.

¹² Neufike bua kupawula ne kunyenga. Neuluishe bantu bavua bapingana mu bimenga bivua bangabanga mu makolu. Batua bumuke mu bisamba bikuabu basangile muaba umue. Batua bapeta bimuna ne bubanji. Mbasombe munkatshi mua bisamba mu masangu a njila.

¹³ Bena mu Saba, bena mu Dedane, ne bena misoku idi pamue nabu, bangenda mushinga ba mu Tarshishe, nebakuebeje ne: ‘Udi musangishe bena tshiluilu tshiebe bua kupawula bintu bia bantu ne kubakengesha anyi? Udi mufike bua kuangata tshiamu tshitoke tshia mushinga mukole, ne tshiamu tshia mpawungi, bimuna ne bubanji, bua wikale ne bintu bipeta mu mvita bia bungi anyi?’ ”

¹⁴ Yezekiyele, ke pandi nkutumina diyi ne: akula, umanyishe Ngoge tshindi meme Maweja-Nangila Mvidi Mukulu ngamba ne: “Tshikondu tshikuabu tshidi bantu banyi bena Izrayele basomba talala, neubange luendu.

¹⁵ Neutume mu ditunga diebe dia ku mutu wa ditunga. Neulombole biluilu bia bantu ba bisamba bionsu. Bonsu nebabande pa nyama ya tubalu. Nenuenze tshiluilu tshinene tshia bantu ba bungi.

¹⁶ Neufike bua kuluisha bantu banyi bena Izrayele. Neubuikile ditunga diabu bu mudi divuba dibuikila buloba. Nebienzeke kunyima kua matuku a bungi. Nenkutume wewe Ngoge bua kuluisha bena mu ditunga dianyi, bua bantu ba mu matunga a bende bamanye ne: ndi Mvidi Mukulu wa tshijila. Nembaleje malu onsu aa bualu wewe newikale muntu wanyi.

¹⁷ “Meme Maweja-Nangila Mvidi Mukulu, ndi nkuambila ne: Wewe ke umvua ntela kukadi bidimu bivule, diba dimvua muambile bambi ba bena Izrayele, bantu banyi, ne: numanyishe bena Izrayele misangu ne misangu ne: nentume muntu udi ne bua kuluisha bena ditunga dienu.

¹⁸ Kadi wewe Ngoge, dituku diudi ufika bua kuluisha bena Izrayele, tshiji tshianyi netshimueneke. Meme Maweja-Nangila Mvidi Mukulu ndi njadika nanku.

¹⁹ Ndi nditshipa ne: dituku dindi mfika munda, buloba nebuzakale bikole. Nennyungishe ditunga dijima dia bena Izrayele.

²⁰ Minyinyi ya mu mayi manene, nyunyi ya mulu, nyama ya muitu, nyoka idi ilandala panshi, ne bantu bonsu badi pa buloba, nebizakale bionsu ne bowa kumpala kuanyi. Mikuna neyupuke, mbuebue neyivingutuke, bimana nebiupuke.

²¹ Nenkukuatshishe bowa mishindu yonsu. Meme Maweja-Nangila Mvidi Mukulu, ndi njadika nanku. Bena mvita bebe nebashipangane munkatshi muabu.

²² Nembatumine bipupu bia masama a tshiambu. Nembashipe. Neanulokeshile mvula wa tshipupu, wa mabue, ne wa kapia, pambidi pebe wewe, pa tshiluilu tshiebe, ne pa bantu ba mu bisamba bivule biudi nabi.

²³ Nanku, nendeje bisamba bionsu ne: ndi Mvidi Mukulu munene wa tshijila. Bisamba nebimanye ne: meme ndi Maweja-Nangila.”